ဒီဇင်ဘာ-၂၉၊၂၀၂၅။အိမ်သွင်၊ရှိန်း/People’s Spring
စစ်ကိုင်းတိုင်း၊ ဝက်လက်မြို့နဲ့ ကပ်လျက်ရှိနေတဲ့ လိန်ပင်ကျေးရွာကို စစ်ကောင်စီက ဒီနေ့ ဒီဇင်ဘာ ၂၉ရက် နေ့လယ်ပိုင်းမှာ လေကြောင်းကနေ ဗုံးကြဲလို့ အမျိုးသမီး၂ဦးသေဆုံးပြီး ၄ဦး ဒဏ်ရာရခဲ့ပါတယ်။
နေ့လယ် ၁၁နာရီ ၃၃မိနစ်ကနေ ၁၁နာရီ ၃၆မိနစ်ကြားမှာ ဂျက်ဖိုက်တာနဲ့ ဗုံး ၈လုံးကြဲချသွားတာလို့ မြို့ခံတွေက ပြောပါတယ်။
” လိန်ပင်ရွာက မြို့နဲ့ကပ်နေတဲ့ရွာပါ။ အခုက တိုက်ပွဲမရှိပါဘူး။ ဗုံး၈ လုံးကို တစ်ကြိမ် ၂လုံးစီနဲ့ ၄ကြိမ်ကြဲတာ” လို့ မြို့ခံတစ်ဦးက ပြောပါတယ်။
Public Service Announcement
လေကြောင်းတိုက်ခိုက်မှုကြောင့် လိန်ပင်ကျေးရွာက အမျိုးသမီးနှစ်ဦးသေဆုံးပြီး အမျိုးသမီး၃ဦးအမျိုးသား၁ဦး ဒဏ်ရာရခဲ့တယ်လို့သိရပါတယ်။
“ ရွာအ နောက်ပိုင်းက နေအိမ်ပေါ်တည့်တည့်ကိုကျတာ။အိမ်မီး လောင်သွားတယ်” လို့ ဒေသခံတဦးက ပြောပါတယ်။
အမျိုးသား တစ်ဦးနဲ့ နောက်ထပ်အမျိုးသမီး ၃ဦး ထိခိုက်ဒဏ်ရာ တွေရတယ်လို့ သိရပြီး အသေးစိတ်အချက် အလက်ကို မသိရသေးပါဘူး။ မည်သည့် စစ်ရေးလှုပ်ရှားမှုမှ မရှိဘဲစစ်ကောင်စီတပ်က အဲဒီရွာကို လေကြောင်းတိုက်ခိုက်မှုပြုလုပ်ခဲ့တာလို့ သိရပါတယ်။
စစ်ကောင်စီဟာ ဒီဇင်ဘာ ၂၈ရက်က ရွေးကောက်ပွဲပြုလုပ်ခဲ့ပြီး ဒီဇင်ဘာတစ်လလုံးမှာ လေကြောင်းကနေဗုံးကြဲမှုတွေ အရှိန်မြှင့်ပြီး စစ်ရာဇဝတ်မှုကျူးလွန်နေတယ်လို့ ဗုံးကြဲခံရတဲ့ ဒေသကပြည်သူတွေနဲ့ တော်လှန်ရေးအင်အားစုတွေက ပြောပါတယ်။
နေပြည်တော်နဲ့ ရန်ကုန်မြို့ကလွဲလို့ ကျန်တိုင်းနဲ့ပြည်နယ်တွေကို စစ်ကောင်စီက ဗုံးကြဲခဲ့လို့ ဒီဇင်ဘာ ၁ရက်ကနေ ဒီနေ့အထိ အရပ်သား ၁၇၀ နီးပါးသေဆုံးပြီး ၂၄၀ဦးထက်မနည်း ဒဏ်ရာရခဲ့ပါတယ်။
