'/%3E%3C/svg%3E){kind=small}
ဇန်နဝါရီ-၁၊၂၀၂၆။အိမ်သွင်/People’s Spring
ဒီပဲယင်းမြို့နယ်က စစ်ဘေးရှောင်တွေခိုလှုံနေတဲ့စာသင် ကျောင်းကို ဒီကနေ့ ယညမှာ အာဏာသိမ်းစစ်တပ်က လေကြောင်းမှဗုံးကြဲလို့ ထိခိုက်မှုတွေရှိတယ်လို့ ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်ပါတယ်။
ဇန်နဝါရီ ၁ ရက်နေ့ည၇နာရီ၃၀မိနစ်ခန့်မှာပဲယင်းမြို့နယ် ၊မူးကမ်းကြီးကျေးရွာက စာသင်ကျောင်းကို စစ်တပ်က ဗုံးကြဲတာဖြစ်ပါတယ်။
“မြို့မှာနေလို့မရလို့စစ်ဘေးရှောင်တွေယာယီနေထိုင်တဲ့နေရာ။ အဲဒီစစ်ဘေးရှောင်စခန်းကို ကြဲသွားတာ။ ထိခိုက်ဒဏ်ရာရတာတွေရှိပါတယ်။ အခြေအနေမငြိမ်သေးလို့ အသေးစိတ်မသိနိုင်သေးဘူး”လို့ ဒီပဲယင်းမြို့က ဒေသခံတစ်ဦးကပြောပါတယ်။
Public Service Announcement
ဗုံးကြဲမှုကြောင့် စစ်ဘေးရှောင်ပြည်သူအချို့နဲ့ ကျောင်းအနီးဝန်းကျင်ရှိပြည်သူအချို့ ထိခိုက်ဒဏ်ရာရရှိခဲ့ပြီး မြေပြင်အခြေနေကိုအသေးစိတ်အတည်မပြုနိုင်သေးဘူးလို့ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်ပါတယ်။
စစ်ရေးပစ်မှတ်မဟုတ်တဲ့ အရပ်သားပြည်သူရှိတဲ့နေရာတွေကို စစ်ကောင်စီကပစ်မှတ်ထားပြီးလေကြောင်းကနေ ဗုံးကြဲနေလို့ အထူးသတိပြုကြဖို့ သတိပေးထားပါတယ်။
ပြီးခဲ့တဲ့ ဒီဇင်ဘာ ၅ ရက်က ဒီပဲယင်းမြို့နယ်အရှေ့ခြမ်း မရကန်ကျေးရွာကို စစ်တပ်က ဂျက်ဖိုက်တာနဲ့ လေကြောင်းပစ်ခတ်တိုက်ခိုက်ခဲ့လို့ နေအိမ်တွေ ပျက်စီးပြီး ပြည်သူ ၁၉ဦး သေဆုံးပြီး ၂၀ဦးထက်မနည်းလည်း ဒဏ်ရာရခဲ့ပါတယ်။
