ဇန်နဝါရီ-၂၀ ၊၂၀၂၆။ဇော်ဝင်း/People’s Spring
မကွေးတိုင်း၊ ဆိပ်ဖြူမြို့နယ်အခြေစိုက် အမှတ်(၂၂)ကာကွယ်ရေးပစ္စည်းစက်ရုံ(ကပစ-၂၂)ကို ပါရာမော်တာသုံးစီးရောက်ရှိပြီးနောက် နီးစပ်ရာ ကျေးရွာတွေကို လေကြောင်းတိုက်ခိုက်မှုတွေ စတင်ပြုလုပ်နေတယ်လို့ ဆိပ်ဖြူမြောက်ပိုင်းပြည်သူ့ကာကွယ်ရေး တပ်ဖွဲ့ တာဝန်ရှိသူက ပြောပါတယ်။
ပြီးခဲ့တဲ့ရက်ပိုင်းက ရောက်ရှိလာတဲ့ ပါရာမော်တာတွေဟာ ကပစ(၂၂)ကို ကာကွယ်မယ့်အခြေအနေကနေ ဒေသတွင်းကို အကြောင်းမဲ့လေကြောင်းတိုက်ခိုက်မှုတွေ တိုးလာနိုင်တယ်လို့ သတိပေးပါတယ်။
“မနေ့က(ဇန်နဝါရီ ၁၉ရက်) ဆိပ်ဖြူမြောက်ပိုင်းက ကျေးရွာတရွာကို လေကြောင်းတိုက်ခိုက်ခဲ့တယ်။ဗုံးသီး နှစ်လုံးကြဲတယ်။စက်လက်တွေနဲ့ပစ်တယ်။ပါရာမော်တာတစ်စီးနဲ့။ကြားထားတာက ပါရာမော်တာ သုံးစီးရောက်တယ်”လို့ ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့ ရဲ့ ပြန်ကြားရေးတာဝန်ခံ ကိုသူ ရိန်က ပြောပါတယ်။
Public Service Announcement
ပါရာမော်တာနဲ့ တိုက်ခိုက်မှုကြောင့် အရပ်သားအမျိုးသမီးတစ်ဦး လက်ပြတ်တာနဲ့ နေအိမ်တချို့ ပျက်စီးခဲ့တယ်လို့ အသိပေးပါတယ်။
လက်ရှိအခြေအနေတွေကြောင့် ဆိပ်ဖြူမြောက်ပိုင်းကျေးရွာတွေအနေနဲ့ ဗုံးခိုကျင်းအပါအဝင် နီးစပ်ရာ အကာကွယ်တွေ လုပ်ထားဖို့၊လူစုလူဝေး မလုပ်ဖို့၊အသံချဲ့စက်၊Sound Box တွေ မဖွင့်ဖို့ ဒေသတွင်း ကာကွယ်ရေးအဖွဲ့တွေက ကြေညာပါတယ်။
စစ်တပ်ရဲ့ရေသောက်မြစ်ဖြစ်တဲ့ ကပစ စက်ရုံတွေထဲက ကပစ (၂၁)၊ ကပစ (၂၂)နဲ့ ကပစ (၂၄)တို့ကို သွယ်တန်းထားတဲ့ လျှပ်စစ်မဟာဓါတ်အားလိုင်းတွေကို ပြီးခဲ့တဲ့လက တပြိုင်နက်တည်း တော်လှန်ရေးတပ်ဖွဲ့တွေက ဖျက်ဆီးထားပါတယ်။
ကပစ(၂၂)ဟာ ဆိပ်ဖြူ မြို့နယ်မြောက်ဘက်မှာရှိပြီး လက်ရှိစစ်ကောင်စီတပ် စစ်ကြောင်းထိုးဖြန့်ကျက်နေတဲ့ ပေါက်မြို့နယ်တောင်ဘက်ခြမ်း ပုသိမ်-မုံရွာ ကားလမ်းပိုင်း အရှေ့ဘက်ခြမ်းမှာရှိပါတယ်။
ဆိပ်ဖြူမြို့နယ်မှာ စစ်တပ်ရဲ့ကာကွယ်ရေးပစ္စည်းရုံး ကပစ (၂၀၊ ၂၁ )နဲ့ အမှတ်(၉)လေကြောင်းရန်ကာ ကွယ်ရေးကွပ်ကဲမှုစစ်ဆင်ရေးဌာနချုပ်(လစခ)တို့ အခြေစိုက်ထားပါတယ်။
အမှတ်(၂၁) ကာကွယ်ရေးပစ္စည်းစက်ရုံ(ကပစ -၂၁)က လေတပ်သုံးဗုံးတွေထုတ်ပြီး အမှတ် (၂၂)ကာကွယ်ရေးပစ္စည်းစက်ရုံ(ကပစ−၂၂ )က လက်နက်တွေ ထုတ်နေတာလို့ သိရပါတယ်။
