ဖေဖော်ဝါရီ-၉၊၂၀၂၆။ထားမြတ်/People’s Spring
ချင်းပြည်နယ်၊ဟားခါးမြို့အနီးတောတောင်ဒေသတွေကိုဒီကနေ့ကစပြီး သွားလာလှုပ်ရှားခြင်းမပြုလုပ်ဖို့ အများပြည်သူကို အသိပေးကြောင်း ချင်းဒေသကာကွယ်ရေးတပ်(CDF)-ဟားခါးက သတင်းထုတ်ပြန်ပါတယ်။
ဖေဖော်ဝါရီ ၉ရက်စပြီးနောက်ထပ်ထုတ်ပြန်ချက်ထပ်မံ မထုတ်ပြန်မချင်း ကြေညာချက်အတည်ဖြစ်တယ်လို့ အသိပေးထားပါတယ်။
“အဆိုပါကာလအတွင်း လုံခြုံရေးနှင့် ဆိုင်သော အခြေအနေများကြောင့်အန္တရာယ်ဖြစ်ပေါ်နိုင်သဖြင့်ပြည်သူလူထု၏ အသက်အန္တရာယ် ကာကွယ်ရေးအတွက် ယခုကဲ့သို့ ကန့်သတ်သတ်မှတ်ခြင်း ဖြစ်ပါသည်” လို့ ထုတ်ပြန်ချက်မှာဖော်ပြထားပါတယ်။
Public Service Announcement
အခုကြေညာချက်ကိုပြည်သူတွေ လေးနက်စွာလိုက်နာပူးပေါင်းဆောင်ရွက်ကြဖို့လည်း CDFက မေတ္တာရပ်ခံထားပါတယ်။
ချင်းပြည်ကောင်စီအဖွဲ့ဝင်ဒေသကာကွယ်ရေးတပ်ဖြစ်တဲ့ CDF ဟားခါးဟာ စစ်ကောင်စီကို တိုက်ခိုက်တဲ့ စစ်ဆင်ရေးတွေကို မကြာခဏ ပြုလုပ်နေရာ၂၀၂၅ ဒီဇင်ဘာလ ၂၆ရက်ကဟားခါးအခြေစိုက် ခလရ(၂၆၆)တပ်ရင်းကို ထိုးစစ်ဆင်တိုက်ခိုက်ခဲ့ပါတယ်။ ဒါ့အပြင် ၂၀၂၅ အောက်တိုဘာကလည်း ဟားခါးမြို့ရဲစခန်းကို CDF ဟားခါးက ဝင်ရောက်တိုက်ခိုက်ခဲ့ရာ စစ်ကောင်စီတပ်ဘက်မှသေဆုံးထခိုက်မှုတွေ ရှိသလိုအကျဉ်းသား ၁၅ဦးကိုလည်းကယ်ထုတ်နိုင်ခဲ့ပါတယ်။
အလားတူ၂၀၂၄ ကလည်း ဟားခါး ရဲစခန်းကို CDF က ဝင်ရောက်စီးနင်းပြီး အကျဉ်းသား ၆၀ကျော်ကိုလည်းကယ်ထုတ်နိုင်ခဲ့ပါသေးတယ်။
CDF ဟားခါးအနေနဲ့ ဟားခါးမြို့သိမ်းတိုက်ပွဲ ဖော်ဆောင်မယ်လို့ အသိပေးကြေညာထားပြီး လူငယ်တွေပူးပေါင်းပါဝင်ကြဖို့လည်းဖိတ်ခေါ်ထားပါတယ်။CDF ဟားခါးဟာ ဟားခါးမြို့တွင်း စစ်ဆင်ရေး၊ စခန်းသိမ်း စစ်ဆင်ရေးတွေကို အခြားတော်လှန်ရေးတပ်တွေနဲ့အတူ ပူးပေါင်းဖော်ဆောင်ခဲ့တာတွေလည်း ရှိကြောင်း အသိပေးထားပါတယ်။
