ဖေဖော်ဝါရီ ၂၂၊ ၂၀၂၆။ ထားမြတ်/People’s Spring
ကချင်ပြည်နယ်၊ ဗန်းမော်မြို့အခြေစိုက် စစ်ကောင်စီရဲ့ ခလရ( ၂၃၆) တပ်ရင်းရဲ့ ကာကင်းစခန်းတစ်ခုကို ကချင်လွတ်လပ်ရေးတပ်မတော်(KIA) ပူးပေါင်းတပ်က သိမ်းပိုက်နိုင်ခဲ့ကြောင်း ကချင်စစ်ရေး သတင်းရင်းမြစ်က ပြောပါတယ်။
ဖေဖော်ဝါရီ ၂၁ရက်မှာ ခလရ(၂၃၆)တပ်ရင်း ကာကင်းစခန်းကို သိမ်းရခဲ့တာဖြစ်ပြီး စစ်ကောင်စီတပ်က သေဆုံးထိခိုက်ရှိခဲ့တယ်လို့ အသိပေးပါတယ်။
“လက်နက်တွေရတယ်။ တပ်ရင်းမှူး တယောက် ဒဏ်ရာရသွားတယ်” လို့ ကချင်စစ်ရေး သတင်းရင်းမြစ်က ပြောပါတယ်။
Public Service Announcement
ခလရ(၂၃၆)တပ်ရင်းကို KIA ပူးပေါင်းတပ်က ၂၀၂၅ ဖေဖော်ဝါရီမှာ ပထမအကြိမ် အပြီးသတ် သိမ်းပိုက်ခဲ့ပါသေးတယ်။
နှစ်ကုန်ပိုင်းမှာတော့ စစ်ကောင်စီက ဗန်းမော်မြို့ကို စစ်အင်အားတွေ ပြန်ဖြည့်ပြီး တန်ပြန်ထိုးစစ်ဆင်ကာ KIA သိမ်းထားတဲ့နေရာအချို့ကို ပြန်နေရာယူထားတာဖြစ်ပါတယ်။ KIA အနေနဲ့ ဗန်းမော်မြို့သိမ်းတိုက်ပွဲကို တစ်နှစ်ကျော်ကြာတဲ့အထိ ဆက်လက်ဆင်နွှဲနေတာဖြစ်ပြီး အပြန်အလှန် ထိုးစစ်တွေ နဲ့ ကာလရှည်တိုက်ပွဲဖြစ်ပွားနေတာပါ။
ဗန်းမော်မြို့မှာ အခုရက်ပိုင်း တိုက်ပွဲတွေ နေတိုင်းဖြစ်ပွားနေတာလို့လည်း စစ်ရေးသတင်ရင်းမြစ်က ပြောပါတယ်။ ဒါ့အပြင် ဒီကနေ့ ၀ိုင်းမော်မြို့နယ်မှာလည်း တိုက်ပွဲရှိကြောင်း အသိပေးပါတယ်။
ကချင်ဒေသ စစ်ရေးအခြေအနေတွေကို KIO/KIA သတင်းပြန်ကြားရေး ဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်ပါတယ်။
တဖက်မှာ စစ်ကောင်စီတပ်ဟာ တိုက်ပွဲဖြစ်ပွားမှုမရှိတဲ့ KIA ထိန်းချုပ်နယ်မြေတွေကို လေကြောင်းဗုံးကြဲတိုက်ခိုက်မှုတွေ ဆက်တိုက်ပြုလုပ်လျက်ရှိပါတယ်။ မနေ့က ဖေဖော်ဝါရီ ၂၁ရက်မှာ KIA တပ်မဟာ ၅ခုရဲ့ နယ်မြေက နေရာ ၅ခုထက်မနည်းကို လေကြောင်း တိုက်ခိုက်မှုတွေ လုပ်ဆောင်ခဲ့တာပါ။
