ဖေဖော်ဝါရီ-၂၄၊ ၂၀၂၆။ ရှိန်း/People’s Spring
စစ်ကိုင်းတိုင်း၊ ဝက်လက်မြို့နယ်အရှေ့ခြမ်း သစ်ဆိမ့်ရွာအနီးမှာ စစ်တပ်က စစ်ကြောင်းထပ်တိုးဖို့ ကြိုးစားနေတာမို့ တိုက်ပွဲတွေ ဆက်တိုက်ဖြစ်နေတာ ၂ပတ်ရှိပြီလို့ တော်လှန်ရေးတပ်တွေက ပြောပါတယ်။
ဖေဖော်ဝါရီ ၁၁ ရက်က သစ်ဆိမ့်ရွာကို တပ်စွဲလိုက်တဲ့ စစ်တပ်ဟာ တောင်ဘက်ကို ဆက်ထွက်ဖို့ ကြိုးစားနေတာကြောင့် ဒီနေ့အထိတိုက်ပွဲဖြစ်နေတာလို့ သိရပါတယ်။
“ဒီနေ့က ကိုယ့်ဘက်က လုံးတာပါ။ ကိုယ့်ဘက်က ကျတာလည်းရှိတယ်။ စကစဘက်က ရထားတာ တွေလည်းရှိတယ်။ ပွဲကမပြီးသေးလို့ အသေးစိတ်ပြောလို့ မရသေးပါဘူး”လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
Public Service Announcement
စစ်တပ်က အသေခံဒရုန်း ၅စီးအထိ သုံးကာ ကျောက်မြောင်း ခလရ-၁၂ ကနေလည်း လက်နက်ကြီး ပစ်ကူတွေ ပေးနေတယ်လို့ သိရပါတယ်။
စစ်ကောင်စီက ဝက်လက်နယ်အရှေ့ခြမ်းကို စိုးမိုးဖို့ ကြိုးစားနေပြီး တိုက်ပွဲက နေ့တိုင်းဖြစ်နေတာမို့ အမှတ်(၃)ခရိုင် ချင်းဆက်လမ်းပိုင်းကို မသုံးကြဖို့လည်း တော်လှန်ရေးတပ်တွေက ထုတ်ပြန်ထားကြပါတယ်။
