ဖေဖော်ဝါရီ-၂၈၊ ၂၀၂၆။ ထားမြတ်/People’s Spring
ကချင်ပြည်နယ်၊ ဝိုင်းမော်မြို့နယ်မှာ ကချင်လွတ်လပ်ရေးတပ်မတော်(KIA)နဲ့ စစ်ကောင်စီတပ်အကြား တိုက်ပွဲတွေဆက်ရှိနေပြီးတိုက်ပွဲတွေဟာ စစ်ကောင်စီရဲ့ ခလရ(၅၈)တပ်ရင်းနဲ့ပိုနီးလာပြီဖြစ်တယ်လို့ ဒေသသတင်းရင်းမြစ်က ပြောပါတယ်။
ဖေဖော်ဝါရီ နောက်ဆုံးပတ်မှာ ဝိုင်းမော်မြို့က စစ်ကောင်စီ တပ်စွဲရာနေရာအချို့ KIA ထပ်သိမ်းနိုင်တဲ့ သတင်းတွေအပေါ် ဒေသခံက အခုလို ပြောပြတာပါ။ လတ်တလောသိမ်းရတဲ့ နေရာတွေက ကာကင်းစခန်း အခိုင်အမာတွေမဟုတ်ဘဲ တပ်ဖွဲ့ဝင်အနည်းငယ်နဲ့ ကင်းချထားတာတွေ သိမ်းနိုင်တာလို့ ဒေသခံက ပြောပါတယ်။
” အခုလောလောဆယ်ကတော့ ၅၈ နဲ့တော့ တအားနီးကပ်လာပြီလို့ပြောရမှာပဲ။ ဝိုင်းမော် ကန်ပိုက်တီလမ်းဘက်ကမဟုတ်ဘူးနော။ မိုင်းနားဘက်က။ အဲဒီဘက်က နေ ၅၈ ကိုတော့တအားကပ်လာပြီ။ ဒါပေမဲ့ ချောင်းတချောင်းတော့ ခြားသေးတယ်”လို့ ဒေသ သတင်းရင်းမြစ်က ပြောပါတယ်။
Public Service Announcement
စစ်ကောင်စီက ၂၀၂၄အတွင်း ဝိုင်းမော်မြို့နယ်မှာ လက်လွှတ်ဆုံးရှုံးထားရတဲ့ တပ်စခန်းနေရာတွေ နယ်မြေတွေ ပြန်ရဖို့ ကြိုးပမ်းထိုးစစ်ဆင်နေပေမယ့် ရှေ့မတိုးနိုင်တဲ့အပြင် လက်ကျန် တပ်ရင်းဖြစ်တဲ့ ခလရ(၅၈)တပ်ရင်းရဲ့ ကာကင်းစခန်းအချို့ကိုပါ အခု ဖေဖော်ဝါရီလအတွင်းမှာ လက်လွှတ်ခဲ့ရတာရှိပါတယ်။
ဗန်းမော်မြို့မှာလည်း တိုက်ပွဲတွေနေ့စဉ်ရှိနေပြီး မနှစ်က ၂၀၂၅ နှစ်ကုန်ပိုင်းမှာ KIA ဆုတ်ခွာပေးခဲ့ရတဲ့ နေရာအချို့ကို အခု ဖေဖော်ဝါရီ နောက်ဆုံးပတ်မှာ ပြန်လည်သိမ်းပိုက်နိုင်တာရှိတယ်လို့ ကချင်စစ်ရေး သတင်းရင်းမြစ်က ပြောပါတယ်။
စစ်ရေး အခြေအနေတွေနဲ့ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူဆီကို ဆက်သွယ်ထားဆဲဖြစ်ပါတယ်။
တဖက်မှာ စစ်ကောင်စီဟာ ဖေဖော်ဝါရီ နောက်ဆုံးပတ်မှာ KIA ထိန်းချုပ်နယ်မြေ အတွင်း နေရာ အများအပြားကို လေကြောင်းဗုံးကြဲတိုက်ခိုက်တာတွေ ပြုလုပ်ခဲ့ပြီး ဗုံးကြဲခံရတဲ့ နေရာအများစုက အရပ်သား နေထိုင်ရာတွေဖြစ်တယ်လို့ ဗိုလ်မှူးကြီးနော်ဘူက ပြောထားပါတယ်။
