ဧပြီ – ၁၃ ၊၂၀၂၆ ၊နိုင်ပကောင်း/People’s Spring
ထိုင်း – မြန်မာ နယ်စပ်မြို့ ဘုရားသုံးဆူမှာ သင်္ကြန် ကာလအတွင်း မြို့လုံခြုံရေးယူထားတဲ့ ဒီမိုကရေစီအကျိုးပြုကရင့်တပ်မတော် (DKBA) က စည်းကမ်းချက် ငါးချက်ထုတ်ပြန်လိုက်ပြီး မလိုက်နာရင် အပြစ်ပေးအရေးယူမယ်လို့ကြေညာပါတယ်။
သင်္ကြန် ကာလအတွင်း မူးယစ်သောက်စားပြီး ယာဉ်မောင်းနှင်တာမလုပ်ဖို့ ၊ သွားလာနေတဲ့ယာဉ်တွေကို တားဆီးပိတ်ဆို့ ရေမကစားဖို့ ၊ ပြင်းအားရှိတဲ့ ရေပိုက်တွေနဲ့ ရေကမစားဖို့ ၊ ည ၇ နာရီထက်ကျော်လွန်ပြီး ရေကစားတာမလုပ်ဖို့ ၊မြန်မာ့ရိုးရာ ယဉ်ကျေးမှုနဲ့ ဆန့်ကျင်တဲ့ သရုပ်ပျက်အဝတ်အစား တွေနဲ့ ရေမကစားဖို့ ဆိုပြီး DKBA က အချက် ငါးချက် ထုတ်ပြန်တာပါ။
အဲဒီစည်ကမ်းချက်တွေ မလိုက်နာရင်တော့ အရေးယူမယ်လို့ DKBA ကဆိုပါတယ်။ DKBA ရဲ့ စည်းကမ်းချက်တွေကို မြို့ခံ လူထုက ဝေဖန်ပါတယ်။
Public Service Announcement
ဘုရားသုံးဆူမှာရှိတဲ့ တရုတ်နိုင်ငံသားတွေ နှစ်သစ်ကူးမှာ ညအချိန်မတော်ထိ မီးရှုးမီးပန်း ဖောက်ပြီးပျော်ပါးတာကိုတော့ DKBA က တားမြစ်တာမရှိဘဲ အခုလို အများပြည်သူပျော်ရမယ့် သင်္ကြန် ပွဲတော်အတွက် စည်းကမ်းတင်းကျပ်အပေါ် မြို့ခံ တွေက ထောက်ပြတာလည်းဖြစ်ပါတယ်။
ကရင်ပြည်နယ်၊ ဘုရားသုံးဆူမြို့မှာ စစ်တပ်ရှေ့တန်းစခန်းရှိပေမယ့် မြို့လုံခြုံရေးကိုတော့ ဒီမိုကရေစီအကျိုးပြုကရင်တပ်မတော်(DKBA) ဗိုလ်စောအေဝမ်းအဖွဲ့က တာဝန်ယူထားပါတယ်။
ဘုရားသုံးဆူမှာ ကျားဖြန့် လုပ်ငန်းတွေရှိပြီး DKBA က ခွင့်ပြုထားတာဆိုတဲ့စွပ်စွဲချက်တွေရှိပါတယ်။
ဘုရားသုံးဆူမြို့သင်္ကြန်ပွဲတော်ကာလအတွင်း DKBA တပ်ဖွဲ့ဝင်တွေ အနေနဲ့ ယူနီဖောင်းဝတ်ဆင်ပြီးစစ်လက်နက်တပ်ဆင်သွားလာတာတွေ မပြုလုပ်ဖို့၊ ရေကစားရာမှာ အရပ်ဝတ်စုံနဲ့သာ သွားလာဖို့ စတဲ့ စည်းကမ်းချက်တွေကို ထုတ်ပြန်ထားပြီး မလိုက်နာတဲ့ တပ်ဖွဲ့ဝင်တွေကိုအရေးယူမယ်လို့ ဆိုထားပါတယ်။
ဓာတ်ပုံ – Google Map
