မေ-၁၃၊၂၀၂၆။ ဇော်ရမ်း/People’s Spring
ဧရာဝတီတိုင်း၊ ရေကြည်မြို့နယ်က အမှတ်(၃၄၄) အမြောက်တပ်(အမတ-၃၄၄)အနီးကို အာရက္ခတပ်တော်(AA)နဲ့မဟာမိတ်တွေက တကျော့ပြန် ထိုးစစ်ဆင်နေပြီး စစ်တပ်က လေကြောင်းကနေ ဗုံးကြဲနေတယ်လို့ ဒေသခံတွေက ပြောပါတယ်။
ရခိုင်ပြည်နယ်၊ ဂွမြို့နဲ့ဆက်စပ်နေပြီး ဂွ – ငသိုင်းချောင်းလမ်းပိုင်းဘေးက မြောက်စမ်းကျေးရွာအနီးမှာရှိတဲ့ အမြောက်တပ် အမတ(၃၄၄) တပ်ရင်းကို မေလ ၉ရက်ကစပြီး AAနဲ့မဟာမိတ်တွေက ထိုးစစ်ဆင်နေတာလို့ ဆိုပါတယ်။
” မေလ ၉ရက်ကစပြီး တိုက်ပွဲပြင်းတာပဲ။ လေယာဉ်နှစ်ရက်ဆက်လာတယ်။ ဒီနေ့ မနက်အထိ တိုက်ပွဲပြင်းနေတယ်။ အဓိကက ၃၄၄ ရဲ့ကာကင်းတွေကို ချနေတာ။ တော်လှန်ရေးတပ်တွေကတော့ ဒေသခံတွေကို သတိပေးထားတယ်”လို့ ရေကြည်မြို့ခံသတင်းရင်းမြစ်က ပြောပါတယ်။
Public Service Announcement
အမတ(၃၄၄)တပ်ရင်းကို ၂၀၂၅နှစ်စပိုင်းမှာ AAနဲ့မဟာမိတ်တွေက တိုက်ခိုက်ခဲ့ဖူးပြီး ကာကင်းစခန်းတွေကိုလည်း သိမ်းယူနိုင်ခဲ့ပါတယ်။
စစ်တပ်က အမတ (၃၄၄)က အမြောက်တွေကို ကျုံပျော်မြို့က ခလရ(၃၇)တပ်ရင်းကို သွားပို့ထားတဲ့အထိ အထိနာခဲ့ပါတယ်။ ၂၀၂၅ နှစ် လယ်ပိုင်းမှာ အမတ(၃၄၄)တပ်ရင်းအနီးမှာ တိုက်ပွဲတွေရပ်တန့်သွားပါတယ်။
ဒါပေမယ့် ဧရာဝတီတိုင်းက လေးမျက်နှာ၊ သာပေါင်းဒေသတွေမှာ တိုက်ပွဲတွေဆက်ဖြစ်ခဲ့ပါတယ်။ အခုအခါမှာတော့ အမတ(၃၄၄)တပ်ရင်းအနီးမှာ တိုက်ပွဲတွေ ထပ်မံဖြစ်ပွားလာတာပါ။
ယခင်တိုက်ပွဲကာလက ဒေသခံတွေ စစ်ဘေးမရှောင်းးဖို့ စစ်တပ်က ဖိအားပေးခဲ့သလို အခုလည်း ကျေးရွာတွေကို ပိတ်ဆို့ထားတယ်လို့ သိရပါတယ်။
AAနဲ့မဟာမိတ်တွေဟာ လက်ရှိမှာ မကွေတိုင်းက ငဖဲမြို့နယ်က နတ်ရေကန်ဗျူဟာ၊ ပဲခူးတိုင်း ပန်းတောင်းမြို့နယ်ထဲက ကပစ(၁၆)ကိုလည်း စစ်ရေးဖော်ဆောင်နေပြီး တိုက်ပွဲတွေဖြစ်နေပါတယ်။
