မေ -၁၅၊၂၀၂၆။မိုမို/People’s Spring
ရှမ်းတောင်နဲ့ ကရင်နီပြည်နယ်စပ်က မိုးဗြဲမြို့အနီးကို စစ်တပ်စစ်ကြောင်းထိုးလာတာကြောင့် တိုက်ပွဲ ပြင်းထန်နေတယ်လို့ စစ်ရေးသတင်းရင်းမြစ်တွေက ပြောပါတယ်။
မေလ၁၃ ရက်မှာစစ်တပ်နဲ့ စစ်တပ်လက်အောက်ခံပအိုဝ်းပြည်သူ့စစ် (PNO/PNA) ပူးပေါင်းအဖွဲ့
က မိုးဗြဲမြို့အနောက်ဘက်ခြမ်းကို စစ်ကြောင်းထိုးလာတာကြောင့် တော်လှန်ရေးတပ်တွေနဲ့ တိုက်ပွဲဖြစ်နေတာလို့ ဆိုပါတယ်။
Public Service Announcement
တိုက်ပွဲအတွင်း နှစ်ဖက်ထိခိုက်သေဆုံးမှုရှိကာ စစ်တပ်စစ်ကြောင်းတွေ နောက်ပြန်ဆုတ်သွားရတယ်လို့ ရှမ်းတောင်နဲ့ ကရင်နီအခြေစိုက်တော်လှန်ရေးရဲဘော်တစ်ဦးက ပြောပါတယ်။
“မိုးဗြဲစက်တော် လွယ်ဝိုင်းဘက်ကို စစ်ကြောင်းထိုးလာလို့ ထိတွေ့မှုဖြစ်တာပါ။ တိုးလိုက်ဆုတ်လိုက်ပဲ။အခြေနေက ဆိုင်ထားတဲ့အခြေနေပါ”လို့ သူက ပြောပါတယ်။
စစ်တပ်စစ်ကြောင်းတွေမှာ PN တပ်အင်အား အများအပြားသုံးထားတာကိုတွေ့ရတယ်လို့လည်း မြေပြင်မှာရှိနေတဲ့ ရဲဘော်တစ်ဦးက ပြောပါတယ်။
“စစ်တပ်နဲ့ PNO ပူးပေါင်းအင်အားကိုကြည့်ရင် PNOက ပိုများနေတာတွေ တွေ့ရပါတယ်။လောလောဆယ်သူတို့အထိနာလို့ပြန်ဆုတ်သွားပါတယ်”လို့ သူက ပြောပါတယ်။
စစ်တပ်စစ်ကြောင်း တားဆီးတိုက်ခိုက်မှုအတွင်း ရဲဘော်နှစ်ဦးကျဆုံးခဲ့တယ်လို့ အမှတ်(၁)အယ်လ်ဖာစစ်ဒေသ မိုးဗြဲတာဝန်ရှိသူအချို့က လူမှုကွန်ရက်ကတဆင့် အသိပေးထားပါတယ်။
မိုးဗြဲမြို့ကို စစ်တပ်က ၂၀၂၅ ဇူလိုင်က ပြန်ထိန်းချုပ်ပြီးနောက်ပိုင်း မိုးဗြဲမြို့အနီးကျေးရွာတွေကို မကြာခဏ စစ်ကြောင်းထိုးနေတာဖြစ်ပါတယ်။
