ဇွန် ၁၄၊ ၂၀၂၆။ဇေအောင်/People’s Spring
စစ်ကိုင်းတိုင်း၊ မုံရွာမြို့ပေါ်မှာ စစ်ကောင်စီတပ်ဖွဲ့ဝင်တွေက ဆိုင်ကယ်စီးနင်းသူတွေကို လိုက်လံစစ်ဆေးဖမ်းဆီးပြီး ကျပ်သိန်းချီတောင်းနေကြောင်း ဒေသခံတွေက ပြောပါတယ်။
မုံရွာမြို့ပေါ်မှာ စစ်ကောင်စီတပ်ဖွဲ့ဝင်တွေဟာ ကား၊ဆိုင်ကယ်တွေနဲ့ မြို့တွင်း လှည့်ပတ်ကာ ဆိုင်ကယ်လိုင်စင်၊ နံပါတ်ပြားနဲ့ ဆိုင်ကယ်စီးဦးထုပ် ဆောင်းထားခြင်း ရှိ၊ မရှိ စတာတွေ အကြောင်းပြပြီး လိုက်လံစစ်ဆေးငွေညှစ်နေကြောင်း ဒေသခံတွေက ပြောပါတယ်။
“ကင်းပတ်ပြီး လိုက်စစ်နေတာ။ မုံရွာတက္ကသိုလ် ဘုရားကြီးရှေ့ ကျောက္ကာလမ်းပေါ်မှာဆိုရင် နေ့တိုင်းရှိတယ်။ ကင်းပတ်နေတာလည်း တွေ့ရတယ်။”လို့ ဒေသခံတစ်ဦးက ပြောပါတယ်။
Public Service Announcement
ဆိုင်ကယ်တွေတင်မကဘဲ မော်တော်ကားတွေလည်း စစ်ဆေးငွေညှစ်ခံနေရတယ်လို့ သိရပါတယ်။
စစ်အုပ်စုရဲ့ စစ်ဆေးငွေညှစ်မှုတွေကြောင့် ဆိုင်ကယ်နဲ့ သွားလာအသုံးပြုနေရတဲ့ လက်လုပ်လက်စား အခြေခံအလုပ်သမားတွေ အလုပ်သွားဖို့အတွက် အခက်အခဲဖြစ်နေကြောင်း မြို့ခံတွေက ပြောပါတယ်။
ဒါ့အပြင် စစ်တပ်ဟာ မုံရွာမြို့ပေါ်မှာ လူငယ်တွေ၊ အလုပ်သမားတွေကို ပေါ်တာဆွဲဖမ်းဆီးတာတွေ မကြာခဏ ပြုလုပ်နေတဲ့အတွက် လုပ်ငန်းတွေ အချိန်စောဆင်းရတာ၊ ရပ်နားလိုက်ရတာတွေ ဖြစ်ပွားနေကြောင်း မြို့ခံတွေက ပြောပါတယ်။
