ဇူလိုင် ၂၊ ၂၀၂၆။ထားမြတ်/People’s Spring
ပြည်သူ့ကာကွယ်ရေးတပ်မတော်(PDF) နေပြည်တော်တိုင်းစစ်ဌာနရဲ့ စစ်ဆင်ရေးဖော်ဆောင်မှုတွေကြောင့် ဇွန်လအတွင်းမှာ စစ်တပ်က အရာရှိ ၄ဦး အပါအဝင် ၄၀ဦးကျော် သေဆုံးကာ ရဲစခန်းမှူး အပါအဝင် အများအပြား ထိခိုက်ဒဏ်ရာရခဲ့ကြောင်း နေပြည်တော် PDFက သတင်းထုတ်ပြန်ပါတယ်။
ဇွန်လအတွင်း နေပြည်တော်တိုင်းစစ်ဌာနရဲ့ စစ်ဆင်ရေးနယ်မြေတွေ ဖြစ်တဲ့ ပဲခူးတိုင်း ဆွာမြို့နဲ့ ရေတာရှည်မြို့နယ်တွင်းရှိ စစ်တောင်းမြစ်အရှေ့ဘက်ကမ်းစစ်ခွင်နဲ့ မကွေးတိုင်း အောင်လံ၊ တောင်တွင်းကြီး၊ နတ်မောက်မြို့နယ်တွင်းရှိ အလယ်ရိုးမစစ်ခွင်တွေမှာ ဆင်နွှဲခဲ့တဲ့ စစ်ဆင်ရေးတွေ စုစည်းဖော်ပြခဲ့တာဖြစ်ပါတယ်။
တစ်လအတွင်းစစ်ဆင်ရေးတွေမှာ စစ်တပ်ထံက လက်နက်ငယ် (၁၈)လက်နဲ့ ကျည်ခဲယမ်းများ၊ ဆက်စပ်ပစ္စည်းများ သိမ်းရခဲ့ကြောင်းလည်း မှတ်တမ်းနဲ့အတူ အသိပေးပါတယ်။
Public Service Announcement
ဆင်နွှဲခဲ့တဲ့ စစ်ဆင်ရေး ဖြစ်စဉ်တခုချင်းကိုလည်း ဖော်ပြခဲ့ရာ ဇွန်လ ၃ရက်မှာ ဆွာမြို့နယ် ဆွာမကြီးရွာစခန်းကို တိုက်ခိုက်သိမ်းပိုက်နိုင်မှု၊ ဇွန် ၄ရက်မှာ နတ်မောက်မြို့နယ် အရှေ့ခြမ်းရှိ ကွင်းကြီးကျေးရွာ အနီး စိုင်ကောင်းရဲစခန်းမှူးလိုက်ပါလာသော ယာဉ်တန်းအား မိုင်းဆွဲတိုက်ခိုက်မှု တွေ လုပ်ဆောင်ခဲ့တယ်လို့ ဖော်ပြပါတယ်။
ဇွန်လ ၅ရက်မှာ ရေတာရှည်မြို့နယ်ပိတောက်ကုန်းကျေးရွာသို့ စစ်ကြောင်းထိုးဝင်ရောက်လာတဲ့ စစ်ကောင်စီတပ်ကို ခုခံတိုက်ခိုက်ခဲ့မှု ဇွန်လ ၁၅ရက်မှာ ရေတာရှည်မြို့နယ် ကျွန်းကုန်းရွာကို စစ်ကြောင်းထိုးလာတဲ့ စစ်တပ်ကို ခုခံတိုက်ခိုက်မှု၊ အဲဒီနေ့မှာပဲ မကွေးတိုင်း၊ တောင်တွင်းကြီးမြို့နယ်၊ ဆတ်သွားကျေးရွာ ဘက်မှ ထွက်ခွာလာတဲ့ ဗိုလ်ကြီး အဆင့်ပါ ၄ဦး စီးနင်းလာတဲ့ ကားကို ရန်ကုန်_ပြည်လမ်းမကြီးပေါ်ရှိ ကိုးပင်_ဆတ်သွား လမ်းပိုင်းတစ်နေရာမှာ ကြားဖြတ်တိုက်ခိုက်မှု ဖြစ်စဉ်တွေ အသိပေးပါတယ်။
ဇွန်လ ၁၈ရက်မှာလည်း ပဲတောက်ကုန်းကျေးရွာနဲ့ ကျွန်းကုန်းကျေးရွာအကြား တပ်စွဲထားတဲ့ စစ်ကောင်စီတပ်ကို တိုက်ခိုက်ခဲ့တယ်လို့ဆိုပါတယ်။ ဇွန်လ ၂၄ရက်မှာလည်း ပဲတောက်ကုန်းကျေးရွာနဲ့ ကျွန်းကုန်းကျေးရွာကြား တပ်စွဲထားတဲ့ စစ်တပ်ကို ထပ်မံ တိုက်ခိုက်ခဲ့ကြောင်း ဖော်ပြပါတယ်။
အထက်ပါ စစ်ဆင်ရေးတွေကို နေပြည်တော်တိုင်းစစ်ဌာန၊ ဗျူဟာ အမှတ် (၁၈)၊ ဗျူဟာအမှတ် (၁၉)လက်အောက်ရှိ PDF တပ်ရင်းတွေ၊ နေပြည်တော်ပကဖ၊ ဗျူဟာ အမှတ် (၁၇) လက်အောက်ရှိ PDF တပ်ရင်းများ၊ ဗျူဟာအမှတ် (၁၇) လက်အောက်ရှိ ရိုးမဖိုက်တာစစ်ကြောင်းနဲ့ မဟာမိတ်တပ်ဖွဲ့များက ဖော်ဆောင်ခဲ့တာ ဖြစ်ပါတယ်။
ရေတာရှည်မြို့နယ်တိုက်ပွဲမှာ စစ်တပ်က ထိခိုက်သေဆုံးများလို့ ဒရုန်း၊ လက်နက်ကြီး၊ တင့်ကား၊ Y 12၊ MI 35 နဲ့ ဂျက်ဖိုက်တာများ သုံး တိုက်ခိုက်တာတွေရှိတယ်လို့ အသိပေးပါတယ်။
စစ်ဆင်ရေးအတွင်း PDF ရဲဘော်တွေ ထိခိုက်ကျဆုံးရှိမရှိ အခြေအနေတွေကိုတော့ ဖော်ပြမထားပါဘူး။
