ဇူလိုင် ၂၊ ၂၀၂၆။ ဟာနာဆန်/People’s Spring
ပခုက္ကူမြို့အခြေစိုက် တပ်မ(၁၀၁) စစ်ကြောင်းကြောင့် ပေါက်မြို့နယ်က ဒေသခံပြည်သူ တစ်သောင်းကျော်ဟာ ဘေးလွတ်ရာ ထွက်ပြေးတိမ်းရှောင်နေရပါတယ်။
တပ်မ (၁၀၁)က အင်အား (၅၀၀) နီးပါးပါဝင်တဲ့ စစ်ကြောင်းဟာ မြိုင်မြို့နယ်နဲ့ ပခုက္ကူမြို့နယ်အတွင်းရှိ ကျေးရွာတွေကိုဖြတ်သန်းကာ ပြီးခဲ့တဲ့ ဇွန်လ ၃၀ ရက်ကစတင်ပြီး ပေါက်မြို့နယ်အတွင်း စစ်ကြောင်းထိုး ဝင်ရောက်လာတာကြောင့် ဒေသခံပြည်သူ တစ်သောင်းကျော် ဘေးလွတ်ရာသို့ ယာယီထွက်ပြေး တိမ်းရှောင်နေကြရကြောင်း ပေါက်မြို့နယ် လူသားစာနာဌာနက အသိပေးပါတယ်။
အဲဒီစစ်ကြောင်းကြောင့် ပေါက်မြို့နယ် အရှေ့မြောက်ပိုင်းရှိ ကျေးရွာပေါင်း (၁၆) ရွာမှ အိမ်ထောင်စု (၂,၀၆၄) စု၊ စုစုပေါင်း လူဦးရေ (၁၀,၁၇၁)ဦး ကျော်ဟာ နီးစပ်ရာကျေးရွာတွေနဲ့ တောတောင်တွေထဲ အရေးပေါ် စစ်ဘေးရှောင်နေရတယ်လို့ မြို့နယ် လူသားစာနာဌာနက ထပ်မံအသိပေးပါတယ်။
Public Service Announcement
“ရွာထဲ စစ်ကြောင်းဝင်နေလို့ တစ်ရွာလုံးရှောင်နေရပြီ။ ခုဝင်နေတဲ့ရွာက တလောလေးက လေယာဥ်ပစ်ချခံရတဲ့နေရာနဲ့ သိပ်မဝေးဘူး”လို့ ဒေသခံတစ်ဦးက ပြောပါတယ်။
လတ်တလော စစ်ဘေးရှောင် ပြည်သူတွေအတွက် စားနပ်ရိက္ခာ အရေးပေါ် လိုအပ်နေပြီး ကူညီလှူဒါန်းလိုသူတွေအနေနဲ့ နီးစပ်ရာ နယ်မြေခံတာဝန်ရှိသူတွေ၊ ခေါင်းဆောင်တွေနဲ့ ချိတ်ဆက်ပြီး ကူညီပေးကြဖို့ ပေါက်မြို့နယ် လူသားစာနာဌာနက မေတ္တာရပ်ခံထားပါတယ်။
အဲဒီစစ်ကြောင်းဟာ ပုသိမ်-မုံရွာလမ်းပိုင်းအတိုင်း ပေါက်မြို့နယ် ရေပြာရွာဘက်နဲ့ စက်မှု (၂)ဘက်ကို လည်းသွားလာနိုင်တယ်လို့ ယူဆရတဲ့အတွက် အဲဒီလမ်းပိုင်းပေါ်မှာရှိတဲ့ ပြည်သူတွေ ကြိုတင်ပြင်ဆင်မှုတွေ ပြုလုပ်ထားကြဖို့ အညာမြေအရပ်ဖက် လူမှုအဖွဲ့အစည်း-မြိုင်က နှိုးဆော်ပါတယ်။စစ်ကြောင်းဟာ မြစ်ခြေမြို့ကို မီးရှို့ဖျက်ဆီးပြီး ပြည်သူ ၄၀ ကျော်ကို သတ်ဖြတ်ကာ မြိုင်မြို့နယ်ဘက်မှလည်း စိတ်ကျန်းမာရေးမကောင်းသူ အမျိုးသားတစ်ဦးအပါအဝင် ပြည်သူ ၆ ဦးထက်မနည်း သတ်ဖြတ်ခဲ့တဲ့ စစ်ကြောင်းဖြစ်တယ်လို့ သိရပါတယ်။
