ဇူလိုင်-၅၊ ၂၀၂၆။ဟာနာဆန်/People’s Spring
စစ်ကိုင်းတိုင်း၊ ဒီပဲယင်းမြို့နယ်မှာ မူးယစ်ဆေးဝါး ရောင်းဝယ်ဖြန့်ဖြူးသူ ၃ ဦးကို ဖမ်းဆီးအရေးယူထားပြီး တစ်ဦးကို ထောင်ဒဏ် ၁၅ နှစ်စီ ချမှတ်ထားကြောင်း ဒီပဲယင်းမြို့နယ် ပြည်သူ့လုံခြုံရေးအဖွဲ့က သတင်းထုတ်ပြန်ပါတယ်။
ဒီပဲယင်းမြို့နယ်အတွင်း မူးယစ်ဆေးဝါးတွေရောင်းဝယ် ဖောက်ကားနေသူ ၂ ဦးကို ပြည်သူ့ကာကွယ်ရေးအဖွဲ့ကနေ ဖမ်းဆီးပြီး ပြည်သူ့လုံခြုံရေးအဖွဲ့က ထိန်းသိမ်းစစ်ဆေးကာ ဥပဒေနဲ့ အညီ အရေးယူ ဆောင်ရွက်နေကြောင်း ဒီပဲယင်းမြို့နယ် ပြည်သူ့လုံခြုံရေးအဖွဲ့က ဇူလိုင် ၃ ရက်မှာ သတင်းထုတ်ပြန်ပါတယ်။
ဒါ့အပြင် မူးယစ်ဆေးဝါးရောင်းချ ဖြန့်ဖြူးနေသူတစ်ဦးကိုလည်း မြို့နယ် ပအဖရဲ့ ညွှန်ကြားချက်နဲ့အတူ မုံရွာခရိုင် ပလဖ ၊ ဒီပဲယင်းမြို့နယ် ပလဖကပူးပေါင်း ဖမ်းဆီးပြီး ဥပဒေနဲ့အညီ အရေးယူဆောင်ရွက်ခဲ့ရာ ဒီပဲယင်းမြို့နယ်တရားရုံးကနေ ထောင်ဒဏ် ၁၅ နှစ်စီ ပြစ်ဒဏ်ကျခံရန် အမိန့်ချမှတ်ခဲ့ကြောင်း ဒီပဲယင်း ပလဖက ဇူလိုင် ၄ ရက်မှာ သတင်းထပ်မံ ထုတ်ပြန်ပါတယ်။
Public Service Announcement
ထောင်ဒဏ်ချမှတ်ခံရသူကို မည်သည့်အချိန်က ဖမ်းဆီးခဲ့တယ်ဆိုတာ ပလဖရဲ့ထုတ်ပြန်ချက်မှာ မတွေ့ရပါဘူး။
ထုတ်ပြန်ချက်တွေနဲ့ပတ်သက်ပြီး ပလဖအဖွဲ့ကို ဆက်သွယ်မေးမြန်းထားပေမဲ့ ပြန်လည်ဖြေကြားတာ မရှိသေးပါဘူး။
လက်လီသမားတွေတင်မကဘဲ အဓိကတင်ပို့ရောင်းချနေတဲ့ အကြီးပိုင်းတွေကိုလည်း ဖမ်းဆီးအရေးယူဖို့ ပြည်သူတွေက တိုက်တွန်းနေပါတယ်။
“ဒီကာလမှာ ဒီပဲယင်းမှ မဟုတ်ဘူး။ တခြားနေရာတိုင်းမှာလည်း သူ့အဆက်အသွယ်နဲ့သူ ပေါများနေတယ်လို့ ကြားတယ်”လို့ ဒီပဲယင်းဒေသခံတစ်ဦးက ပြောပါတယ်။
ဒီပဲယင်းမြို့နယ်အတွင်း မူးယစ်ဆေးဝါးတွေ တင်သွင်းရောင်းချ ဖြန့်ဖြူးနေတာတွေကို လုံးဝလက်ခံမှာမဟုတ်ဘဲ မူးယစ်ဆေးဝါးဖြန်ဖြူးနေသူတွေကို ဖော်ထုတ် ဖမ်းဆီးတာတွေ ဆက်လုပ်သွားမှာမို့ ပြည်သူတွေ သတင်းပေးကြဖို့ ဒီပဲယင်းမြို့နယ် ပြည်သူ့လုံခြုံရေးအဖွဲ့က သတင်းထုတ်ပြန်ထားပါတယ်။
ဒီပဲယင်းပလဖဟာ ပြီးခဲ့တဲ့ ၂၀၂၅ အောက်တိုဘာကလည်း မူးယစ်ဆေးဝါးရောင်းချနေသူ ၁ဦးကို ဖမ်းဆီးရမိခဲ့ပါသေးတယ်။
