ဇူလိုင် ၃၀၊ ၂၀၂၆။ ခိုင်မြတ်/People’s Spring
ရခိုင်ပြည်နယ် ကျောက်တော်မြို့နယ်အထက်ပိုင်း ဝေးလံခေါင်သီတဲ့တောင်ပေါ်၊ ချောင်းဖျားဒေသကျေးရွာအချို့မှာ လူဦးရေ အများအပြား ငှက်ဖျားဖြစ်နေပြီး ဆေးဝါးကုသဖို့လည်း လက်လှမ်းမမီ၊ အလှမ်းဝေးနေတယ်လို့ ဆိုပါတယ်။
ကျောက်တော်မြို့နယ် ယိုးချောင်းအထက်ပိုင်း တောင်ပေါက်ကျေးရွာနဲ့ ပလက်၀မြို့နယ်အစပ် င/တရံကျေးရွာတို့မှာ လူ အစုလိုက် ဖျားနာနေကြတာဖြစ်ပြီး တောင်ပေါက်ရွာက ရွာသား ၈ ဦးနဲ့ င/တရံရွာက ရွာသား၄၁ ဦးတို့မှာ ငှက်ဖျားပိုးတွေ့တယ်လို့ အာရက္ခတပ်တော်(AA)လက်အောက်ခံ ကျန်းမာရေးဌာနက ပြောပါတယ်။
“တောင်ပေါက်ဆိုတာ ယိုးချောင်းရဲ့ ဟိုးအပေါ်ဆုံးမှာရှိတဲ့ရွာပါ။ တော်တော်အလှမ်းဝေးတယ်။ ဆေးပေးခန်းလည်း မရှိဘူး။ AA က လာကုပေးတာ ကျေးဇူးတင်ပါတယ်။ ဒါပေမယ့် သူတို့ပြန်သွားရင် ထပ်ပြဖို့ ဆေးခန်း မရှိဘူး။ အခု ဘေးနားက ရွာမှာလည်း ဖျားနေတဲ့သူတွေ အများကြီးရှိနေပါတယ်” လို့ ယိုးချောင်းဒေသခံတစ်ဦးက ပြောပါတယ်။
Public Service Announcement
အစုလိုက်ငှက်ဖျားဖြစ်နေတဲ့ တောင်ပေါက်နဲ့ င/တရံရွာတို့ကို AA ကျန်းမာရေးဌာနက ဇူလိုင် ၁၉ ရက်နေ့ကနေ ၂၃ ရက်အထိ ၅ရက်ကြာ သွားရောက်နေထိုင်ကုသပေးခဲ့ပြီး သွေးစစ်တာ၊ ဆေးကုသပေးတာတွေ လုပ်ခဲ့ပါတယ်။
“ကျန်းမာရေးဌာနက နယ်လှည့်ကုပေးရတဲ့ အနေအထားပါ။ ရွာတိုင်းမှာ ဆေးပေးခန်း ချပေးထားနိုင်တဲ့အနေအ ထားမရှိဘူး။ အဓိကတော့ ဝန်ထမ်းအင်အားနည်းလို့။ မသေသင့်ဘဲ သေခဲ့ရတဲ့လူနာတွေလည်း ရှိတယ်။ ရေဘေး နောက်ပိုင်းဆိုရင် ကျန်းမာရေးတဖွဲ့လုံး ပင်ပင်ပန်းပန်းနဲ့ လုပ်နေကြတာ” လို့ AA ကျန်းမာရေးဌာနမှ ဝန်ထမ်းတစ်ဦး က ပြောပါတယ်။
လက်ရှိမှာ AA ဟာ ကျန်းမာရေးဌာနဝန်ထမ်းအင်အားဖြည့်တင်းဖို့အတွက် သူနာပြုနဲ့ သားဖွားသင်တန်းကျောင်း ဖွင့်ထားသလို ဆေးသိပ္ပံကျောင်းဖွင့်လှစ်ဖို့လည်း ပြင်ဆင်နေတယ်လို့ သိရပါတယ်။
ရခိုင်ပြည်နယ်မှာ ရေကြီးမှုနောက်ဆက်တွဲ၊ ငှက်ဖျားအပြင် သွေးလွန်တုပ်ကွေးရောဂါဖြစ်ပွားသူတွေပါ ရှိနေပြီး မင်းပြားမြို့နယ် ဖုံသာချောင်း၊ ကျောက်တော်မြို့နယ် ယိုးချောင်းဒေသ၊ မြောက်ဦးမြို့နယ်နဲ့ အမ်းမြို့နယ်တို့မှာ ဖြစ်ပွားနေကာ လူ သေဆုံးမှုတွေပါ ရှိတယ်လို့ ဒေသခံတွေက ပြောပါတယ်။
လက်ရှိမှာ လူထုနွေဦးက မေးမြန်း၊ သိထားရတဲ့အချက်အလက်တွေအရ မင်းပြားမြို့နယ် ဖုံသာချောင်းဖျားဒေသမှ ၆ ဦး၊ မြောက်ဦးမြို့နယ် ဝေသာလီကျေးရွာမှ ၂ ဦးနဲ့ အမ်းမြို့နယ် ဒလက်ချောင်းဒေသမှ ၁ ဦးတို့ဟာ သွေးလွန်တုပ်ကွေးကြောင့် သေဆုံးခဲ့ရတယ်လို့ သိရပါတယ်။
AA ကျန်းမာရေးဌာနဟာ သွေးလွန်တုပ်ကွေးရောဂါကြိုတင်ကာကွယ်ရေးအတွက် မိုးရာသီမရောက်ခင်ကတည်း က ခြင်လောက်လန်းသတ်ဆေး(Abate)၊ ခြင်သတ်ဆေးတွေနဲ့ ကုသရေးအတွက် လိုအပ်တဲ့ ဆေးဝါးတွေ စုဆောင်း ထားခဲ့ပြီး Abate ဆေးခတ်တာ၊ ပညာပေးတာတွေ လုပ်နေခဲ့တယ်လို့ ဆိုပါတယ်။
ဘာကြောင့်ပဲဖျားဖျား နားလည်တတ်ကျွမ်းတဲ့ ကျန်းမာရေးဝန်ထမ်းတွေနဲ့ ပြသပြီး နှာခေါင်းသွေးယိုတာ၊ အစားအ သောက်မဝင်ဘဲ ဆက်တိုက်အန်တာ၊ အညိုအမဲအဖတ်တွေ အန်တာ၊ ဂနာမငြိမ်ဖြစ်တာ၊ အဖျားကျပေမယ့် ခြေ ဖျားလက်ဖျား အေးစက်နေတာ စတဲ့လက္ခဏာတွေ ကြုံလာရင် အချိန်မီ ဆေးရုံတက်ကုသမှုခံယူကြဖို့လည်း AA ကျန်းမာရေးဌာနက တိုက်တွန်းထားပါတယ်။
