အာဏာသိမ်း စစ်ခေါင်းဆောင် ဗိုလ်မှူးကြီး အာဆီမီ ဂွိုင်တာက သမ္မတ ဘားဟ်ဒေါနဲ့ ဝန်ကြီးချုပ် မော့တား အူဝါနီတို့ကို ရာထူးက ဖယ်ရှားလိုက်ကြောင်း အတည်ပြုခဲ့ပါတယ်။ ဂွိုင်တာဟာ လွန်ခဲ့တဲ့ ၉ လက အာဏာသိမ်း စစ်တပ်ကို ဦးဆောင်ခဲ့ပြီး အသစ်ပြန်ဖွဲ့တဲ့ အစိုးရမှာ ဒုတိယ သမ္မတအဖြစ် တာဝန် ယူနေခဲ့ပါတယ်။
အခုတော့ သမ္မတနဲ့ ဝန်ကြီးချုပ်က ပေးထားတဲ့ နိုင်ငံရေး ကတိတွေကို ပြည့်မြောက်အောင် မဆောင်ရွက်နိုင်တာကြောင့် အာဏာသိမ်းလိုက်တာလို့ ဂွိုင်တာက ပြောပါတယ်။ အစိုးရ အဖွဲ့ကို ပြင်ဆင် ပြောင်းလဲပြီး စစ်ဘက် ထိပ်တန်း အရာရှိ နှစ်ဦး လူအပြောင်းအလဲ လုပ်ခံရပြီး မကြာခင်မှာပဲ အာဏာသိမ်းမှု ဖြစ်လာတာပါ။
ဂွိုင်တာက သူဟာ လတ်တလော အာဏာ သိမ်းလိုက်ပေမယ့် မာလီ ရွေးကောက်ပွဲကိုတော့ ကြိုတင် စီစဉ်ထားတဲ့အတိုင်း လာမယ့်နှစ်မှာ ကျင်းပသွားမယ်လို့ ပြောပါတယ်။ ကုလသမဂ္ဂ၊ အာဖရိက သမဂ္ဂ၊ အနောက်အာဖရိက စီးပွားရေး အသိုက်အဝန်း၊ ဥရောပ သမဂ္ဂနဲ့ အမေရိကန် ပြည်ထောင်စုတို့က မာလီ သမ္မတနဲ့ ဝန်ကြီးချုပ်ကို ပြန်လွှတ်ပေးဖို့ တောင်းဆိုနေတာကိုတော့ ဂွိုင်တာက ငြင်းပယ်သွားပါတယ်။
လောလောဆယ်တော့ သမ္မတရော၊ ဝန်ကြီးချုပ်ကိုပါ မြို့တော် ဘာမာကိုနားက စစ်စခန်း တစ်ခုမှာ ထိန်းသိမ်းထားတယ်လို့ သိရပါတယ်။ မနှစ်က စစ်တပ် အာဏာသိမ်းမှု အပြီးမှာတော့ ဂွိုင်တာက ရွေးကောက်ပွဲ မကျင်းပခင် ကြားဖြတ် ယာယီ အစိုးရ တစ်ခုကို ၁၈ လ တာဝန်ယူစေဖို့ သဘောတူခဲ့ပြီး အဲဒီမှာ ဒုတိယ သမ္မတ ဖြစ်လာပါတယ်။
သူဦးဆောင်တဲ့ စစ်တပ်ဟာ ပြည်တွင်းမှာ လူကြိုက်နည်းနေတဲ့ သမ္မတ အီဘရာဟင်မ် ဘူဘာကာ ကီတာရဲ့ အစိုးရဆီက အာဏာသိမ်းလိုက်တော့ ပြည်သူတွေ အောင်ပွဲခံခဲ့ကြပါသေးတယ်။ ဒါပေမဲ့ နောက်ပိုင်းမှာ စစ်တပ်က အာဏာ ဆက်လက် ဆုပ်ကိုင်ထားတဲ့အပေါ် ပြည်တွင်းမှာ ဆန့်ကျင်မှုတွေ ပြင်းထန်လာခဲ့ပါတယ်။
သတင်းတွေအရ မာလီ အစိုးရဟာ စစ်ဘက် အရာရှိကြီးတွေကို အပြောင်းအလဲ လုပ်ခဲ့တာနဲ့ ပတ်သက်ပြီး ဂွိုင်တာနဲ့ ပြဿနာ ဖြစ်ခဲ့တယ်လို့ သိရပါတယ်။ မာလီနိုင်ငံကို ကိုလိုနီအဖြစ် အုပ်ချုပ်ခဲ့ဖူးတဲ့ ပြင်သစ် အစိုးရကတော့ လက်ရှိ ပြဿနာကို အာဏာသိမ်းမှု တစ်ခုထဲက အာဏာသိမ်းမှု နောက်တစ်ခုလို့ သုံးနှုန်းထားပါတယ်။