ဝေဖန်မှုတွေ ရှိနေပေမယ့် ပြည်တွင်းဖြစ် Covid-19 ကာကွယ်ဆေးကို ထိုင်ဝမ်မှာ စတင် ထိုးနှံပေးနေကြောင်း သိရပါတယ်။
ကျွန်းနိုင်ငံလေးရဲ့ ကျန်းမာရေး ဝန်ကြီးဌာနက Medigenရဲ့ ကာကွယ်ဆေးကို အရေးပေါ် အခြေအနေတွေမှာ အသုံးပြုဖို့ ပြီးခဲ့တဲ့လမှာ ခွင့်ပြုပေးခဲ့ပါတယ်။ ကာကွယ်ဆေးအတွက် လက်တွေ့ စမ်းသပ်မှုတွေ မပြီးဆုံးသေးတဲ့ အချိန်မျိုးမှာ အခုလို အရေးပေါ် သုံးစွဲစေလိုက်တာ ဖြစ်ပါတယ်။
ထိုင်ဝမ်ဟာ နိုင်ငံခြား ကာကွယ်ဆေးတွေ မှာယူပြီး ပြည်တွင်းမှာ ကျယ်ကျယ်ပြန့်ပြန့် ထိုးနှံပေးဖို့ စီစဉ်ခဲ့ပေမယ့် နှောင့်နှေးမှုတွေနဲ့ တခြား အခက်အခဲတွေ ရင်ဆိုင်နေရပါတယ်။ အခုအခါမှာတော့ Medigenရဲ့ ပြည်တွင်းဖြစ် ကာကွယ်ဆေးကို ဩဂုတ် ၂၃ ရက်ကစပြီး နိုင်ငံသားတွေကို ထိုးနှံပေးနေပြီလို့ သိရပါတယ်။
ဒီဆေးကို လက်တွေ့ စမ်းသပ်မှုတွေ မပြီးဆုံးသေးဘဲ၊ သိပ္ပံနည်းကျ အချက်အလက်တွေ အတည်မပြုနိုင်သေးဘဲ ထိုးခွင့် ပြုလိုက်တဲ့အပေါ် ဝေဖန်မှုတွေ ထွက်ပေါ်နေပါတယ်။ ဒါပေမဲ့ ထိုင်ဝမ် အာဏာပိုင်တွေကတော့ Medigenရဲ့ ဆေးကြောင့် ဆိုးရွားတဲ့ ဘေးထွက်ဆိုးကျိုးမျိုး မရှိနိုင်ဘူးလို့ ကာကွယ် မှတ်ချက် ပေးထားပါတယ်။
နိုင်ငံသားတွေက ဆေးအပေါ် ယုံကြည်မှု ရှိစေဖို့အတွက် ထိုင်ဝမ် သမ္မတ ဆိုင်အင်ဝမ် ကိုယ်တိုင် ဆေးအထိုးခံပြခဲ့တာကိုလည်း တွေ့ရပါတယ်။ Medigenရဲ့ ကာကွယ်ဆေးကို နောက်ဆုံးအဆင့် စမ်းသပ်မှုတွေ ပြုလုပ်နေပေမယ့် သတ်မှတ် စံနှုန်းမျိုးထိ ပြည့်ပြည့်ဝဝ လက်တွေ့ မစမ်းသပ်ရသေးပါဘူး။
ဒီဆေးဟာ Novovaxက ထုတ်လုပ်တဲ့ ဆေးလိုပဲ Recombinant Protein နည်းပညာကို အသုံးပြု ထုတ်လုပ်ထားတာပါ။ ထိုင်ဝမ်မှာ Medigenဆေးကို ထိုးနှံဖို့ စာရင်းပေးထားသူ ၇ သိန်းကျော် ရှိနေပါပြီ။ ဒီဆေးဟာ ၂၈ ရက်ခြားပြီး ၂ ကြိမ် ထိုးနှံဖို့ လိုအပ်ကြောင်းလည်း သိရပါတယ်။