ရုရှားနိုင်ငံက တက္ကသိုလ် တစ်ခုမှာ ပစ်ခတ်မှု ဖြစ်ပွားပြီး အနည်းဆုံး လူ ၆ ဦး သေဆုံးခဲ့ကြောင်း သိရပါတယ်။
စက်တင်ဘာ ၂၀ က ပမ်းမြို့မှာရှိတဲ့ တက္ကသိုလ်ဝင်းထဲ သေနတ်သမား တစ်ဦးက ဝင်ရောက် ပစ်ခတ်ခဲ့တာပါ။ ဒီဖြစ်စဉ်ကြောင့် အနည်းဆုံး ၆ ဦးသေပြီး ၂၈ ဦးထက်မနည်း ဒဏ်ရာတွေ ရခဲ့ပါတယ်။ တချို့ သတင်းဌာနတွေကတော့ အသေအပျောက် စာရင်းကို ၈ ဦးလို့ ဖော်ပြခဲ့ပါတယ်။
သေနတ်သမားတစ်ယောက် ဝင်ရောက် ပစ်ခတ်နေတယ်ဆိုတဲ့ သတင်းကြောင့် စာသင်ခန်းတွေထဲမှာ ကျောင်းသူကျောင်းသားတွေနဲ့ ဆရာ ဆရာမတွေက အလုံပိတ် ပုန်းအောင်းနေခဲ့ရပါတယ်။ တချို့ ကျောင်းသူကျောင်းသားတွေဟာ ပြတင်းပေါက်တွေကနေ ကျော်ခွပြီး ထွက်ပြေးနေကြပုံ ဗီဒီယိုတွေလည်း လူမှုကွန်ရက် မီဒီယာတွေမှာ ပျံ့နှံ့ခဲ့ပါတယ်။
လုံခြုံရေး တပ်ဖွဲ့တွေက သေနတ်သမားနဲ့ ထိပ်တိုက်ရင်ဆိုင် အပြန်အလှန် ပစ်ခတ်ပြီး လက်ရ ဖမ်းဆီးနိုင်ခဲ့ကြောင်း သိရပါတယ်။ တရားခံဟာ သေနတ်တစ်လက်နဲ့ ဓားတစ်ချောင်း ယူဆောင်လာတယ်လို့ ရဲတွေက ပြောပါတယ်။
Public Service Announcement
ရုရှားသမ္မတ ဗလာဒီမာ ပူတင်က အခု ပစ်ခတ်မှုမှာ ဆုံးရှုံးခဲ့ရတဲ့ အသက်တိုင်းဟာ ကျန်ရစ်သူ မိသားစုတွေတင် မကဘဲ တစ်နိုင်ငံလုံးရဲ့ ဆုံးရှုံးမှုလို့ သတ်မှတ်နိုင်ကြောင်း ထုတ်ပြန်ခဲ့ပါတယ်။ တက္ကသိုလ်ထဲ ဝင်ရောက် ပစ်ခတ်ခဲ့တဲ့ သေနတ်သမားရဲ့ ရည်ရွယ်ချက်ကိုတော့ ရှင်းရှင်းလင်းလင်း မသိရသေးပါဘူး။
ဒါပေမဲ့ အခုကိစ္စကို တစ်ကိုယ်တော် ကျူးလွန်ခဲ့ကြောင်း၊ နိုင်ငံရေးနဲ့ ဘာသာရေး အစွန်းရောက် ဝါဒစွဲ ဘာတစ်ခုမှ မရှိကြောင်း သေနတ်သမားက ရဲတွေဆီ ကနဦး ထွက်ဆိုထားတယ်လို့ ရုရှား မီဒီယာတွေက ဖော်ပြကြပါတယ်။
ရုရှားတက္ကသိုလ်တွေရဲ့ လုံခြုံရေးဟာ အခုနှစ်ထဲမှာ စိုးရိမ်စရာ အခြေအနေ တချို့နဲ့ ကြုံလာရပါတယ်။ နှစ်ဆန်းပိုင်းကလည်း ကာဇန်မြို့မျာ အသက် ၁၉ နှစ်အရွယ် လူငယ်တစ်ဦးရဲ့ ပစ်ခတ်မှုကြောင့် လူ ၁၉ ဦး အသက်ဆုံးရှုံးခဲ့ရပါတယ်။
