ကပ်ရောဂါ ထိန်းချုပ်ရေးအတွက် ပိုမိုတင်းကျပ်တဲ့ အစီအမံသစ်တွေကို ကြေညာရင်း နယူးဇီလန် ဝန်ကြီးချုပ်ဟာ ကိုယ့်မင်္ဂလာပွဲကိုပါ ဖျက်သိမ်းခဲ့ပါတယ်။
နယူးဇီလန်မှာ Omicronမျိုးကွဲ ကိုရိုနာဗိုင်းရပ်စ် ကူးစက်မှုတွေ မြင့်တက်လာတဲ့နောက် အစိုးရက ကပ်ရောဂါ ထိန်းချုပ်ရေး အစီအမံတွေကို အမြင့်ဆုံးအဆင့် သတ်မှတ် ထုတ်ပြန်ခဲ့ပါတယ်။ အဲဒီ သတ်မှတ်ချက်တွေထဲမှာ ကာကွယ်ဆေး ထိုးထားသူတွေသာ လူ ၁၀၀ ထက် မပိုတဲ့ စုဝေးခွင့်မျိုး ပြုထားပြီး အများပြည်သူ သယ်ယူပို့ဆောင်ရေး ကွန်ရက်တွေ၊ စျေးဝယ်စင်တာတွေမှာ မဖြစ်မနေ နှာခေါင်းစည်း ဝတ်ဆင်ရမယ် ဆိုတာမျိုးတွေ ပါဝင်နေပါတယ်။
နယူးဇီလန်ဟာ ကိုဗစ်ကို အအောင်မြင်ဆုံး ထိန်းချုပ်နိုင်တဲ့ နိုင်ငံတွေထဲက တစ်ခု အနေနဲ့ ရပ်တည်ခဲ့ဖူးပါတယ်။ ဒါတောင်မှ ရောဂါ ကူးစက် ခံရသူ ၁၅၀၀၀ ကျော်ရှိပြီး ၅၀ ကျော် သေဆုံးခဲ့ပါတယ်။ နယူးဇီလန် ဝန်ကြီးချုပ် ဂျက်ဆင်ဒါ အားဒန်က ရောဂါတားဆီးရေး အစီအမံသစ်တွေ တင်းကျပ်ကြောင်း ကြေညာပြီးတဲ့နောက် ကြိုတင် စီစဉ်ထားတဲ့ သူ့မင်္ဂလာပွဲကိုလည်း ဖျက်လိုက်ကြောင်း သတင်းထောက်တွေဆီ အတည်ပြု အသိပေးသွားပါတယ်။
အားဒန်ဟာ ရုပ်မြင်သံကြား အစီအစဉ်မှူး ကလာ့ခ်ဂေးဖို့ဒ်နဲ့ စေ့စပ်ထားပြီး သမီးလေးတစ်ဦး ဖွားမြင်ထားပါတယ်။ အားဒန်က စည်းမျဉ်းတွေနဲ့ ပတ်သက်ရင် အခွင့်ထူးခံပြီး သူလည်း ကင်းလွတ်လို့တော့ မရကြောင်း၊ သူ့ထက်ပိုပြီး ဒုက္ခရောက်နိုင်တဲ့ နယူးဇီလန်ပြည်သူ ထောင်သောင်းချီ များပြားနိုင်ကြောင်း၊ ပြီးတော့ ကိုယ်ချစ်တဲ့သူတွေ အပြင်းအထန် ဖျားနာလို့ အကြီးအကျယ် စိတ်ထိခိုက် ပူပင်နေရသူတွေနဲ့ ယှဉ်ရင် သူ့မင်္ဂလာပွဲ ဖျက်လိုက်တာက ဘာမှ မပြောပလောက်ကြောင်း အားဒန်က မှတ်ချက် ပေးခဲ့ပါတယ်။
Public Service Announcement
နယူးဇီလန်မှာ အသစ်ကြေညာလိုက်တဲ့ ကပ်ရောဂါ ထိန်းချုပ်ရေး အစီအမံတွေဟာ ဇန်နဝါရီ ၂၂ ရက် ညသန်းခေါင်မှာ စတင် အသက်ဝင်မှာ ဖြစ်ပါတယ်။ နယူးဇီလန် အစိုးရဟာ ကိုဗစ် ကူးစက်မှုတွေနဲ့ ပတ်သက်ရင် အတော်ကြီး တင်းတင်းကျပ်ကျပ် ကိုင်တွယ်ခဲ့ပါတယ်။ အကျိုးဆက် အနေနဲ့ စီးပွားရေး၊ လူမှုရေး ထိခိုက်မှုတွေ ရှိပေမယ့် သေပျောက်နှုန်းကိုတော့ အနိမ့်ဆုံး အဆင့်မျိုးထိ လျှော့ချထားနိုင်ခဲ့ပါတယ်။
