၆ လ ပျံသန်းခွင့် ဆိုင်းငံ့ခံထားရတဲ့ အမေရိကန် မဟာဗျူဟာ ဗုံးကြဲလေယာဉ်ကြီးတွေ ပုံမှန် စစ်ဆင်ရေးတွေ ပြန်စ

၆ လကြာအောင် ပျံသန်းခွင့် ဆိုင်းငံ့ခံထားရတဲ့နောက် အမေရိကန် လေတပ်ရဲ့ နာမည်ကျော် B-2 Spirit ကိုယ်ပျောက် ဗုံးကြဲ လေယာဉ်ကြီးတွေဟာ ပုံမှန် စစ်ဆင်ရေး တာဝန်တွေကို ပြန်လည် ထမ်းဆောင်နေပြီ ဖြစ်ပါတယ်။

ပြီးခဲ့တဲ့နှစ်၊ ဒီဇင်ဘာလတုန်းက မစ်ဇူရီ ပြည်နယ်မှာ ပုံမှန် လေ့ကျင့် ပျံသန်းမှု လုပ်ဆောင်နေချိန် B-2 ဗုံးကြဲလေယာဉ် တစ်စီးဟာ စက်ချွတ်ယွင်းမှုကြောင့် အရေးပေါ် ဆင်းသက်ခဲ့ရပါတယ်။ အဲဒီအချိန်မှာ ပြေးလမ်းနဲ့ ထိခိုက်မိတာကြောင့် မီးလောင်ပြီး လေယာဉ် အစိတ်အပိုင်း တချို့ ပျက်စီးခဲ့ပါတယ်။

အဲဒီဖြစ်စဉ်နောက်ပိုင်း အမေရိကန် လေတပ်ဟာ လုံခြုံရေးဆိုင်ရာ ပြန်လည် ဆန်းစစ်မှုတွေ လုပ်ဆောင်ဖို့အတွက် B-2 အားလုံးကို ပျံသန်းခွင့် ဆိုင်းငံ့ထားလိုက်တာ ဖြစ်ပါတယ်။ မေလ ၂၂ ရက်မှာတော့ B-2တွေ တကျော့ပြန် ပျံသန်းဖို့ ခွင့်ပြုလိုက်ပါတယ်။

B-2တွေဟာ ပြားချပ်ပြီး အမြင်ဆန်းတဲ့ ဒီဇိုင်း တည်ဆောက်မှုကြောင့် လူသိများပါတယ်။ ကမ္ဘာပေါ်မှာတော့ ရေဒါနဲ့ ထောက်လှမ်းမှုကို ရှောင်ကွင်းနိုင်တဲ့ မဟာဗျူဟာ ဗုံးကြဲလေယာဉ်တွေဟာ B-2 တစ်မျိုးတည်းသာ ရှိပါတယ်။ အမေရိကန် လေတပ်ဟာ ၁၉၉၇ ခုနှစ်မှာ စတင်တာဝန် ထမ်းဆောင်တဲ့ B-2 စုစုပေါင်း အစီး ၂၀ ကို ပိုင်ဆိုင်ထားပါတယ်။ အဲဒီ လေယာဉ်တွေဟာ ရန်သူ့ နယ်မြေထဲကို တိတ်တဆိတ် ဝင်ရောက်ပြီး ခရီးရှည် ပျံသန်းနိုင်သလို နျူကလီးယား လက်နက်တွေကိုလည်း ပစ်ခတ်နိုင်ပါတယ်။

Public Service Announcement

ပြီးခဲ့တဲ့ နှစ်မှာတော့ အမေရိကန် လေတပ်ဟာ B-2တွေကို အခြေခံပြီး နည်းပညာပိုင်းမှာ ဘက်ပေါင်းစုံ အဆင့်မြှင့်တင်ထားတဲ့ B-21 Raider ဗုံးကြဲလေယာဉ် အသစ်တွေကို မိတ်ဆက်ခဲ့ပါတယ်။ B-21တွေဟာ ခေတ်အမီဆုံး ဆဋ္ဌမမျိုးဆက် စာရင်းဝင် ပထမဆုံး လေယာဉ်တွေလို့ အမေရိကန်က ကြွေးကြော်ပြီး B-2တွေ နေရာမှာ ရေရှည် အစားထိုးသွားမယ်လို့ ကြေညာပါတယ်။

B-2တွေဟာ အမေရိကန် စစ်ရေးနည်းပညာ သမိုင်းကြောင်းမှာ အံ့ဩဘနန်း တီထွင်မှုတွေ ဖြစ်ခဲ့ပေမယ့် စရိတ်စက ကြီးမားတာတွေ၊ ပြုပြင်ထိန်းသိမ်းဖို့ ခက်ခဲတာတွေ အပါအဝင် စိန်ခေါ်မှု အများအပြားလည်း ရှိနေတာကြောင့် လေတပ်က အစီးရေ အမြောက်အမြား မှာယူမယ့် အစီအစဉ်ကို စွန့်လွှတ်ခဲ့တာ ဖြစ်ပါတယ်။