ယူကရိန်းအတွက် F-16 တိုက်လေယာဉ်တွေ ထောက်ပံ့ပေးမပေး တိတိကျကျ ဆုံးဖြတ်ဖို့ အမေရိကန် အစိုးရကို NATO အဖွဲ့ဝင် ဥရောပ နှစ်နိုင်ငံဖြစ်တဲ့ ဗြိတိန်နဲ့ ဂျာမနီတို့က ဖိအားပေး တောင်းဆိုခဲ့ပါတယ်။
ယူကရိန်း သမ္မတ ဗိုလိုဒီမာ ဇီလန်စကီးက အမေရိကန်လုပ် F-16 တိုက်လေယာဉ်တွေကိုသာ ရရှိခဲ့မယ်ဆိုရင် ရုရှားရဲ့ ကျူးကျော်စစ်ကို တွန်းလှန်ရာမှာ ယူကရိန်းအတွက် အားသာချက်တွေ အများကြီး ရရှိလာနိုင်လိမ့်မယ်လို့ ပြောကြားထားပါတယ်။
အမေရိကန် သမ္မတ ဂျိုးဘိုင်ဒန်ကတော့ ယူကရိန်းရဲ့ တောင်းဆိုချက်ဟာ စစ်ပွဲရဲ့ သဘောသဘာဝနဲ့ ယှဉ်ရင် လက်တွေ့ မကျဘူးလို့ မှတ်ချက် ပေးခဲ့သလို အမေရိကန်ကတော့ ယူကရိန်းဆီ F-16တွေ တိုက်ရိုက် ထောက်ပံ့သွားမှာ မဟုတ်ဘူးလို့ အတည်ပြုထားပါတယ်။
ဒါပေမဲ့ ယူကရိန်းက ဒီကိစ္စကို NATO အဖွဲ့ဝင် နိုင်ငံတွေဆီ လက်မလျှော့စတမ်း တောင်းဆိုနေဆဲ ဖြစ်သလို ဥရောပ နိုင်ငံတွေက ဝယ်ယူထားတဲ့ F-16တွေကို ယူကရိန်းဆီ လွှဲပေးဖို့ကလည်း ဖြစ်နိုင်ခြေ ရှိနေဆဲပါ။ NATO နိုင်ငံတွေထဲက ပိုလန်နဲ့ ဆလိုဗက်ကီးယားတို့ဟာ ယူကရိန်း လေတပ်နဲ့ ရင်းနှီးကျွမ်းဝင်ပြီးသားဖြစ်တဲ့ ဆိုဗီယက်လုပ် MiG-29 တိုက်လေယာဉ်တွေ ပို့ဆောင်ခဲ့ပေမယ့် F-16တွေကတော့ နည်းပညာပိုင်းမှာ အများကြီး ပိုအဆင့်မြင့်ပါတယ်။
Public Service Announcement
မကြာသေးခင်မှာ ဗြိတိန်နဲ့ နယ်သာလန် ဝန်ကြီးချုပ်တွေက ယူကရိန်းအတွက် F-16တွေ ပံ့ပိုးနိုင်ရေး လက်တွေ့ အထမြောက်နိုင်မယ့် နိုင်ငံတကာ ပူးပေါင်းဆောင်ရွက်ရေး အင်အားစုတစ်ခု ပေါ်ထွန်းလာအောင် ဦးဆောင်သွားမယ်လို့ ကြေညာခဲ့သလို အခုအခါမှာလည်း ဂျာမနီ နိုင်ငံခြားရေးဝန်ကြီး ဘောရစ် ပစ္စတိုရီးရက်စ်နဲ့ ဗြိတိန် ကာကွယ်ရေးဝန်ကြီး ဘန်ဝေါလေ့စ်တို့က အမေရိကန် အစိုးရကို F-16တွေနဲ့ ပတ်သက်လို့ တိကျတဲ့ ဆုံးဖြတ်ချက် ချသင့်ပြီလို့ တိုက်တွန်းခဲ့ကြတာ ဖြစ်ပါတယ်။
အမေရိကန်ကိုယ်တိုင် F-16တွေ ယူကရိန်းဆီ မထောက်ပံ့ချင်ဘူး ဆိုရင်တောင် တခြားနိုင်ငံတွေက ပေးပို့နိုင်ခွင့် ရှိမရှိကို ဆုံးဖြတ်ပေးသင့်တယ်လို့ ကာကွယ်ရေး ဝန်ကြီးနှစ်ဦးက ဆိုပါတယ်။ ဗြိတိန်ရော၊ ဂျာမနီပါ F-16တွေ မပိုင်ကြတဲ့အတွက် ဒီကိစ္စမှာ အရမ်း တက်တက်ကြွကြွ မပါဝင်နိုင်ကြောင်း၊ လေယာဉ်တွေနဲ့ လေ့ကျင့်ရေး အစီအစဉ်တွေကို ယူကရိန်းဆီ တိုက်ရိုက် မထောက်ပံ့ပေးနိုင်ကြောင်း ဝေါလေ့စ်က မှတ်ချက်ပေးခဲ့ပါတယ်။
အမေရိကန် စစ်ဘက်ဆိုင်ရာ ကျွမ်းကျင်သူတွေကတော့ ယူကရိန်း စစ်ပွဲရဲ့ အခြေအနေမှာ F-16တွေရဲ့ အသုံးဝင်မှုက သိပ်ပြီး ထိရောက်မှာ မဟုတ်သလို ရုရှား လေကြောင်းကာကွယ်ရေး စနစ်တွေကိုလည်း ကျော်လွှားနိုင်မယ့် အလားအလာ မရှိလို့ အဆုံးအရှုံး များနိုင်ကြောင်း သတိပေးထားပါတယ်။
