မူဝါဒရေးရာ သဘောထား ကွဲလွဲမှုတွေကြောင့် ညွန့်ပေါင်း အစိုးရ ပြိုကွဲသွားတဲ့နောက် နယ်သာလန် ဝန်ကြီးချုပ် မတ်ရူတေးဟာ ရာထူးက နုတ်ထွက်ခဲ့ကြောင်း သိရပါတယ်။
ပါတီ ၄ ခု စုစည်းထားတဲ့ အာဏာရ ညွန့်ပေါင်း အစိုးရဟာ ရွှေ့ပြောင်း အခြေချမှု ပြဿနာတွေနဲ့ ပတ်သက်လို့ နက်နက်ရှိုင်းရှိုင်း သဘောထား ကွဲလွဲကြရာက ပြိုကွဲသွားခဲ့တာ ဖြစ်ပါတယ်။ ဝန်ကြီးချုပ် အပါအဝင် အစိုးရ တစ်ဖွဲ့လုံး နုတ်ထွက်မယ့် အခြေအနေကြောင့် နယ်သာလန်ဟာ နှစ်ကုန်ပိုင်းမှာ ရွေးကောက်ပွဲတွေ ပြန်လည် ကျင်းပဖို့ စီစဉ်ထားပါတယ်။
ဇူလိုင် ၈ ရက်က ဝန်ကြီးချုပ် ရူတေးဟာ နယ်သာလန် ဘုရင်ဆီ ရာထူးက နုတ်ထွက်စာ သွားရောက် တင်သွင်းခဲ့ပြီး ဘုရင် ဝီလမ် အလက်ဇန္ဒားကလည်း တော်ဝင် မိသားစုနဲ့အတူ ဂရိမှာ အပန်းဖြေ ခရီးထွက်နေရာက ပြန်လာခဲ့ပါတယ်။ ရူတေးကတော့ နန်းတော်ကို သူ့ကိုယ်ပိုင် Saab station wagon မော်တော်ကားကို ကိုယ်တိုင်မောင်းပြီး ရောက်လာခဲ့ပါတယ်။
ညွန့်ပေါင်း အစိုးရ ပြိုကွဲခဲ့တဲ့ အဓိက အကြောင်းရင်းကတော့ ပြီးခဲ့တဲ့ နှစ်ပိုင်းတွေအတွင်း ဥရောပ နိုင်ငံတွေမှာ ခေါင်းခဲစရာ ပြဿနာတွေ ဖြစ်ပေါ်စေခဲ့တဲ့ ရွှေ့ပြောင်း ဒုက္ခသည်ရေးရာ မူဝါဒတွေကြောင့်ပါပဲ။ ပါတီ ၄ ခုဟာ လူဝင်မှု ကြီးကြပ်ရေး မူဝါဒတွေနဲ့ ပတ်သက်လို့ အလေးအနက် ဆွေးနွေးခဲ့ကြပေမယ့် ဘယ်လိုမှ ညှိနှိုင်းဖို့ အဆင်မပြေတာကြောင့် အစိုးရအဖွဲ့ ပြိုကွဲခဲ့တာလို့ သိရပါတယ်။
Public Service Announcement
ဥပမာ ညွန့်ပေါင်း အစိုးရ အဖွဲ့ထဲမှာ ပါဝင်တဲ့ လွတ်မြောက်ရေး ပါတီဆိုရင် ရူတေးရဲ့ ခိုင်မာတဲ့ မဟာမိတ်အဖြစ် ရပ်တည်ခဲ့ပေမယ့် ရွှေ့ပြောင်းဒုက္ခသည်တွေကို အလုံးအရင်းနဲ့ လက်ခံဖို့ ကိစ္စကိုတော့ ဘယ်လိုမှ လက်မခံဘဲ တင်းတင်းမာမာနဲ့ ငြင်းဆိုထားပါတယ်။
အတိုက်အခံ ဆိုရှယ်လစ် ပါတီကတော့ ရာသီဥတု ဖောက်ပြန်ပြောင်းလဲမှု ဖြစ်စဉ်ကို ထိထိရောက်ရောက် တုံ့ပြန်နိုင်စွမ်း မရှိတဲ့၊ အိုးအိမ်စီမံကိန်းတွေ ဖူလုံအောင် ဆောင်ရွက်မပေးနိုင်တဲ့၊ စိုက်ပျိုးရေး နည်းပညာ ကဏ္ဍမှာ လစ်ဟင်းမှုတွေ ရှိခဲ့တဲ့ ညွန့်ပေါင်း အစိုးရ ပြိုကွဲသွားခြင်းက နိုင်ငံအတွက် သတင်းကောင်း ဖြစ်တယ်လို့ ပြောပါတယ်။
ရူတေးဟာ နယ်သာလန်ရဲ့ သက်တမ်း အရှည်ဆုံး ဝန်ကြီးချုပ် ဖြစ်ခဲ့ပြီး လာမယ့် ရွေးကောက်ပွဲမှာ ပါဝင်ယှဉ်ပြိုင်ရင်း သူဦးဆောင်တဲ့ စတုတ္ထမြောက် ညွန့်ပေါင်း အစိုးရသစ် တစ်ရပ်ကို ထပ်မံဖွဲ့စည်းဖို့ အားထုတ်သွားဖွယ် ရှိနေပါတယ်။
