ဘင်္ဂလားဒေ့ရှ် အလယ်ပိုင်းမှာ မဂ္ဂနီကျု ၅.၅ ငလျင်လှုပ်၊ အနည်းဆုံး ၆ ဦးသေ

ဘင်္ဂလားဒေ့ရှ် နိုင်ငံ အလယ်ပိုင်းမှာ မဂ္ဂနီကျု ၅.၅ အဆင့် ငလျင်တစ်ခု လှုပ်ခတ်ခဲ့ရာက အနည်းဆုံး ၆ ဦး သေဆုံးခဲ့ပြီး ဒဏ်ရာရသူတွေလည်း ရှိခဲ့ပါတယ်။

ပျက်စီးမှု အခြေအနေတွေကို အသေးစိတ် မသိရသေးပေမယ့် မြို့တော် ဒါကာ တဝိုက်က အဆောက်အအုံတချို့ ယိမ်းယိုင်ကုန်တယ်လို့ မျက်မြင်တွေက ဆိုပါတယ်။ နိုဝင်ဘာ ၂၁ ရက်နေ့ မနက်ပိုင်းက လှုပ်ခတ်ခဲ့တဲ့ ငလျင်ကြောင့် လူတွေလည်း အိမ်တွေ၊ တိုက်တွေဆီကနေ ထိတ်လန့်တကြား ထွက်ပြေးခဲ့ပါတယ်။

အမေရိကန် ငလျင်တိုင်းတာရေးဌာန (USGS)ရဲ့ အဆိုအရ ငလျင်ရဲ့ ဗဟိုချက်ဟာ ဒါကာမြို့တော်နဲ့ ၂၅ ကီလိုမီတာလောက်အကွာ နာဆင်ဒီ ဒေသထဲက ဂိုရာရှဲလ် ဧရိယာမှာလို့ သိရပါတယ်။ မြေအနက် ၁၀ ကီလိုမီတာလောက်ကို ဦးတည်တဲ့ မြေတိမ်ငလျင် အမျိုးအစား ဖြစ်တာကြောင့်လည်း မြေပြင်ပေါ်မှာ သက်ရောက်မှုက ပိုပြီး သိသာခဲ့ပါတယ်။

ငလျင်ရဲ့ ပြင်းအားကို အစောပိုင်းမှာ မဂ္ဂနီကျု ၅.၇ လို့ ကြေညာခဲ့ပေမယ့် နောက်တော့ ၅.၅ လို့ ပြင်ဆင် သတ်မှတ်ခဲ့ပါတယ်။

Public Service Announcement

ဒါကာမှာ ငလျင်ကြောင့် ၆ ဦး သေဆုံးစာရင်း ရထားပြီး အားလုံးလိုလိုက အဆောက်အအုံ အစိတ်အပိုင်းတွေ ပြိုကျမှုကြောင့် အသက်ဆုံးရှုံးခဲ့တာ ဖြစ်ပါတယ်။ ဒဏ်ရာရ စာရင်းကလည်း ဒါဇင်နဲ့ချီ များပြားနိုင်ကြောင်း ကယ်ဆယ်ရေးတွေက ပြောပါတယ်။ နောက်ပြီး ဆောက်လုပ်စ အဆောက်အအုံ တစ်ခုရဲ့ အစိတ်အပိုင်းတွေ ပြိုကျ ထိမှန်လို့ ဒဏ်ရာရသူတွေလည်း ရှိခဲ့ပါတယ်။

ငလျင်ရဲ့ သက်ရောက် လှုပ်ခတ်မှုကို ဘင်္ဂလားဒေ့ရှ် အရှေ့ဖျား ပြည်နယ်တွေနဲ့ အိမ်နီးချင်း အိန္ဒိယ နိုင်ငံကပါ ခံစားခဲ့ရပေမယ့် အဲဒီ နေရာတွေမှာတော့ ထိခိုက်သေကြေမှု သတင်း မကြားရပါဘူး။

ဘင်္ဂလားဒေ့ရှ်ဟာ အိန္ဒိယ၊ ယူရေးရှားနဲ့ ဘားမား မြေအောက် ကျောက်လွှာချပ်ကြီးတွေ စုဆုံတဲ့ နေရာမှာ တည်ရှိတာကြောင့် ငလျင်အန္တရာယ် စက်ကွင်းထဲမှာ ကျရောက်နေတဲ့ နိုင်ငံအဖြစ် သတ်မှတ်နိုင်ပါတယ်။ အဲဒီ ကျောက်လွှာချပ်ကြီးတွေဟာ နှစ်စဉ် စင်တီမီတာ နည်းနည်းစီလောက် ရွေ့လျားအောင် အချင်းချင်း တွန်းထိုးနေပြီး အကျိုးဆက်အဖြစ် တည်မြဲစွမ်းအင်ကို စုဆောင်းထားသလို ဖြစ်နေပါတယ်။ အဲဒီ စွမ်းအင်က မြေမျက်နှာပြင်ပေါ် ကန်ထွက်လာတဲ့ အခါမှာတော့ ငလျင်ကြီးတွေ လှုပ်ခတ်လေ့ ရှိပါတယ်။

ကိုးကား: Times of India