ဂျာမန်ရေတပ် သင်္ဘောတွေကို နှောင့်ယှက် ဖျက်ဆီးဖို့ ကြံစည်ခဲ့တယ်ဆိုတဲ့ စွပ်စွဲချက်အတွက် လူနှစ်ဦးကို ဖမ်းဆီးထားကြောင်း သိရပါတယ်။
အဲဒီ နှစ်ဦးဟာ စစ်သင်္ဘော တချို့ရဲ့ အီလက်ထရောနစ် လုံခြုံရေး ခလုတ်တွေကို ပိတ်ထားတာ၊ ဆီတိုင်ကီ အဖုံးတွေကို ဖွင့်ထားတာ၊ ဆီပိုက်လိုင်းတွေထဲ ရေလောင်းထည့်တာ၊ သင်္ဘောတစ်စီးရဲ့ အင်ဂျင်ထဲကို ကျောက်စရစ်ခဲ ၂၀ ကီလိုဂရမ်လောက် ကျုံးထည့်ထားတာတွေ လုပ်ခဲ့တယ်လို့ ဆိုပါတယ်။
အဲဒီကိစ္စတွေကို သတိသာ မထားမိလိုက်ဘူးဆိုရင် သင်္ဘောတွေကို အကြီးအကျယ် ထိခိုက်ပျက်စီးစေပြီး ဂျာမန်ရေတပ်သားတွေကိုပါ အန္တရာယ် ဖြစ်သွားစေနိုင်တယ်လို့ ဥရောပ သမဂ္ဂ (EU)ရဲ့ ရာဇဝတ်မှု စုံစမ်းရေးဌာန Eurojustက ထုတ်ပြန်ခဲ့ပါတယ်။
အဖမ်းခံရသူ နှစ်ဦးဟာ အသက် ၃၇ နှစ်အရွယ် ရိုမေးနီးယား နိုင်ငံသားနဲ့ အသက် ၅၄ နှစ်အရွယ် ဂရိနိုင်ငံသားတို့ ဖြစ်ပါတယ်။ သူတို့နှစ်ဦးဟာ ဟမ်းဘာ့ဂ် ဆိပ်ကမ်းမှာ အလုပ်လုပ်ကြပြီး မနှစ်တုန်းက ဂျာမန် ရေတပ်သင်္ဘောတွေကို အခုလို ပစ်မှတ်ထား ဖျက်ဆီးဖို့ ကြိုးစားခဲ့တာ ဖြစ်ပါတယ်။
Public Service Announcement
သူတို့နှစ်ဦးရဲ့ မိခင်နိုင်ငံတွေက ပူးပေါင်းကူညီပေးခဲ့တဲ့နောက် သံသယရှိသူ နှစ်ဦးကို ဖေဖော်ဝါရီ ၃ ရက်နေ့တုန်းက ဂျာမနီနဲ့ ဂရိနိုင်ငံတွေမှာ ဖမ်းမိခဲ့ကြောင်း Eurojustက ဆိုပါတယ်။
ဂျာမန် စစ်သင်္ဘောတွေကို ဘာကြောင့် အခုလို လုပ်ကြံဖျက်ဆီးဖို့ ကြံစည်ခဲ့ကြသလဲ ဆိုတာကိုတော့ ရှင်းရှင်းလင်းလင်း မသိရသေးဘဲ စုံစမ်းစစ်ဆေးမှုတွေ ဆက်လက် လုပ်ဆောင်နေပါတယ်။ ဥရောပတိုက် တနံတလျားမှာ ရုရှားအေးဂျင့်တွေ နှောင့်ယှက်ဖျက်ဆီးမှု စစ်ဆင်ရေးတွေ လုပ်ဆောင်မှာကို စိုးရိမ်မှုတွေ မြင့်တက်နေချိန်မှာ အခုကိစ္စနဲ့ ကြုံခဲ့ပေမယ့် ရုရှားလက်ချက်လို့တော့ ဂျာမနီက တပ်အပ် မစွပ်စွဲသေးပါဘူး။
၂၀၂၂ ခုနှစ်မှာ ယူကရိန်းကို ရုရှားက ကျူးကျော်စစ် ဆင်နွှဲခဲ့တဲ့နောက်ပိုင်း ဂျာမနီနဲ့ အနောက်ဥရောပ နိုင်ငံတွေဟာ ရုရှားလက်ချက်လို့ ယုံကြည်ရတဲ့ အနှောင့်အယှက်ပေးမှု ဖြစ်စဉ်တွေကို အရင်ကလည်း ကြုံတွေ့ခဲ့ဖူးပါတယ်။ ဥပမာ ဘောလ်တစ် ပင်လယ်ထဲက ရေအောက် ဆက်သွယ်ရေး ကြိုးလိုင်းတွေ ဖျက်ဆီးခံရတာ၊ စစ်စခန်းတွေနဲ့ လေဆိပ်တွေနားမှာ ဒရုန်းတွေ ပျံသန်းနေလို့ ပုံမှန် လုပ်ငန်းလည်ပတ်မှုတွေ နှောင့်နှေးတာမျိုး ဖြစ်ရပ်တွေ ပေါ်ပေါက်ခဲ့ပါတယ်။
ကိုးကား: BBC
