တရုတ်နိုင်ငံကို ဦးတည်တဲ့ ထုတ်လွှင့်မှုတွေ ပြန်စတင်နေပြီလို့ လွတ်လပ်တဲ့ အာရှအသံ (RFA) သတင်းဌာနက ပြောကြားခဲ့ပါတယ်။
အမေရိကန် အစိုးရက ကျောထောက်နောက်ခံ ပေးထားတဲ့ ရန်ပုံငွေနဲ့ လည်ပတ်တဲ့ သတင်းဌာနဟာ အမေရိကန် သမ္မတ ဒေါ်နယ်လ်ထရမ့်ရဲ့ ရန်ပုံငွေ ဖြတ်တောက် လျှော့ချမှုတွေကြောင့် မနှစ်က လုပ်ငန်းတွေ ရပ်နားခဲ့ရပါတယ်။
USAGMလို့ အတိုကောက် ခေါ်ဝေါ်တဲ့ အမေရိကန် ကမ္ဘာ့မီဒီယာ အေဂျင်စီဟာ RFAအပြင် အမေရိကန် အသံ (VOA)လို သတင်းဌာနတွေကို အမေရိကန် အစိုးရရဲ့ ရန်ပုံငွေ ခွဲတမ်းနဲ့ နှစ်ရှည်လများ ပံ့ပိုးပေးနေခဲ့တာ ဖြစ်ပါတယ်။ မနှစ်ကတော့ ထရမ့်က အသစ်ခန့်အပ်တဲ့ USAGM အမှုဆောင် အရာရှိချုပ် ကာရီလိတ်ခ်က အဲဒီ သတင်းဌာနတွေအတွက် ထောက်ပံ့ငွေတွေကို ရပ်ဆိုင်းပစ်ခဲ့ပါတယ်။ သူက အဲဒီ သတင်းဌာနတွေဟာ ထရမ့်ကို ဆန့်ကျင်တဲ့ တစ်ဖက်သတ် ဖော်ပြမှုတွေကို လုပ်ဆောင်ပြီး ပြည်သူတွေရဲ့ အခွန်ငွေတွေကို ဖြုန်းတီးနေတယ်လို့ စွပ်စွဲခဲ့ပါတယ်။
အစိုးရရဲ့ ရန်ပုံငွေ ဖြတ်တောက်မှုကြောင့် တရုတ်အပါအဝင် အမေရိကန်ရဲ့ ပြိုင်ဘက် နိုင်ငံတွေမှာ RFAရဲ့ သတင်းထုတ်လွှင့်မှုတွေ ရပ်ဆိုင်းခဲ့ရပြီး ဝန်ထမ်း အများအပြားကိုလည်း ထုတ်ပယ်ခဲ့ရပါတယ်။
Public Service Announcement
ဖေဖော်ဝါရီ ၁၇ ရက်နေ့မှာတော့ RFAရဲ့ ဥက္ကဋ္ဌနဲ့ အမှုဆောင်ချုပ်ဖြစ်တဲ့ ဘေဖန်းက တရုတ်က သတင်းပရိသတ်တွေအတွက် မန်ဒရင်း၊ တိဘက်၊ ဟွေဂါ ဘာသာစကားတွေနဲ့ ထုတ်လွှင့်မှုတွေ ပြန်စနေပြီဆိုတာ ဂုဏ်ယူစွာ အသိပေးလိုကြောင်း LinkedInမှာ ရေးသားခဲ့ပါတယ်။
အခုလို လုပ်ငန်းတွေ ပြန်စနိုင်တာဟာ ပုဂ္ဂလိက စာချုပ် သဘောတူညီမှုနဲ့ ညှိနှိုင်းလုပ်ဆောင်တာလို့ ဖန်းက ပြောပေမယ့် အသေးစိတ်ကိုတော့ မှတ်ချက်မပေးခဲ့ပါဘူး။ ဒါပေမဲ့ RFAရဲ့ ကွန်ရက်ကို ရေရှည်တည်မြဲအောင် ပြန်တည်ဆောက်ဖို့ ဆိုရင်တော့ အမေရိကန် လွှတ်တော်က ခွင့်ပြုပေးတဲ့ ရန်ပုံငွေတွေ ပြန်လိုအပ်ကြောင်း သူက မှတ်ချက်ပေးခဲ့ပါတယ်။
အမေရိကန်ရဲ့ ပါတီနှစ်ခု ညှိနှိုင်းသဘောတူပြီး ဖေဖော်ဝါရီ လဆန်းမှာ ထရမ့်က လက်မှတ်ရေးထိုးခဲ့တဲ့ အသုံးစရိတ် အသစ်မှာတော့ RFA၊ VOA၊ တခြား အမေရိကန် ကျောထောက်နောက်ခံ ပေးထားတဲ့ သတင်းဌာနတွေအတွက် အသုံးပြုဖို့ ရန်ပုံငွေခွဲတမ်း ဒေါ်လာ ၆၅၃ သန်း ပါဝင်လာခဲ့ပါတယ်။
မနှစ်တုန်းက RFAရဲ့ တရုတ်ပြည်တွင်းကို ရည်ရွယ်ထုတ်လွှင့်မှုတွေ ရပ်ဆိုင်းသွားတာကို တရုတ် အစိုးရ မီဒီယာတွေက ချီးကျူး ကြိုဆိုခဲ့ပါတယ်။ လူ့အခွင့်အရေး အဖွဲ့တွေကတော့ RFAဟာ တရုတ်နဲ့ တခြား အာဏာရှင်ဆန်တဲ့ နိုင်ငံတွေမှာ ပြည်သူတွေ ကြုံနေရတဲ့ ဒုက္ခတွေကို နိုင်ငံတကာ အာရုံစိုက်မိလာအောင် မီးမောင်းထိုးပြနေတဲ့ မီဒီယာဖြစ်ပြီး လူ့အခွင့်အရေး ရှုထောင့်အရ RFAရဲ့ ထုတ်လွှင့်မှုတွေက အရေးတကြီး လိုအပ်တယ်လို့ ထောက်ပြထားပါတယ်။
ပြီးခဲ့တဲ့ သီတင်းပတ်တုန်းက RFA ပြောရေးဆိုခွင့်ရ ရိုဟစ် မာဟာဂျန်က သတင်းဌာန အနေနဲ့ တိဘက်၊ မြောက်ကိုရီးယားနဲ့ မြန်မာတို့မှာ ထုတ်လွှင့်မှုတွေ ပြန်လည် စတင်နိုင်ဖို့ အတွက်လည်း ပုဂ္ဂလိက ကုမ္ပဏီတွေနဲ့ စာချုပ်တွေ ချုပ်ဆိုထားနိုင်ပြီး ဖြစ်ကြောင်း ထုတ်ဖော် ပြောဆိုသွားခဲ့ပါတယ်။
ကိုးကား: Reuters
ဓာတ်ပုံ – Reuters
