ရုရှားရဲ့ ဆိုးရွားပြင်းထန်တဲ့ ညလုံးပေါက် တိုက်ခိုက်မှုတွေနဲ့ ကြုံခဲ့တဲ့နောက် ရုရှား သမ္မတ ဗလာဒီမာ ပူတင်ဟာ တစ်ကမ္ဘာလုံးအတွက် ခြိမ်းခြောက်မှုကြီး ဖြစ်လာနေပြီလို့ ယူကရိန်း သမ္မတ ဗိုလိုဒီမာ ဇီလန်စကီးက စွပ်စွဲ ပြောဆိုခဲ့ပါတယ်။
ဧပြီ ၁၅ ရက် ညပိုင်းနဲ့ ၁၆ ရက်နေ့ မနက်အစောပိုင်းက မြို့တော် ကိယက်ဗ် အပါအဝင် ယူကရိန်းရဲ့ ဒေသတချို့ကို ရုရှားက ဖြန့်ကျက်တိုက်ခိုက်ခဲ့တာကြောင့် လူ ၁၇ ဦးထက်မနည်း သေဆုံးခဲ့ပါတယ်။ ရုရှားရဲ့ ဒုံးကျည်တွေနဲ့ ဒရုန်းတွေကြောင့် ကိယက်ဗ်မှာတင် လူ ၄ ဦးထက်မနည်း အသက်ဆုံးရှုံးခဲ့တယ်လို့ မြို့တော်ဝန် ဗီတာလီ ကလစ်ချ်ကိုက ပြောပါတယ်။
ယူကရိန်း အရှေ့တောင်ပိုင်းမှာရှိတဲ့ ဒီနီပရိုမှာလည်း ရုရှားတိုက်ခိုက်မှုတွေကြောင့် လူနေအိမ်တွေ အတော်များများ ပျက်စီးခဲ့ပါတယ်။ အဲဒီ ညပိုင်းတိုက်ခိုက်မှုဟာ အခုနှစ်အတွင်း ရုရှားလက်ချက်ကြောင့် ယူကရိန်းမှာ အသေအပျောက် အများဆုံး တိုက်ခိုက်မှု အနေနဲ့လည်း မှတ်တမ်းဝင်လာခဲ့ပါတယ်။
International Four Freedomsဆုကို လက်ခံယူဖို့ နယ်သာလန် နိုင်ငံကို ရောက်နေတဲ့ ဇီလန်စကီးက ဒီတိုက်ခိုက်မှုမျိုးဟာ အခုမှ ကြုံလာတဲ့ အခြေအနေ မဟုတ်တော့ကြောင်း၊ ပူတင်ဟာ သူဘာလုပ်နေသလဲ ဆိုတာကို သူကိုယ်တိုင် ကောင်းကောင်း သိကြောင်း၊ သူ့ကို ဒုတိယ ကမ္ဘာစစ်ကာလ နာဇီတွေနဲ့ ကောင်းကောင်းကြီး နှိုင်းယှဉ်လို့ ရကြောင်း၊ နာဇီတွေနဲ့ တူညီတဲ့ နယ်ချဲ့ဝါဒမျိုး ပူတင်မှာ ရှိနေကြောင်း၊ နိုင်ငံတွေရဲ့ ကံကြမ္မာကို သူကပဲ ဆုံးဖြတ်ပေးတာမျိုး ပူတင်က လိုချင်နေကြောင်း စွပ်စွဲခဲ့ပါတယ်။
Public Service Announcement
ရုရှားဟာ စစ်လိုလားတဲ့ ဝါဒကို ဆီးရီးယားနဲ့ အာဖရိကမှာလည်း ပြသခဲ့ပြီး ဖြစ်ကြောင်း၊ ဒါတွေ အားလုံးဟာ တစ်ကမ္ဘာလုံးအတွက် တကယ့် ခြိမ်းခြောက်မှုကြီး ဖြစ်လာနေကြောင်း ဇီလန်စကီးက ပြောဆိုသွားပါတယ်။
ရုရှားရဲ့ တိုက်ခိုက်မှုကြောင့် ယူကရိန်း အရှေ့တောင်ပိုင်းမှာရှိတဲ့ မိုင်ကိုလာယစ်ဗ်နဲ့ ခါဆွန်တို့ အပါအဝင် မြို့တချို့မှာလည်း ဓာတ်အားတွေ ပြတ်တောက်ခဲ့ပါတယ်။
အဲဒီ တိုက်ခိုက်မှုနဲ့ ကြုံပြီးတဲ့ နောက်မှာတော့ ဇီလန်စကီးက မဟာမိတ် နိုင်ငံတွေ အနေနဲ့ ရုရှားအပေါ် စီးပွားရေး ဖိအားတွေ ထပ်မံ တိုးမြှင့်ပေးဖို့နဲ့ ယူကရိန်းအတွက် ကတိပြုထားတဲ့ အကူအညီတွေကို အမြန်ဆုံး ပေးပို့ကြဖို့လည်း လူမှုကွန်ရက်ပေါ်မှာ ရေးသား တောင်းဆိုခဲ့ပါသေးတယ်။
ကိုးကား: Independent
ဓာတ်ပုံ – AP, Reuters
