ဘယ်ဂျီယမ် အသင်းဟာ ဆီနီဂေါနဲ့ ပွဲစဉ်မှာ နှစ်ဂိုးအရှုံးနဲ့ နောက်က လိုက်ကစားခဲ့ရပြီး ပြဇာတ်ဆန်ဆန်ပဲ အနိုင်ယူပြီး ကမ္ဘာ့ဖလား ၁၆ သင်း ရှုံးထွက်အဆင့်ကို အောင်အောင်မြင်မြင် တက်လှမ်းနိုင်ခဲ့ပါတယ်။
အာဖရိကတိုက်ရဲ့ မာဂုဏ်ရှိတဲ့ အသင်းကောင်းတစ်ခုဖြစ်တဲ့ ဆီနီဂေါဟာ အခုပွဲမှာ ပုံစံကောင်းနဲ့ စတင်နိုင်ခဲ့ပြီး ဂိုးတွေ ဆက်တိုက် သွင်းခဲ့ပါတယ်။ ပွဲချိန် ၂၅ မိနစ်မှာ အစ္စမေးလ် ဆားရဲ့ ခေါင်းတိုက်ချက် တိုင်ထိထွက်လာတာကို ဟာဘစ်ဘ် ဒီအာရာက ထပ်ဆင့် ပိတ်သွင်းပြီး ဆီနီဂေါတို့ ပွဲကို ဦးဆောင်ခဲ့ပါတယ်။ ဒုတိယပိုင်း ပြန်စပြီး မကြာခင်မှာပဲ ခံစစ်ကြောင်းကနေ ကန်တင်ပေးလိုက်တဲ့ ဘောလုံးကို ဘယ်ဂျီယမ် နောက်ခံလူ နှစ်ယောက်ကြားကနေ ဖောက်ထွက်သွားတဲ့ ဆားက ရင်ဘတ်နဲ့ သပ်သပ်ရပ်ရပ် ထိန်းယူပြီး ကန်သွင်းခဲ့တာကြောင့် ဆီနီဂေါတို့ ဒုတိယဂိုး ထပ်ရသွားပါတယ်။ ဆီနီဂေါဟာ သုံးဂိုးပြတ်သွားလောက်တဲ့ အခွင့်အရေးမျိုး ရခဲ့ပေမယ့်လည်း အသုံးမချနိုင်ခဲ့ပါဘူး။
နှစ်ဂိုးရှုံးနေပြီးတဲ့ နောက်ပိုင်းမှာတော့ ဘယ်ဂျီယမ် အသင်းနည်းပြ ရူဒီဂါစီယာဟာ ကစားသမား အများအပြားကို အပြောင်းအလဲ လုပ်ခဲ့ပြီး တိုက်စစ်ကို ပိုဖွင့်ကစားခဲ့ပါတယ်။ တစ်ဖက်မှာလည်း ဆီနီဂေါဟာ ပွဲပြီးခါနီး ကစားအား ကျလာပြီး အဲဒီအတွက်လည်း ဒဏ်ခတ် ခံခဲ့ရပါတယ်။ ၈၆ မိနစ်မှာ ညာနောက်ခံလူ သောမတ်စ် မြူနီယာ အနိမ့်ဖြတ်ပို့တဲ့ ဘောလုံးကို ဘယ်ဂျီယံ အသင်းရဲ့ ဂိုးသွင်းအများဆုံး စံချိန်ရှင် ဝါရင့်တိုက်စစ်မှူးကြီး ရိုမဲလူ လူကာကူက အနီးကပ် ဝင်ပိတ်ပြီး ပထမ ချေပဂိုး ရယူပေးခဲ့ပါတယ်။ နောက်ထပ် ၃ မိနစ် အကြာမှာတော့ လီယန်ဒရို ထရော့ဆက်ဒ် ကန်တင်ပေးတဲ့ ဘောလုံးကို ကွင်းလယ်လူ ယူရီ တိုင်လစ္စမန်းက ခေါင်းတိုက်ပြီး နောက်ထပ် ချေပဂိုး ရသွားခဲ့ပြန်ပါတယ်။
နှစ်ဂိုးစီ သရေကျနေခဲ့တဲ့နောက် အချိန်ပို မိနစ် ၃၀ ဆက်ကစားပြီး နှစ်သင်းစလုံး အခွင့်အရေးတချို့ ရခဲ့ပေမယ့် လွဲချော်ခဲ့ကြပါတယ်။ ဂိုးထပ်မရနိုင်တော့လို့ ပင်နယ်တီ အဆုံးအဖြတ် ခံယူရတော့မယ်လို့ ယူဆနေချိန်မှာပဲ ဘယ်ဂျီယမ်တို့ ပင်နယ်တီ ရခဲ့ပါတယ်။ ဆီနီဂေါ နောက်တန်းက တိုင်လစ္စမန်းကို အဖျက်ကြမ်းခဲ့ကြောင်း ကွင်းလယ်ဒိုင်က ဗီဒီယို အနှေးပြကွက် (VAR) ပြန်ကြည့်ပြီး အတည်ပြုခဲ့တဲ့နောက် ဘယ်ဂျီယမ်အတွက် ပင်နယ်တီ ကန်ခွင့် ပေးခဲ့တာပါ။ အဲဒီ ပင်နယ်တီကို တိုင်လစ္စမန်း ကိုယ်တိုင်ပဲ အမှားအယွင်းမရှိ ကန်သွင်းခဲ့တာကြောင့် ဘယ်ဂျီယမ်တို့ သုံးဂိုး-နှစ်ဂိုးနဲ့ အနိုင်ရပြီး နောက်တစ်ဆင့်ကို အောင်အောင်မြင်မြင် တက်လှမ်းခဲ့ပါတယ်။ ကွန်ဂိုကတော့ အစကောင်းပေမယ့် အနှောင်းမသေချာခဲ့တာကြောင့် ၃၂ သင်း ရှုံးထွက် အဆင့်မှာတင် ကမ္ဘာ့ဖလားကို လက်ပြ နှုတ်ဆက်သွားရပါတယ်။
Public Service Announcement
ဘယ်ဂျီယမ် အသင်းဟာ ၁၆ သင်းရှုံးထွက်အဆင့်မှာတော့ အမေရိကန်-ဘော့စ်နီးယား ပွဲစဉ်ကနေ အနိုင်ရလာတဲ့ အသင်းနဲ့ ယှဉ်ပြိုင်သွားရမှာ ဖြစ်ပါတယ်။
ကိုးကား: FIFA
