ပျောက်ဆုံးနေတဲ့ ရေတပ်သား တစ်ဦးကို ကူညီ ရှာဖွေပေးဖို့ တောင်ကိုရီးယားက မြောက်ကိုရီးယားဆီ ဆက်သွယ် အကူအညီ တောင်းခံထားကြောင်း သိရပါတယ်။
ဂျပန် ပင်လယ်ပြင်မှာ လုံခြုံရေး တာဝန်တစ်ခု ထမ်းဆောင်နေတဲ့ တောင်ကိုရီးယား ရေတပ် သင်္ဘောတစ်စီးပေါ်က အမှုထမ်း တစ်ဦးဟာ ဇူလိုင် ၁၂ ရက် မနက်ပိုင်းက ပျောက်ဆုံးသွားခဲ့ပါတယ်။ သူဟာ ပင်လယ်ပြင်မှာ မျောပါပြီး ကိုရီးယား နှစ်နိုင်ငံကြား ရေပိုင်နက် ပိုင်းခြား သတ်မှတ်ထားရာ မြောက်ပိုင်းကန့်သတ်လိုင်း (NLL)ကို ကျော်ပြီး မြောက်ကိုရီးယားဖက် ရောက်သွားတယ်လို့ ယူဆရပါတယ်။
ဒါကြောင့်လည်း တောင်ကိုရီးယား အစိုးရရဲ့ ကိုရီးယားနှစ်နိုင်ငံ ပူးပေါင်းဆောင်ရွက်ရေး ဝန်ကြီးဌာနက မြောက်ကိုရီးယားဆီ ဆက်သွယ်ပြီး အဲဒီ ရေတပ်သားကို ကူညီရှာဖွေပေးဖို့နဲ့ တွေ့ရှိရင်လည်း ပြန်လည် လွှဲပြောင်းပေးဖို့ အကူအညီ တောင်းခံခဲ့တာ ဖြစ်ပါတယ်။
တောင်ကိုရီးယား ရေတပ်ကလည်း ပျောက်ဆုံး သင်္ဘောသားကို လိုက်ရှာနေသလို လူသားချင်း စာနာမှု ရှုထောင့်ကနေ ကူညီပေးဖို့ မြောက်ကိုရီးယားကိုလည်း အကူအညီ တောင်းခံထားတယ်လို့ ဝန်ကြီးဌာန ထုတ်ပြန်ချက်မှာ ဖော်ပြထားခဲ့ပါတယ်။
Public Service Announcement
အောက်ခြေအဆင့် စစ်မှုထမ်း တစ်ဦးဖြစ်တဲ့ အဲဒီ ရေတပ်သားကို အစွမ်းကုန် လိုက်ရှာဖို့လည်း တောင်ကိုရီးယား ကာကွယ်ရေးဝန်ကြီး အန်ဂျူဘဲ့က အမိန့်ပေးထားပါတယ်။
တောင်ကိုရီးယား သမ္မတ လီဂျေမြောင်ဟာ မြောက်ပိုင်းမှာရှိတဲ့ ပြိုင်ဘက် ကွန်မြူနစ် နိုင်ငံနဲ့ ဆက်ဆံရေးကို ပြန်လည် ကောင်းမွန်လာစေဖို့ ကြိုးစားနေပါတယ်။ တစ်ဖက်မှာတော့ မြောက်ကိုရီးယားဟာ အဲဒီ အားထုတ်မှုတွေကို အကြိမ်ကြိမ် ပယ်ချထားသလို တောင်ကိုရီးယားကို ရန်သူနိုင်ငံအဖြစ် အတိအလင်း သတ်မှတ်ထားဆဲ ဖြစ်ပါတယ်။
ကိုးကား: AFP
