ကမ္ဘာ့ဖလား ဘောလုံးပြိုင်ပွဲ ဗိုလ်လုပွဲရဲ့ ပထမပိုင်းအပြီး နားချိန်ဟာ ၂၅ မိနစ်လောက်ထိ ကြာမြင့်ဖွယ် ရှိကြောင်း သိရပါတယ်။
နယူးယောက် နယူးဂျာစီ ကွင်းကြီးမှာ ဇူလိုင် ၁၉ ရက်နေ့ကျရင် ယှဉ်ပြိုင်မယ့် ပွဲစဉ်ရဲ့ ပထမပိုင်း အပြီးမှာ မက်ဒေါနား၊ ရှာကီရာ၊ ဂျက်စတင်ဘီဘာနဲ့ KPop အမျိုးသား ဂီတအဖွဲ့ BTSတို့ရဲ့ ဖျော်ဖြေမှုတွေကို ထည့်သွင်း စီစဉ်ထားတာကြောင့် ပုံမှန် ၁၅ မိနစ် နားချိန်ထက် ပိုကြာမယ့် အလားအလာ ရှိနေပါတယ်။
တိတိကျကျ မထုတ်ပြန်ထားပေမယ့် အဲဒီနားချိန်ဟာ မိနစ် ၂၀ ကနေ ၂၅ မိနစ်ကြားလောက်ထိ ကြာမြင့်ဖွယ်ရှိပြီး ဖျော်ဖြေပွဲ အစီအစဉ်အတွက် ၁၁ မိနစ် အချိန် သတ်မှတ် လျာထားပါတယ်။
ဒါဟာ နိုင်ငံတကာ ဘောလုံး အဖွဲ့ချုပ် ဘုတ်အဖွဲ့က သတ်မှတ်ထားတဲ့ ‘ကစားသမားတွေဟာ ပွဲတစ်ဝက် နားချိန်ကို ၁၅ မိနစ်ထက် ပိုမယူသင့်ဘူး’ဆိုတဲ့ သတ်မှတ်ချက်နဲ့ ကွဲလွဲနေပါတယ်။
Public Service Announcement
ကမ္ဘာ့ဖလားနည်းတူ ကမ္ဘာ့ဘောလုံး အဖွဲ့ချုပ် (ဖီဖာ)ကပဲ ကြီးမှူးပြီး မနှစ်တုန်းက နယူးဂျာစီမှာ ကျင်းပခဲ့တဲ့ ကမ္ဘာ့ ကလပ်အသင်းများ ဖလားပြိုင်ပွဲ ဗိုလ်လုပွဲတုန်းကလည်း ကိုးလ်ပလေး၊ ဂျေဘယ်လ်ဗင်၊ ဒိုဂျာကတ်၊ တမ်စ်နဲ့ အီမန်နျူရယ် ကယ်လီတို့ရဲ့ ဖျော်ဖြေမှုတွေကြောင့် ၂၄ မိနစ်ထိ ကြာမြင့်ခဲ့ပါတယ်။
ကမ္ဘာ့ဖလား ဗိုလ်လုပွဲနဲ့အတူ ပြိုင်ပွဲရဲ့ ပိတ်ပွဲအခမ်းအနားကိုပါ ကျင်းပမှာ ဖြစ်ပြီး အိမ်ရှင်နိုင်ငံ အမေရိကန်ရဲ့ နိုင်ငံတော် သီချင်းကို ဂျနီဖာ ဟတ်ဒ်ဆန်က ဂုဏ်ပြု သီဆိုမယ်လို့ သိရပါတယ်။ နောက်ပြီး ပိတ်ပွဲနေ့ ဖျော်ဖြေပွဲ အစီအစဉ်တွေမှာတော့ တွမ်ခရုစ်၊ လော်ရာ ပေါ်ဆီနီ၊ နစ်ကိုးလ် ရှာဇင်ဂါ၊ ရော်ဘီဝီလျံစ်တို့လည်း ပါဝင် ဖျော်ဖြေကြဖို့ စီစဉ်ထားပါတယ်။
စပိန်အသင်းဟာ ကမ္ဘာ့ဖလား ဗိုလ်လုပွဲစဉ်ကို တက်လှမ်းထားနိုင်ပြီး နောက်ထပ် တစ်နေရာစာ အတွက်ကိုတော့ အင်္ဂလန်နဲ့ အာဂျင်တီးနားတို့က အပြိုင်လုကြရတော့မှာ ဖြစ်ပါတယ်။
ကိုးကား: BBC
