တရုတ်ရဲ့ တိဘက်ကုန်းမြင့် ဒေသနဲ့ နီပေါနိုင်ငံ နယ်စပ်နားမှာ ရုတ်တရက် အကြီးအကျယ် ရေကြီးမှုကြောင့် ကမ္ဘာ့လှည့် ခရီးသွားတွေ အပါအဝင် လူပေါင်း ရာနဲ့ချီ ပျောက်ဆုံးနေပါတယ်။
ဩဂုတ် ၂၆ ရက် မနက်ပိုင်းတုန်းက ဟိမဝန္တာ တောင်တန်းတွေနဲ့ ထိစပ်နေတဲ့ နယ်စပ်ဧရိယာနားမှာ ရုတ်တရက် ရေလှိုင်းလုံးကြီးတွေ ဝင်ရောက် ရိုက်ခတ်ခဲ့တာ ဖြစ်ပါတယ်။ အိမ်တွေအများအပြား ရေစီးနဲ့ မျောပါသွားခဲ့သလို လမ်းတွေလည်း ပျက်စီးကုန်ကြောင်း မျက်မြင်တွေက ပြောပါတယ်။
နီပေါဖက်မှာ သေဆုံးသူ ၁၇ ဦးလောက် စာရင်းရထားပြီး အိန္ဒိယ နိုင်ငံသား ၁၀၀ ကျော်လောက် အပါအဝင် လူပေါင်း ၄၀၀ လောက် ပျောက်ဆုံးနေတယ်လို့ ဆိုပါတယ်။ တရုတ်ဖက်မှာလည်း ထိခိုက်သေဆုံးမှုတွေ အများအပြား ရှိမယ်လို့ ယုံကြည်ရပါတယ်။
နီပေါပိုင်နက်ထဲမှာတော့ တိုင်မူရီနဲ့ ဆိုင်ရာဟူဘက်ဆီတို့လို နယ်စပ်မြို့လေးတွေ အကြီးအကျယ် ရေလွှမ်းခံခဲ့ရပါတယ်။ ဒေသတွင်းက ရေအားလျှပ်စစ် ထုတ်လုပ်ရေး စီမံကိန်းတွေပါ ပျက်စီးကုန်ပြီး နိုင်ငံရဲ့ ဓာတ်အား ထုတ်လုပ်နိုင်စွမ်းက ၁၂ ရာခိုင်နှုန်းလောက် ကျဆင်းသွားတယ်လို့ ဆိုပါတယ်။
Public Service Announcement
တိဘက်ရဲ့ ဂျီရောင်ခရိုင်ဖက်မှာလည်း ရေကြီးပြီး မြေပြိုမှုတွေ ဖြစ်ခဲ့တာကြောင့် အပျက်အစီးတွေ များပြားကြောင်း၊ ထိခိုက်သေဆုံးမှု အခြေအနေတွေကို ဆက်လက် စုံစမ်းနေကြောင်း အာဏာပိုင်တွေက ထုတ်ပြန်ပါတယ်။
ညိုညစ်နေတဲ့ တောင်ကျရေတွေဟာ ရုတ်တရက်ကြီး ကြောက်ခမန်းလိလိ အမြန်နှုန်းမျိုးနဲ့ တောင်စောင်းအတိုင်း စီးကျလာတာဖြစ်ကြောင်း အသက်ရှင် လွတ်မြောက်လာသူ နီပေါနိုင်ငံသား တစ်ဦးက ဆိုပါတယ်။
ရုတ်တရက် ရေကြီးမှု ဖြစ်ပွားရတဲ့ အကြောင်းရင်းကို တိတိကျကျ အတည်မပြုနိုင်သေးပေမယ့် ဟိမဝန္တာ တောင်တန်းဒေသမှာ ငလျင်ငယ်တစ်ခု လှုပ်ခတ်ရာက မြေပြိုမှု တစ်ခုကြောင့် ဘိုတေးကောရှီမြစ်ရဲ့ ရေလမ်းကြောင်းကို ပိတ်ဆို့သလို ဖြစ်ပြီး တောင်ခြေဖက်ကို ရေပမာဏ အမြောက်အမြား စီးကျလာတာ ဖြစ်နိုင်တယ်လို့ ယုံကြည်ရပါတယ်။
ပျောက်ဆုံးနေသူတွေထဲမှာ အိန္ဒိယ နိုင်ငံသား အများစုအပြင် အမေရိကန်၊ ဗြိတိန်၊ မလေးရှားစတဲ့ နိုင်ငံတွေက ကမ္ဘာလှည့် ခရီးသည် စုစုပေါင်း ၂၉၁ ဦး စာရင်းရထားကြောင်း နီပေါ အာဏာပိုင်တွေက ပြောပါတယ်။ ဟိန္ဒူ ဘာသာရေး ပွဲတော်တစ်ခုနဲ့ တိုက်ဆိုင်နေတာ၊ ခြေလျင် တောင်တက်သမားတွေကြားမှာ ကျော်ကြားတဲ့ လန်တန်း အမျိုးသားဥယျာဉ် တောင်တက်ခရီးစဉ် ရှိနေတာတွေကြောင့် အဲဒီနယ်စပ်နားမှာ နိုင်ငံခြား ခရီးသွား ဧည့်သည်တွေ စည်ကားနေတာ ဖြစ်ပါတယ်။
နီပေါဖက်ခြမ်းက ရေဖုံးပြီး မြေပြိုသွားတဲ့ နေရာတွေမှာတော့ ကယ်ဆယ်ရေး ရဟတ်ယာဉ်တွေ ဆင်းသက်လို့ မရသေးဘူးလို့ သိရပါတယ်။ ပြီးတော့ ရုတ်တရက် ရေကြီးမှုမှာ လမ်းနဲ့ တံတားတွေ ပျက်စီးမှုကြောင့် မြို့တော် ခန္တမန္ဒူက ကယ်ဆယ်ရေး အဖွဲ့တွေ သွားရောက်ဖို့ အခက်အခဲတွေ ကြုံနေရပါတယ်။
တရုတ် သမ္မတ ရှီကျင့်ဖျင်က ကယ်ဆယ်ရေးနဲ့ ရှာဖွေရေးတွေအတွက် အရင်းအမြစ် အားလုံး ပုံအော အသုံးပြုပြီး အစွမ်းကုန် လုပ်ဆောင်ဖို့ အာဏာပိုင် အဖွဲ့အစည်းတွေကို ညွှန်ကြားထားပါတယ်။ နီပေါ ဝန်ကြီးချုပ် ဘာလန်ဒရာ ရှားကလည်း ကယ်ဆယ်ရေးအတွက် စစ်တပ်နဲ့ ရဲအင်အား အများအပြားကိုပါ ပူးပေါင်းဖို့ ပို့ဆောင်ထားကြောင်း ပြောကြားသွားပါတယ်။
ဘိုတေးကောရှိမြစ်ဟာ တိဘက် ကုန်းပြင်မြင့်မှာ စတင်မြစ်ဖျားခံ စီးဆင်းပြီး နီပေါရဲ့ ထရီရှူလီမြစ်ထဲကို စီးဝင်ပါတယ်။ အဲဒီမြစ်က အိန္ဒိယရဲ့ ဂန်ဒပ်မြစ်ထဲကို ဆက်လက် စီးဝင်ပါတယ်။ မနှစ်တုန်းကလည်း ဘိုတေးကောရှီမြစ်ဟာ ရေခဲမြစ်တစ်ခု အရည်ပျော်မှုနဲ့ ဆက်စပ်လို့ ရုတ်တရက် ရေကြီးခဲ့တာကြောင့် လူ ၉ ဦး သေဆုံးခဲ့သလို နှစ်နိုင်ငံ နယ်စပ်မှာ ဆောက်လုပ်ထားတဲ့ တံတားတစ်စင်း ရေစီးနဲ့အတူ မျောပါသွားခဲ့ပါတယ်။
ကိုးကား: Guardian
