အိမ်ဖြူတော်နားမှာ ဆောက်လုပ်မယ့် အောင်ပွဲ အထိမ်းအမှတ် မုခ်ဦးကြီးဟာ စစ်အခြေစိုက် စခန်းတစ်ခု အဖြစ်ပါ အသုံးချနိုင်ဖို့ ရည်ရွယ်ပြီး မူလစီမံကိန်းကို နှစ်ဆချဲ့ထွင်လာနိုင်ကြောင်း အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။
အဲဒီ ဆောက်လုပ်ရေး စီမံကိန်းနဲ့ ပတ်သက်ပြီး အသစ်တိုးချဲ့မယ့် အစီအစဉ်တွေကို ထရမ့်က လူမှုကွန်ရက် မီဒီယာမှာ စက်တင်ဘာ ၂၀ ရက်နေ့တုန်းက မျှဝေထားခဲ့တာ ဖြစ်ပါတယ်။ သူက မုခ်ဦးကြီး တဝိုက်မှာ စစ်လက်နက် ခဲယမ်းတွေ ထားရှိနိုင်မယ့် နေရာတွေပါ တည်ဆောက်ပြီး ဒရုန်းတွေ၊ စနိုက်ပါ လက်ဖြောင့်တပ်သားတွေ ဖြန့်ကျက်ထားနိုင်ဖို့ ရည်ရွယ်ထားကြောင်း ပြောပါတယ်။
အခုလို အပြောင်းအလဲ လုပ်ရတာကလည်း အမေရိကန် စစ်တပ်ရဲ့ ပြင်းပြတဲ့ တောင်းဆိုမှုနဲ့ အမျိုးသား လုံခြုံရေးဆိုင်ရာ ရည်ရွယ်ချက်တွေကြောင့်လို့ ထရမ့်က ဆိုပါတယ်။
အောင်ပွဲ မုခ်ဦးတဝိုက်မှာ ထိပ်တန်းအဆင့် စစ်စခန်းတစ်ခု ရှိလာမှာဖြစ်ပြီး အရေအတွက် အတော်များမယ့် ဒရုန်းတွေ၊ စနိုက်ပါတွေကို ဖြန့်ကျက်ထားမှာ ဖြစ်ကြောင်း၊ ပြီးတော့ စနိုက်ပါတွေအတွက် ခဲယမ်းလက်နက် အများအပြားကိုလည်း စခန်းမှာ ထားရှိမှာ ဖြစ်ကြောင်း ထရမ့်က ရေးသားထားပါတယ်။
Public Service Announcement
ဆောက်လုပ်ရေးနဲ့ ပတ်သက်တဲ့ အစီအမံတွေနဲ့ ဘယ်လောက်ကြာမြင့်နိုင်မလဲ ဆိုတာတွေကိုတော့ ထရမ့်က အသေးစိတ် ပြောမထားပါဘူး။ ပြီးတော့ ဘာကြောင့် အဲဒီနေရာမှာ စစ်စခန်းဆောက်ဖို့ လိုအပ်သလဲ၊ သူ့အနေနဲ့ ဒီကိစ္စအတွက် လွှတ်တော် ခွင့်ပြုချက်ကို သီးခြားလိုအပ်မလား ဆိုတာတွေကိုလည်း ထရမ့်က ရှင်းပြမထားခဲ့ပါဘူး။
အမေရိကန်ရဲ့ နှစ် ၂၅၀ ပြည့် လွတ်လပ်ရေးကို ဂုဏ်ပြုတဲ့ အနေနဲ့ ပေ ၂၅၀ အမြင့်ရှိအောင် တည်ဆောက်မယ့် မုခ်ဦးဟာ အိမ်ဖြူတော်၊ ဝါရှင်တန် ကျောက်တိုက်ကြီး၊ လင်ကွန်း အောက်မေ့ဖွယ် အဆောက်အအုံတွေနဲ့ ပိုတိုမက်မြစ် ခြားပြီး တည်ရှိမှာပါ။
ကမ္ဘာပေါ်ရှိတဲ့ ထိပ်တန်းအဆင့် နိုင်ငံမြို့တော်ကြီး ၅၉ ခုထဲမှာ ဝါရှင်တန်ဒီစီ တစ်ခုပဲ ဒီလို မုခ်ဦးမျိုး မရှိသေးတာလို့ ထရမ့်က ဆိုပါတယ်။ အဲဒီ မုခ်ဦး တည်ဆောက်မှုကို အခုလထဲမှာ စတင်မယ်လို့ ယုံကြည်ရပါတယ်။
မုခ်ဦးနားမှာ စစ်စခန်းတည်ဆောက်မယ့် ထရမ့်ရဲ့ ထုတ်ပြန်ချက်နဲ့ ပတ်သက်ပြီး အမေရိကန် ကာကွယ်ရေး ဝန်ကြီးဌာနက သီးခြား မှတ်ချက် မပေးသေးပါဘူး။
ထရမ့်ရဲ့ လက်ရှိ သမ္မတ သက်တမ်းမှာတော့ ဒါဟာ အစိုးရရဲ့ ဒုတိယမြောက် အကြီးစား ဆောက်လုပ်ရေး ပရောဂျက်လည်း ဖြစ်လာမှာပါ။ ထရမ့်ဟာ အိမ်ဖြူတော်ရဲ့ ballroom ခန်းမဆောင်ကိုလည်း ဒေါ်လာ သန်း ၄၀၀ လောက် အကုန်အကျခံပြီး အကြီးစား ပြင်ဆင်မှုတွေ လုပ်ဖို့ ညွှန်ကြားထားပါတယ်။
ကိုးကား: BBC
