“ချစ်ခြင်းအားဖြင့် လွတ်မြောက်ပါစေ”

တခါက …
စာကြည့်တိုက် ပြတင်းပေါက်ကိုငေး
ပြည်သူတွေအကြောင်းတွေးနေခဲ့ဖူးတဲ့ … သူမ
တခါက …
ခြံစည်းရိုး အပြင်ဘက်ကိုလက်ကမ်း
ပြည်သူတွေနဲ့ မမောမပမ်း စကားတွေပြောခဲ့ဖူးတဲ့ … သူမ
ပြည်သူတွေအတွက် အမြဲလိုအပ်နေပေမယ့် …
သူမကိုမလိုတော့ဘဲ
ပြည်သူတွေဆက်သွားနေတာကို မြင်ချင်ခဲ့တဲ့ … သူမ
အခု … ဘယ်နေရာမှာရှိနေလဲ
အခု … ဘယ်မြင်ကွင်းကိုငေးနေမလဲ
အခု … ဘာအကြောင်းတွေတွေးနေလဲ
အခု … ဘယ်သူနဲ့ စကားပြောနေမလဲ
အခု … ဘာတွေများလိုအပ်နေမလဲ
အခု … နေရောကောင်းရဲ့လား
အဖြေမရှိသော မေးခွန်းများနဲ့
အလွမ်းသက်သက် တောင်းဆုများ …
အဲဒီ့ ချစ်ခြင်းမေတ္တာတရားတွေ
လွတ်မြောက်ခြင်းကို ယူဆောင်လာနိုင်စေ။ ။

နေဘုန်းလတ်
၁၃ ၊ဇွန် ၊၂၀၂၅