မိုးမိုး/People’s Spring
သီတင်းကျွတ်လပြည့်ည နောင်ချိုမြို့အားစစ်ကောင်စီ လေကြောင်းမှ ဗုံးကြဲတိုက်ခိုက်ခဲ့ရာ ပြည်သူ ၄ဦး ဒဏ်ရာရခဲ့ကြောင်း တအာင်းတပ်မတော်(TNLA)က သတင်းထုတ်ပြန်သည်။
အောက်တိုဘာ ၁၇ ရက် ဗုဒ္ဓဘာသာဝင် ရဟန်းရှင်လူများ အထွတ်အမြတ်ထား ဘုရားဆီမီးထွန်းညှိပူဇော်ကြသည့် သီတင်းကျွတ်ညတွင် စစ်ကောင်စီက ဂျက်လေယာဥ်ဖြင့် လာရောက်ဗုံးကြဲတိုက်ခိုက်ခဲ့ခြင်းဖြစ်သည်ဟုဖော်ပြသည်။
Public Service Announcement
“ည အစောပိုင်းမှာ ကြဲတယ်။ ၁နာရီမှာ လေးလုံးကြဲတယ်။ ညဦးပိုင်းတည်းက မနားတမ်းပျံဝဲနေတာ။ ရဲစခန်းနားက စာရင်းစစ်ရုံးမှာ အကြဲခံရတယ်။ ပထမက မြို့အပြင်ဘက် ကျတာ”ဟု နောင်ချိုမြို့ခံတစ်ဦးက ပြောသည်။
ယမန်နေ့ည ၉နာရီ ၄၀မိနစ်တွင် နောင်ချိုမြို့ သဖန်ကိုင်းရွာအတွင်း ဗုံးကြဲတိုက်ခိုက်ခဲ့ပြီး ၁၀နာရီ ၂၀ မိနစ်တွင် ထပ်မံဗုံးကြဲတိုက်ခိုက်ခဲ့ရာ နောင်ချိုရဲစခန်းဝန်းအတွင်း ကျရောက်ပေါက်ကွဲခဲ့သည်ဟု ဆိုသည်။
ထို့ပြင် ည ၁၁နာရီ ၂၀မိနစ်နှင့် ညသန်းခေါင်ကျော် ၁၂နာရီ ၄၅နှင့် နံနက် ၁နာရီ တို့တွင်ဆက်တိုက်ဗုံးကြဲတိုက်ခိုက်ခဲ့ရာ ရဲစခန်းဝန်းအတွင်းဗုံး၄လုံးထပ်မံကျရောက်ပေါက်ကွဲခဲ့သည်ဟု ဆိုသည်။
ထို့ပြင် တောင်ရပ်ကွက် နယ်မြေ(၂)တွင် ၃လုံး၊ နယ်မြေ(၁)တွင် ၂လုံး ကျရောက်ပေါက်ကွဲခဲ့သည်ဟု ဆိုသည်။
ထိုကဲ့သို့ လူထုများစုဝေးစဥ် ဗုံးကြဲတိုက်ခိုက်မှုကြောင့် ဒေသခံပြည်သူ လေးဦး ထိခိုက်ဒဏ်ရာရရှိခဲ့ကြောင်း၊ ဒဏ်ရာရသူများကိုဆေးဝါးကုသပေးလျက်ရှိကြောင်း TNLAက ထုတ်ပြန်သည်။
သီတင်းကျွတ်ညအခါသမယအချိန်တွင် ပြည်သူလူထုများ စုဝေး၍ ရပ်ကွက်၊ ဘုရားကျောင်းကန်များတွင် ဆီမီးပူဇော်ကုသိုလ်ယူနေကြသည်ကိုသိလျက် ရဟန်းရှင်လူ ဒေသခံပြည်သူလူထုများကို ဦးတည်ပြီး ရည်ရွယ်ချက်ရှိရှိ လာရောက်ဗုံးကြဲတိုက်ခိုက်မှုသည် ရက်စက်ယုတ်မာသည့်လုပ်ရပ်ဖြစ်ကြောင်းလည်း TNLAက ထုတ်ပြန်ခဲ့သည်။
စစ်ကောင်စီတပ်သည် ယမန်နေ့ညက ချင်းပြည်နယ် မင်းတပ်မြို့နယ် တိုက်နယ်(၄)ရှိနေရာ ၂ခုကိုလည်းလေကြောင်းဗုံးကြဲတိုက်ခိုက်ခဲ့ရာလူထိခိုက်မှုရှိနိုင်သည်ဟု ဒေသခံကပြောသည်။
စစ်ကောင်စီတပ်သည်၎င်း လက်လွှတ်ဆုံးရှုံးထားသည့်မြို့ရွာများ၊ ၎င်းတို့ စိုးမိုးထိန်းချုပ်နိုင်ခြင်းမရှိသည့် ဒေသများကို လေကြောင်းတိုက်ခိုက်မှုများ ဆက်တိုက်ပြုလုပ်လျက်ရှိရာ ပြည်သူလူထု သေဆုံးထိခိုက်မှုများ မကြာခဏ ဖြစ်ပေါ်လျက်ရှိသည်။
