ကဖေး/People’s Spring
ရှမ်းပြည်နယ်မြောက်ပိုင်း၊ ကျောက်မဲမြို့ရှိ ညဈေးနေရာအား စစ်ကောင်စီက ယနေ့(ဇန်နဝါရီ ၂၇ရက်) နေ့လယ် ၂နာရီ ၁၅မိနစ်တွင် လေကြောင်းမှ ဗုံးကြဲတိုက်ခိုက်ခဲ့သည်။
ကျောက်မဲမြို့ရှိ ညဈေးနေရာအား ဂျက်ဖိုက်တာဖြင့် ဗုံးကြဲတိုက်ခိုက်ခြင်းဖြစ်ပြီး လူထိခိုက်မှုရှိကြောင်း ဒေသခံတစ်ဦးက ပြောသည်။
” နောက်ထပ် ဂျက်ပျံသံကြားလို့ ဘယ်သူမှမထွက်ရဲဘူး”ဟု ဒေသခံတစ်ဦးက ပြောသည်။
Public Service Announcement
အခြားဒေသခံတစ်ဦးကလည်း ” မြို့တော်ခန်းမနားလည်း ချသွားတယ်တဲ့။ နှစ်လုံး။ ပေါက်ကွဲသံ နှစ်ချက်အကျယ်ကြီးကျရတယ်”ဟု ပြောသည်။
ကျောက်မဲမြို့ ညစျေးတန်းနှင့် ခရိုင်ရုံးပေါ်တွင် စစ်ကောင်တပ်မှ ဂျက်ဖိုက်တာဖြင့် ဗုံး (၁)လုံး ထပ်မံ လာရောက်ကြဲချတိုက်ခိုက်ခဲ့ပါသည်ဟု TNLAက ထုတ်ပြန်ထားသည်။
စစ်ကောင်စီသည် ဇန်နဝါရီ ၂၅ရက် နေ့လယ်ကလည်းလည်း ကျောက်မဲဆေးရုံကို ဂျက်ဖိုက်တာဖြင့် ဗုံးကြဲတိုက်ခိုက်ရာ ကျန်းမာရေးဝန်ထမ်းတစ်ဦးအပါအဝင် နှစ်ဦးသေဆုံးပြီး ၂၀ဦးထက်မနည်း ဒဏ်ရာရခဲ့သည်။
ကျောက်မဲ ပြည်သူ့ဆေးရုံတစ်ခုလုံးလည်း ပျက်စီးသွားခဲ့သည်ဟု TNLAက ထုတ်ပြန်ထားသည်။
စစ်ကောင်စီတပ်သည် တအာင်းဒေသအတွင်း တိုက်ပွဲဖြစ်ပွားခြင်းမရှိဘဲ အရပ်သားပြည်သူများဦးတည်ကာ ရည်ရွယ်ချက်ရှိရှိ ဗုံးကြဲတိုက်ခိုက်နေပြီး ယခု ဇန်နဝါရီအတွင်း လေကြောင်းတိုက်ခိုက်မှုကြောင့် ဒေသခံပြည်သူငါးဦး သေဆုံးကာ ၃၀ကျော် ဒဏ်ရာရခဲ့သည်ဟု TNLAက ထုတ်ပြန်ထားသည်။
