မန္တလေးတိုင်း၊ နွားထိုးကြီးမြို့နယ်၊ ဝက်လူးကျေးရွာတွင် တပ်စွဲထားသည့် စစ်ကောင်စီတပ်သားများအား PDF ရဲဘော်များက ပစ်ခတ်တိုက်ခိုက်ရာ သုံးဦးသေဆုံးပြီး လက်နက်အချို့ရရှိခဲ့ကြောင်း သတင်းရရှိသည်။
ဖေဖော်ဝါရီ ၁၈ရက် နံနက် ၉ နာရီခန့်က တိုက်ခိုက်မှုဖြစ်စဥ်အတွင်း ဝက်လူးရွာတပ်စခန်းမှ ထွက်လာသည့် စစ်ကောင်စီတပ်သားသုံးဦးအားပစ်ခတ်ခဲ့ပြီး နေရာတွင် နှစ်ဦးသေကာ တစ်ဦးအရှင်ဖမ်းမိခဲ့သည်ဟု ဆိုသည်။
“မနေ့ကဖြစ်စဉ်ကတော့ ကျွန်တော်သိရသလောက်အပြင်ထွက်တာ အဖွဲ့တွေက သတင်းရလို့ပဲဝင်ပစ်တာလား။ဒါမှမဟုတ် ကင်းရှိလို့ထွက်လာတာ တွေ့လို့ဝိုင်းပြီးတော့ ပစ်တာလည်းဖြစ်နိုင်တာပေါ့။ဒါပေမဲ့ နှစ်ယောက်ကတော့ အဲဒီမှာ သေသွားတယ်။တစ်ယောက်ကကျတော့ သူတို့ဒဏ်ရာနဲ့မိတယ်ပေါ့ဗျာ။မိပြီးတော့မှ ဒီဟာတို့ခေါ်သွားတဲ့နေရာမှာ ဒဏ်ရာကြောင့် ဆေးမကုနိုင်လို့ သေဆုံးသွားတဲ့သဘောလည်းရှိတယ်”ဟု နွားထိုးကြီးမြို့နယ် စစ်ရေးသတင်းရင်းမြစ်က လူထုနွေဦးသို့ ပြောသည်။
Public Service Announcement
နွားထိုးကြီးမြို့နယ်၏ အလယ်ပိုင်းတွင်ရှိသော ဝက်လူးကျေးရွာတွင် စစ်ကောင်စီတပ်က အင်အား ၅၀ဝန်းကျင်ဖြင့် တပ်စွဲထားကြောင်း ၎င်းက အသိပေးသည်။
ယမန်နေ့က ပစ်ခတ်မှုအတွင်း သေနတ်နှစ်လက်နှင့် ကျည်ဘောက်လေးခုကို နွားထိုးကြီး PDFက ရရှိခဲ့ပြီး တိုက်ခိုက်မှုဖြစ်စဥ်နှင့်ပတ်သက်၍ နွားထိုးကြီးမြို့နယ်ပြည်သူ့ကာကွယ်ရေးတပ်(PDF)ထံ လူထုနွေဦးက ဆက်သွယ်မေးမြန်းဆဲ ဖြစ်သည်။
ဇန်နဝါရီ ၃၀ရက်ကလည်း နွားထိုးကြီးမြို့နယ်၊ ပြင်စည်ကျေးရွာအနီးတွင် အင်အား ၅၀ဝန်းကျင်ရှိသည့် ဗိုလ်မှူးရန်လင်းအောင်နှင့် ဗိုလ်ကြီးအောင်ဇော်မင်း ဦးဆောင်သည့် တပ်မ(၉၉)လက်အောက်ခံ ခမရ(၁၄၊ ၁၅)နှင့် ရဲတပ်ရင်း တိုက်ခိုက်ရာ လက်နက် (၃၉)လက် သိမ်းဆည်းရမိမှုရှိခဲ့သည်။
စစ်ကောင်စီတပ်အဖွဲ့ဝင် ဗိုလ်ကြီး အောင်ဇော်မင်းအပါဝင် အလောင်း (၂၁)လောင်းရရှိပြီး ဗိုလ်မှူး ရန်လင်းအောင်မှာ ထိခိုက်ဒဏ်ရာဖြင့်ဆုတ်ခွာရင်း သေဆုံးကာ (၈)ဦး ဖမ်းဆီးရမိခဲ့သည်။
စစ်ကြောင်းလိုက်တိုက်ခိုက်ခံရမှုနောက်ပိုင်း စစ်ကောင်စီသည့် နွားထိုးကြီးမြို့နယ်အတွင်းရှိ ကျေးရွာများကို လေကြောင်းတိုက်ခိုက်မှုများနှင့် လက်နက်ကြီးဖြင့် ပစ်ခတ်မှုများ ခပ်စိပ်စိပ်လုပ် ဆောင်လာသည်ဟု ဒေသခံသတင်းရင်းမြစ်အချို့က ဆိုသည်။
ယမန်နေ့က နွားထိုးကြီးမြို့နယ်၊ တာပ္ပါယ်ရွာအပြင်ကို စစ်ကောင်စီက Mi-35ဖြင့် ဗုံးသီးချ၊စက်လက်ဖြင့် ပစ်ခတ်တိုက်ခိုက်မှုပြုလုပ်ခဲ့ကြောင်း သိရသည်။
