မြန်မာစစ်တပ်ရဲ့အကြမ်းဖက်လုပ်ရပ်တွေ အဆုံးသတ်ရေး ကုလသမဂ္ဂလုံခြုံရေးကောင်စီက ချက်ချင်းလုပ်ဆောင်ရမယ်လို့ အရပ်ဘက်အဖွဲ့အစည်း ၅၀၀ ကျော်က လက်မှတ်ရေးထိုး တောင်းဆိုလိုက်ပါတယ်။
Burma Campaign UK အပါအဝင် ပြည်တွင်း၊ ပြည်ပအဖွဲ့အစည်း ၅၂၁ ဖွဲ့က မြန်မာစစ်တပ်အနေနဲ့ ချင်းပြည်နယ်မှာ နောက်ထပ်ရက်စက်ယုတ်မာတဲ့ရာဇဝတ်မှုလှိုင်းကို ကျူးလွန်နေပြီး မြန်မာနိုင်ငံရဲ့ လူသားချင်းစာနာမှု၊ လူ့အခွင့်အရေးနဲ့ နိုင်ငံရေးအခြေအနေဆိုးရွားနေတာကို ဖြေရှင်းနိုင်ရေး လုံခြုံရေးကောင်စီအစည်းအဝေး ချက်ချင်းခေါ်ယူကျင်းပဖို့ တောင်းဆိုတာဖြစ်ပါ တယ်။
မြန်မာပြည်သူတွေအပေါ် စစ်တပ်ရဲ့အကြမ်းဖက်ကျူးလွန်မှုတွေကို ရပ်တန့်နိုင်ရေး နိုင်ငံတကာ အသိုင်းအဝန်းက ညီညွတ်တဲ့ဆုံးဖြတ်ချက်ချမှတ်ဖို့ ကုလသမဂ္ဂလုံခြုံရေးကောင်စီအစည်းအဝေး ကျင်းပဖို့တောင်းဆိုတာ ဖြစ်တယ်လို့ Burma Campaign UK က ထုတ်ပြန်ပါတယ်။
မကြာသေးခင်ကလည်း ကုလသမဂ္ဂလူ့အခွင့်အရေးကောင်စီရဲ့ မြန်မာနိုင်ငံဆိုင်ရာ အထူးအစီရင်ခံစာတင်သွင်းသူက ချင်းပြည်နယ်၊ ထန်တလန်ဖြစ်စဉ်ဟာ မြန်မာစစ်တပ်ကို လုံခြုံရေးကောင်စီ က အရေးယူဖို့ နောက်ထပ်အကြောင်းပြချက်ဖြစ်တယ်လို့ တိုက်တွန်းထားပါတယ်။
Public Service Announcement
