စစ်ကောင်စီစစ်ကြောရေးရောက်ပြီးနောက် အသက် ၂၀ အရွယ် လူငယ်တစ်ဦး သေဆုံး

ကရင်ပြည်နယ် ဘားအံမှာ စစ်ကောင်စီက ဖမ်းဆီထားတဲ့ လူငယ်တစ်ဦး စစ်ကြောရေးမှာ နှိပ်စက်ထားတဲ့ ဒဏ်ရာတွေနဲ့ သေဆုံးသွားခဲ့တယ်လို့ သတင်းရရှိပါတယ်။

အသက် ၂၀ ကျော်အရွယ်ရှိတဲ့ အဲဒီလူငယ်ကို ပြီးခဲ့တဲ့လက ဘားအံမြို့ပေါ်မှာ စစ်ကောင်စီက ဖမ်းဆီးခဲ့တာပါ၊ အကြမ်းဖက်မှုတိုက်ဖျက်ရေးဥပဒေပုဒ်မနဲ့ အမှုဖွင့်ထားပြီး စစ်ကြောရေးမှာ နှိပ်စက်စစ်ဆေးမေးမြန်းလို့ ရထားတဲ့ ဒဏ်ရာတွေနဲ့ ဆေးရုံမှာ ဆေးကုသမှုခံယူနေခဲ့ရတာဖြစ်ပါတယ်။

ဆေးရုံမှာ ၃ ရက်ကြာ ဆေးကုသမှုခံယူနေရပြီးတဲ့နောက် ရရှိထားတဲ့ဒဏ်ရာတွေနဲ့ သေဆုံးသွားခဲ့တယ်လို့ ဘားအံမြို့ခံတွေက ပြောပါတယ်။

“ပြီးခဲ့တဲ့ နှစ်ပတ်လောက်က သူ့ကို မြို့ပေါ်မှာပဲဖမ်းမိတာ။ ဖမ်းပြီးတော့ စစ်ကြောရေးကိုခေါ်သွားတယ်လို့ပြောတယ်။ အဲ့မှာ နှိပ်စက်ထားတာ ကျောက်ကပ်ထိသွားတယ်။ ဆေးရုံမှာ ကုသရင်း နှိပ်စက်ထားတဲ့ဒဏ်ရာတွေနဲ့ပဲ မနေ့က ဆုံးသွားတယ်။ သူက Gym ထရိန်နာသမား ဘာရောဂါအခံမှ မရှိဘူး” လို့ ဘားအံမြို့ခံတွေက ပြောပါတယ်။

Public Service Announcement

အခုဖြစ်ရပ်ဟာ ဘားအံမြို့နယ်ထဲမှာ စစ်ကြောရေးရောက်ပြီး နှိပ်စက်ခံရတဲ့ ဒဏ်ရာကြောင့် ပထမဦးဆုံးအဖြစ် အသက်သေဆုံးမှုလည်း ဖြစ်တာပါ။

စစ်ကောင်စီနဲ့ နီးစပ်သူတွေကတော့ အဲဒီလူငယ်ဟာ ရောဂါအခံရှိတာဖြစ်ပြီး ဆေးရုံတက်ရောက်ကုသနေချိန်မှာ အခုလိုသေဆုံးသွားတာဖြစ်တယ်လို့ ပြောပါတယ်။

ဘားအံမြို့နယ်အတွင်းမှာ အခုရက်ပိုင်းတွေအတွင်း စစ်ကောင်စီတပ်ဖွဲ့တွေက လိုက်လံရှာဖွေဖမ်းဆီးမှုတွေ နေ့စဉ်လိုလိုလုပ်ဆောင်နေပြီး နှစ်ပတ်အတွင်း အနည်းဆုံး ၁၀ ဦးထက်မနည်း ဖမ်းဆီးခံနေခဲ့ရတယ်လို့ ဘားအံမြို့ခံတွေရဲ့ ပြောကြားချက်အရ သိရပါတယ်။