အကြမ်းဖက်မှုတွေ ရပ်တန့်ပြီး အတိုက်အခံတွေနဲ့ ဆွေးနွေးဖို့ စစ်ကောင်စီကို အမေရိကန်နဲ့ ပြင်သစ် တိုက်တွန်း

မေ-၁၅၊ ၂၀၂၅။ အီယိုရီ/People’s Spring

အာဏာသိမ်းစစ်ကောင်စီအနေနဲ့ အကြမ်းဖက်မှုတွေ ရပ်တန့်ပြီး ပဋိပက္ခအဆုံးသတ်ဖို့ အတိုက်အခံအဖွဲ့တွေနဲ့ တွေ့ဆုံဆွေးနွေးဖို့ အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီဘရုစ်က တိုက်တွန်းလိုက်ပါတယ်။

စစ်ကိုင်းတိုင်း ဒီပဲယင်းမြို့နယ် အိုးတိန်တွင်းရွာစာသင်ကျောင်းကို စစ်ကောင်စီတပ်က လေကြောင်းတိုက်ခိုက်ခဲ့လို့ ကျောင်းသားကျောင်းသူတွေနဲ့ ဆရာမတွေ သေဆုံးခဲ့တဲ့သတင်းတွေကြောင့် အလွန်အမင်း စိတ်မကောင်းဖြစ်ရတယ်လို့ အမေရိကန်နိုင်ငံခြားရေးပြောရေးဆိုခွင့်ရှိသူက ပြောပါတယ်။

“လေကြောင်းတိုက်ခိုက်မှုဟာ စစ်ကောင်စီကြေညာထားတဲ့ အပစ်ခတ်ရပ်စဲရေးကို ချိုးဖောက်တာဖြစ်ပါတယ်”လို့ တမ်မီဘရုစ်က ဆိုပါတယ်။

Public Service Announcement

မနေ့ကလည်း ပြင်သစ်နိုင်ငံခြားရေးဝန်ကြီးဌာနက ပြောရေးဆိုခွင့်ရှိသူက စစ်တပ်ရဲ့လေကြောင်းတိုက်ခိုက်မှုကြောင့် ကလေးငယ်တွေ အဓိက ပါဝင်တဲ့ လူဒါဇင်ပေါင်းများစွာ သေဆုံးခဲ့ပြီး အဲဒီ တိုက်ခိုက်မှုကို ပြင်သစ်နိုင်ငံက အပြင်းထန်ဆုံး ရှုတ်ချကြောင်း ထုတ်ပြန်ပါတယ်။

ပြီးခဲ့တဲ့ သီတင်းပတ်က ထုတ်ပြန်ခဲ့တဲ့ အပစ်အခတ်ရပ်စဲရေးနဲ့ လုံးဝဆန့်ကျင်ဘက်ဖြစ်ပြီး အခု အရပ်သားတွေကို အစုလိုက်အပြုံလိုက် သတ်ဖြတ်မှုအသစ်ဟာ မြန်မာစစ်ကောင်စီဗုံးကြဲတိုက်ခိုက်မှု ဗျူဟာရဲ့ တစိတ်တပိုင်းဖြစ်တယ်လို့ ပြင်သစ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ပြောပါတယ်။

မြန်မာစစ်တပ်ဟာ အလားတူဗုံးကြဲတိုက်ခိုက်မှုမျိုးကို လွန်ခဲ့တဲ့ ရက်သတ္တပတ်အနည်းငယ်က ကြောက်မက်ဖွယ် မြေငလျင်လှုပ်ခတ်ခဲ့တဲ့ နေရာဒေသတွေမှာလည်း ပြုလုပ်ခဲ့တယ်လို့ ဆိုပါတယ်။

အဲဒီတိုက်ခိုက်မှုတွေကြောင့် သေဆုံးသူခဲ့ရသူတွေရဲ့ မိသားစုဝင်တွေနဲ့ သူတို့ရဲ့ ချစ်ခင်ရသူတွေအားလုံးကို ပြင်သစ်နိုင်ငံက စာနာပါကြောင်းနဲ့ ဝမ်းနည်းပါကြောင်း ထုတ်ပြန်ပါတယ်။

ပြင်သစ်နိုင်ငံဟာ မြန်မာပြည်သူတွေနဲ့အတူ မားမားမတ်မတ်ရပ်တည်နေပြီး နိုင်ငံတကာ လူသားချင်း စာနာထောက်ထားမှုဥပဒေကို လေးစားလိုက်နာကြဖို့၊ အကြမ်းဖက်မှုတွေ အဆုံးသတ်ကြဖို့နဲ့ ပဋိပက္ခမှာ ပါဝင်သူတွေ အားလုံးအကြား တွေ့ဆုံဆွေးနွေးပြီး အဖြေရှာဖွေကြဖို့ ထပ်မံ တောင်းဆိုလိုက်ပါတယ်။