မေ ၁၆၊၂၀၂၅။ဇော်ရမ်း/People’s Spring
ကချင်ပြည်နယ်၊ ဖားကန့်မြို့သို့ဦးတည် စစ်ကြောင်းထိုးလာသည့် စစ်ကောင်စီတပ်က ကချင်လွတ်လပ်ရေးတပ်မတော်(KIA) ထိန်းချုပ်ထားသည့် ဆိုင်းတောင်ကျေးရွာကို လက်နက်ကြီးဖြင့် ပစ်ခတ်နေသည်။
ဆိုင်းတောင်ကျေးရွာကို ယနေ့(မေလ ၁၆ရက်) နေ့လယ်ပိုင်းတွင် ဖားကန့်ဗျူဟာကုန်းမှ လက်နက်ကြီးဖြင့် ပစ်ခတ်ခြင်းဟု ဒေသခံတစ်ဦးက ပြောသည်။
” ဖားကန့်ကို တည်လာတဲ့ စစ်ကြောင်းက ရှေ့တိုးမရတော့ဘူး။ ဒါ့ကြောင့် ဖားကန့်အတွင်းထဲကို စပြီးတော့ ရမ်းပစ်တာလို့ ထင်တယ်။ လေကြောင်းကိုပါ သတိထားနေကြတယ် ကျတော်တို့”ဟု ဒေသခံကပြောသည်။
Public Service Announcement
ဆိုင်းတောင်ကျေးရွာသည် ကချင်လွတ်လပ်ရေးတပ်မတော်(KIA)နှင့် PDFပူးပေါင်းတပ်များက ပြီးခဲ့သည့်၂၀၂၄ စက်တင်ဘာလဆန်းမှစတင်ကာ သိမ်းပိုက်ထိန်းချုပ်ထားခြင်းဖြစ်သည်။
စစ်ကောင်စီတပ်သည် မိုးကောင်း-ကာမိုင်း-နမ့်ယား- လုံးခင်း-ဖားကန့်လမ်းနှင့် မြစ်ကြီးနား-နမ္မတီး-လက်ဝါး-တနိုင်း- ဖားကန့်လမ်းတို့မှတဆင့် အင်အားအများအပြားဖြင့် ဧပြီ၂၃ရက်ကစကာ စစ်ကြောင်းထိုးလာပြီး ယခုအခါ ဖားကန့်နှင့် (၁၇)မိုင်ခန့်အကွာသို့ ရောက်ရှိနေကြောင်း စစ်ရေးသတင်းရင်းမြစ်များထံမှ သိရသည်။
” အခုက ကပ်မှော်ဇွပ်မှာ စစ်ကြောင်းက။ ရှေ့တက်ဖို့ မလွယ်တော့ဘူး။ ဒီဘက်မှာက တောတွေပဲရှိတာမို့ KIA က စစ်ရေးအသာစီးရနေပြီ ဟုတ်တယ်”ဟု KIA နှင့် နီးစပ်သည့် သတင်းရင်းမြစ်ကပြောသည်။
ကာမိုင်း – ဖားကန့်လမ်းပိုင်းအတိုင်းဆိုပါက မအူပင်-ကျောက်ထု-အွမ်ကထောင်-ခင်တောင်- နန့်ယား-ကပ်မှော်ဇွပ်- ဆိုင်းဖရာ- ခွန်ဆိုင်ဇွပ် -ဂေါ်ရီယန်- တံတားညီနောင်- ရုံးတောင်-ပျားအုံ -ကျောက်ထု -နန့်တိန်း -၇မိုင် -၆မိုင် -၅မိုင် -ကျောက်ဖျာ -လယ်ပြင်- လုံးခင်းနှင့် ဖားကန့်ဖြစ်သည်။ စစ်ကောင်စီတပ်သည် လေကြောင်းနှင့် လက်နက်ကြီးပစ်ကူဖြင့် ရှေ့တိုးရန် ကြိုးစားနေသည်ဟု သိရသည်။
စစ်ကောင်စီတပ်စစ်ကြောင်းတွင် ပြည်သူ့စစ်နှင့် ရှမ်းနီ(SNA)တပ်ဖွဲ့ဝင် အများအပြားပါဝင်လာပြီး လက်ရှိစစ်ရေးအခြေအနေကြောင့် လေကြောင်းနှင့်လက်နက်ကြီးအန္တရာယ်သတိထားရန် ဒေသခံအချင်းချင်း သတိပေးနေကြသည်။
