ဇွန်-၁၀၊၂၀၂၅။ဇေအောင်/People’s Spring
မကွေးတိုင်း၊ ပခုက္ကူမြို့မှာ ကျင်းပနေတဲ့ သီဟိုဠ်ရှင်ဘုရားပွဲမှာ စစ်တပ်က ပွဲလာတဲ့လူငယ်တွေ အများအပြားကို ပိတ်ဆို့ပြီး ဖမ်းဆီးသွားကြောင်း ဒေသခံများက ပြောပါတယ်။
ဇွန်လဆန်းမှာ ကျင်းပနေတဲ့ ပခုက္ကူမြို့က သီဟိုဠ်ရှင်ဘုရားပွဲစျေးမှာ ပြီးခဲ့တဲ့ ဇွန်လ(၈)ရက် ညနေ (၅)နာရီခန့်ကပွဲစျေးလာလူငယ်အများအပြားကို စစ်ကောင်စီတပ်၊ ရဲနဲ့ ပျူစောထီးတွေက ပတ်ပတ်လည် ပိတ်ဆို့ပြီး ဖမ်းဆီးသွားကြောင်း ပခုက္ကူမြို့ခံတွေက ပြောပါတယ်။
“ပွဲစျေးလာတဲ့ လူငယ်တွေကို ပိတ်ဖမ်းတာ။ ပြေးကြလွှားကြနဲ့ ပွဲစျေးတန်းထဲ ရုတ်ရုတ်သဲသဲတောင် ဖြစ်သွားတယ်။”လို့ ပခုက္ကူဒေသခံတဦးက ပြောပါတယ်။
Public Service Announcement
ပွဲစျေးတန်းမှာ လူငယ် (၃၀) ခန့် ဖမ်းဆီးခံလိုက်ရတယ်လို့သိရပြီး အရေအတွက်အတိအကျကို လူထုနွေဦးက သီးခြားအတည်ပြုလို့တော့ မရသေးပါဘူး။ မိသားစုဝင်တွေက လိုက်လံစုံစမ်းပေမဲ့ ဘယ်ခေါ်သွားတယ်ဆိုတာ မသိရသေးဘူးလို့ မြို့ခံတွေက ပြောပါတယ်။
ဖမ်းဆီးသွားတဲ့ လူငယ်တွေကို စစ်မှုထမ်းဖို့ တခြားဒေသတွေကို ပို့ဆောင်မယ်ဆိုတဲ့ သတင်းတွေလည်း ကြားနေရကြောင်း မြို့ခံတွေက ပြောပါတယ်။
ပခုက္ကူမြို့နယ်အတွင်းက ကျေးရွာတွေမှာတော့ စစ်ကောင်စီတပ်က စစ်ကြောင်းထိုး မီးရှို့သတ်ဖြတ်တာတွေ ပြုလုပ်နေပြီး လေကြောင်းတိုက်ခိုက်မှုတွေပါ ပြုလုပ်နေပါတယ်။
စစ်ကောင်စီဟာ ဇွန်လဆန်းကစပြီး မန္တလေး၊ မကွေး၊ စစ်ကိုင်း အစရှိတဲ့ဒေသတွေအပါအဝင် တနိုင်ငံလုံးမှာ လိုင်စင်မဲ့ မော်တော်ယာဥ်တွေကို ဖမ်းဆီးရင်း လူငယ်တွေကိုပါ စစ်မှုထမ်းဖို့ ဖမ်းဆီးနေတယ်လို့ သိရပါတယ်။
