ထွန်းညိုဦး/People’s Spring
ပဲခူးတိုင်း၊ ဝေါမြို့နယ်၊ ဖိုးဦးစိန်ကျေးရွာမှာ နာရေးယာဥ်အဖြစ် အသုံးပြုဖို့ ခွေးဘီလူးကားလေးတစ်စီး ဇွန်လထဲက ရောက်ရှိလို့လာခဲ့တယ်။ ခွေးဘီလူးကားလေးတွေကို နာရေးယာဥ်အဖြစ် အသုံးပြုတာတော့ အတော်နည်းပါတယ်။ မြို့ပေါ်မှာ နာရေးယာဥ်အဖြစ်သုံးတဲ့ယာဥ်တွေကျ စျေးမတက်နိုင်တာကြောင့် ခွေးဘီလူးကားလေးကိုပဲ ပြင်ဆင်မွမ်းမံရင်း နာရေးယာဥ်အဖြစ် သုံးဖို့ စီစဥ်ရတာပါ။
ဒီခွေးဘီလူးလေးကိုလည်း ထိုင်းနိုင်ငံ၊ စမိုးထောင်က ဆီအုန်းစက်ရုံမှာ အလုပ်လုပ်နေကြတဲ့ ရွာသူရွာသားတွေက သူတို့ချွေးနည်းစာလေးတွေနဲ့ စုပေါင်းလှူဒါန်းခဲ့ကြတာပါ။ ဆီအုန်းစက်ရုံဆိုတော့ ဘယ်လောက်ပင်ပန်းကြမလဲ စဥ်းစားကြည့်ပါ။
ပြီးခဲ့တဲ့ ဇူလိုင်လကုန်ပိုင်းမှာတော့ အဲဒီနာရေးယာဥ်လေး ထားတဲ့ သုဿန်ဇရပ်ဆီ နာရေးကူညီသူတွေ ရောက်သွားတဲ့အချိန် ရင်ကွဲရပါတော့တယ်။ သူတို့နာရေးကား ခွေးဘီလူးလေး ပျောက်ဆုံးသွားတဲ့အတွက်ပါ။
Public Service Announcement
“မနက်မိုးလင်းလင်းချင်းဗျာ။ ရင်ထဲမှာ မကောင်းလိုက်တာ။ တစ်ကြိမ်ပဲ ကူညီရသေးတဲ့ကား”လို့ ရွာသားတစ်ဦးက လူမှုကွန်ရက်ကနေ ရုပ်သံမှတ်တမ်းရိုက်ပြီး ပြောပြခဲ့တယ်။
သူ့ရုပ်သံထဲမှာ ဇရပ်က သော့တွေလည်း ဖျက်ထားတာတွေ့ရတယ်။ နာရေးယာဥ်အဖြစ် ဆင်ယင်ထားတဲ့ စတီးကိုင်းတွေ၊ အမိုးကိုင်းတွေ အကုန်ဖြတ်ထုတ်ပြီး ထားသွားခဲ့တာ တွေ့ရတယ်။ ဒါ့အပြင် သူခိုးတွေဟာ ဇရပ်က ရေစုပ်စက်ကိုပါ သယ်သွားဖို့ကြိုးစားခဲ့ပါသေးတယ်။ စက်အောက်ခြေမှာ အခိုင်အမာ တွယ်ကုပ်ထားတာကြောင့် သယ်မသွားနိုင်ခဲ့တာပါ။
“ကျွန်တော်တို့တတွေ ဇရပ်ထဲမှာကားထားတာ။ အပြင်မှာထားတာတောင်မဟုတ်ဘူး။ အတွင်းထဲမှာ လုံလုံခြုံခြုံနဲ့။ ကျွန်တော်တို့စိတ်မချတာက ဘတ္ထရီအိုးလောက်တော့ ခိုးချင်လည်းခိုးပါစေဆိုပြီးတော့ ကားထားဖို့အတွက်ကို ရွာထဲမှာ နေရာလေးခက်ခဲလို့ဆိုပြီး ဇရပ်လေးမှာ ခဏလေးလာထားတာ။ အဲဒါကိုဗျာ လုပ်သွားတာ။ ကားပြီးတာမှ လပိုင်းလေးပဲရှိသေးတယ်။”လို့ ဒေသခံတစ်ဦးက ရုပ်သံမှတ်တမ်းမှာ ရင်ဖွင့်ခဲ့တယ်။ ဒီကားလေးဟာ ရွာသူရွာသားတွေ ချွေးနည်းစာလေးနဲ့ ဝယ်ယူထားရတာမို့ ပြန်တွေဖို့ ဆုတောင်းနေခဲ့တယ်။
အဲဒီဖြစ်စဥ်နဲ့ မရှေးမနှောင်း ဇူလိုင်လ ၂၉ ရက်နေ့မှာပဲ ပဲခူးမြို့၊ ဥဿာမြို့သစ်(၅)ရပ်ကွက်က မဟာပညာဇေယျုံ(ဘက)ကျောင်းက ကျောင်းထိုင်ဆရာတော်ဟာ မနက်ဆွမ်းဘုဥ်းပေးပြီးချိန် ကျောင်းထဲကို အမျိုးသား ၆ ဦးနဲ့ ကိုရင်တစ်ပါး ရောက်လာတာကို တွေ့လိုက်ရတယ်။ ဆရာတော်ရဲ့ အသိမိတ်ဆွေဆိုပြီး ရောက်လာခဲ့ကြတာပါ။ ရောက်လာတော့ ထမင်းစားချိန်ဆိုတော့ ထမင်း ကျွေးတယ်။ သူတို့ထမင်းစားနေတုန်း ဆရာတော်လည်း ဆေးသောက်ဖို့ အခန်းထဲ ဝင်သွားတယ်။
တအောင့်လောက်နေလို့ ဆရာတော်လည်း အပြင်ပြန်ထွက်လာရော စောစောက ဧည့်သည်တွေ မရှိတော့ဘူး။ စားပွဲပေါ်တင်ထားတဲ့ ဆရာတော်ရဲ့ ကားသော့လည်း မတွေ့ဘူး။ ဒါနဲ့ ဆရာတော်က ကျောင်းဝင်းထဲ ရပ်ထားတဲ့သူ့ကား လှမ်းကြည့်တော့ ဆရာတော့်ကား Nissan AD ကားလေး မရှိတော့တာ တွေ့လိုက်ရတယ်။
ဒါနဲ့ ကျောင်းဝင်းထဲဆင်းပြီး တွေ့တဲ့ကိုရင်မေးကြည့်တော့
စောစောက ထမင်းစားသွားတဲ့ ဧည့်သည်တွေက မောင်းယူသွားတာကို သိလိုက်ရတယ်။ ဆရာတော့်ကား ခိုးခံလိုက်ရပါပြီ။ ဆရာတော်လည်း နောက်တရက် ဇူလိုင် ၃၀ ရက်မှာ ရဲတိုင်လိုက်တယ်။
တိုက်တိုက်ဆိုင်ဆိုင်ပဲ ပဲခူးမြို့၊ မဟာမြိုင်လမ်းရှိ အောင်ဆေးရုံအနီးမှာ ခွေးဘီလူး ဟိုက်ဂျက်နဲ့ မသင်္ကာစရာကောင်းတဲ့ လူနှစ်ယောက်ကို တွေ့လိုက်ရတယ်။ ရဲတွေက သွားစစ်တော့ ကားသူခိုးတွေ ဖြစ်နေခဲ့တယ်။ သူတို့နဲ့အတူ တွေ့လိုက်ရတဲ့ ခွေးဘီလူး ဟိုက်ဂျက်လေးက ဘိုးဦးစိန်ရွာက နာရေးကားလေးဖြစ်နေတာပါ။
ကားသူခိုးအဖွဲ့ဟာ အုပ်စုလိုက် ကျူးလွန်နေတာလို့ သိရတယ်။ မိတဲ့သူ ၂ ဦးက ပဲခူးမြို့၊ဥသာမြို့သစ်(၁)ရပ်ကွက်၊၃လမ်းနေ ကောင်းမြတ်(ခ)ထွန်းထွန်းနိုင်နဲ့ ၅လမ်းနေ ချမ်းသာ(ခ)ဖိုးချမ်းသာတို့ဖြစ်တယ်လို့ သိရတယ်။ နောက်ထပ်လည်း ကားခိုးမှုနဲ့ ပတ်သက်တဲ့ တရားခံ ၆ ဦးကို ဇူလိုင် ၃ဝ ရက်မှာ မွန်ပြည်နယ်၊ သထုံမှာ ဖမ်းဆီးရမိခဲ့ပြီး တစ်ယောက်ကဆိုရင် ရဲအယောင်ဆောင်လေ့ရှိတယ်လို့ပါ သိရပါတယ်။
ကားသူခိုးတွေဟာ နိဗ္ဗာန်ယာဥ်နဲ့ ဘုန်းကြီးကားကိုမှ ရွေးချယ်ခိုးယူခဲ့ကြသူတွေပါ။ အရင့်အရင်က ဘယ်နှစ်စီးလောက် ခိုးပြီးသွားလဲ မသိရသေးပါဘူး။ ဖိုးဦးစိန်ရွာက ရွာသူရွာသားတွေကတော့ သူတို့နာရေးကားလေး ပြန်တွေ့ပြီဆိုတော့ ဝမ်းသာနေကြပါတယ်။
စစ်ကောင်စီအာဏာသိမ်းပြီးနောက်ပိုင်း ခိုးဆိုးလုယက်မှုတွေ ဒေသအသီးသီးမှာ ဆက်တိုက်ဖြစ်ပွားနေခဲ့ရာမှာ ယခုအခါမှာတော့ သုဿန်ဇရပ်က နာရေးကားတွေ၊ ဘုန်းကြီးကားတွေပါ ခိုးယူခံလာရတာဖြစ်ပါတယ်။
