လုံခြုံရေးသတိပေးထားသည့် မရမ်းကုန်းမြို့နယ်ထွေအုပ်ရုံးအတွင်း စစ်ကောင်စီဝန်ထမ်းချင်း ဓါးထိုးသတ်မှုဖြစ်

ဇွန်-၁၀၊၂၀၂၅။ယောနသံ/People’s Spring

ရန်ကုန်မြို့၊မရမ်းကုန်းမြို့နယ်၊ထွေအုပ်ရုံးအတွင်းတွင် ထွေအုပ်ဝန်ထမ်းတစ်ဦးအားမြို့နယ်အထွေထွေအုပ်ချုပ်ရေးအဖွဲ့ဥက္ကဌ၏ ကိုယ်ရေးလက်​ထောက်က ဓားဖြင့်ထိုးသတ်မှု ဖြစ်ခဲ့သည်။

ယနေ့ (ဇွန်လ ၁၁ ရက်) နံနက်၁၀နာရီခန့်၌ မရမ်းကုန်းမြို့နယ်ထွေအုပ်ရုံးမှအငယ်တန်းစာရေး ကိုအောင်မြင့်မြတ်ကို မြို့နယ်အထွေထွေအုပ်ချုပ်ရေးအဖွဲ့ဥက္ကဌ၏ ကိုယ်ရေးလက်​ထောက်ကျော်စိုးမင်းက ဓားဖြင့်ထိုးခြင်းဟု ဖြစ်စဥ်ကိုသိသူတစ်ဦးကပြောသည်။

“ဓါးယူလာပြီးထွေအုပ်ရုံးထဲတင်ထိုးတာဗျ။ ကိုအောင်မြင့်မြတ်က သံတွဲထွေအုပ်ရုံးကနေ စစ်ရှောင်ပြီး ဒီမှာ(မရမ်းကုန်းထွေအုပ်ရုံး) တွဲဖက်ကျနေတဲ့သူပါ။ သူသေတယ်။ ကျော်စိုးမင်းကတော့ ပြေးနေတယ်”ဟု ရမ်းကုန်းမြို့နယ် ထွေအုပ်ရုံးနှင့် နီးစပ်သူကပြောသည်။

Public Service Announcement

ကိုအောင်မြင့်မြတ်သည် အသက် ၃၆ နှစ်အရွယ်ရှိပြီး ထွေအုပ်ရုံး အငယ်တန်းစာရေးဖြစ်တာဝန်ထမ်းဆောင်နေသူဖြစ်ပြီး ၊ ​ကျော်စိုးမင်းမှာအသက် ၅၀ ​ကျော်အရွယ်ဖြစ်​ကြောင်းသိရသည်။

ပြီးခဲ့သည့် ဇန်နဝါရီလ ၃၀ ရက်နေ့က မရမ်းကုန်းမြို့နယ်အထွေထွေအုပ်ချုပ်ရေးရုံး၌ခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်ခရိုင်စီမံအုပ်ချုပ်ရေးအဖွဲ့ဝင်ဒုတိယဗိုလ်မှူးကြီးဖြိုးအောင်ဟိန်းတို့က ရန်ကုန်မြို့ပြပြောက်ကျားအဖွဲ့များ၏ တိုက်ခိုက်နိုင်ခြေအတွက် လုံခြုံရေးဆိုင်ရာအစည်းအဝေးကျင်းပခဲ့သည်။

ခရိုင်နှင့်မြို့နယ်အဆင့်ဌာနဆိုင်ရာဝန်ထမ်းများအား လုံခြုံရေးမပေါ့ဆရန်၊ ရုံးတွင်းလုံခြုံရေးအထူးဂရုပြုရန် ဒုတိယဗိုလ်မှူးကြီးဖြိုးအောင်ဟိန်းကပြောခဲ့သည်။

ထိုအပြင်မြို့နယ်အထွေထွေအုပ်ချုပ်ရေးအဖွဲ့ဥက္ကဌက လုံခြုံရေးဆိုင်ရာ ညွှန်ကြားချက်များ နေ့စဉ် ပြောနေသည့်ကြားမှ ပြင်ပမှလာမတိုက်ခိုက်ဘဲ အချင်းချင်းသတ်ဖြတ်မှုဖြစ်ခြင်းဖြစ်သည်။