စစ်​ကောင်စီကတော်လှန်​ရေးတပ်များထိန်းချုပ်ထား​သော စစ်ကိုင်းအထက်ပိုင်း​ကိုဆက်တိုက်ဗုံးကြဲ​နေ

ဇွန်-၂၂၊၂၀၂၅။ဇော်ရမ်း/People’s Spring

ပြည်သူ့ကာကွယ်​ရေးတပ်မ​တော်(PDF )နှင့် ​တော်လှန်​ရေးတပ်များထိန်းချုပ်ထားသည့် စစ်ကိုင်းတိုင်း အထက်ပိုင်းမြို့နယ်များကို စစ်​ကောင်စီက ယခုရက်ပိုင်းအတွင်းလေကြောင်းဗုံးကြဲမှုများဆက်တိုက်ပြုလုပ်​နေပြီးဇွန်၂၂ ရက်နံနက်ပိုင်းတွင်လည်း PDFများသိမ်းပိုက်ထားသည့် အင်းတော်မြို့ကိုဗုံးကြဲခဲ့သည်။

အင်းတော်မြို့နယ်၊နဘားကျေးရွာလမ်းဆုံကိုယ​နေ့ နံနက် ၅နာရီ၄၅မိနစ်နှင့်၅နာရီ၅၁မိနစ်တို့တွင်ဗုံး၂လုံးကြဲခဲ့​ကြောင်းဒေသတွင်းစစ်​ရေးသတင်းများဖော်ပြပေးနေသည့် Indaw Revolution-IRက ထုတ်ပြန်သည်။

အဆိုပါဗုံးကြဲမှုမှုကြောင့်နဘားလမ်းဆုံရှိရန်အောင်မင်္ဂလာဘုန်းကြီးကျောင်းပျက်စီးကာခရီးသွားအမျိုးသမီးတစ်ဦး ဦးခေါင်းမှန်စထိမှန်ဒဏ်ရာ ရရှိခဲ့သည်ဟု Indaw Revolution-IRက ထုတ်ပြန်သည်။ ဒေသခံ အချို့ကလည်း စစ်တပ်ကဗုံးကြဲသည်ကို အတည်ပြုသည်။

Public Service Announcement

“လေကြောင်းက မကြာမကြာ လာပစ်နေတာ။ အခုကတော့အရပ်သားတွေနေရာ ထိတာပါ။သတိတော့ အမြဲထားနေကြပါတယ်”ဟုဒေသခံတဦးကပြောသည်။

အင်းတော်မြို့ကို အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန၊ အမှတ် (၁) စစ်ဒေသ၏ အစီအစဥ်ဖြင့်၂၀၂၄ သြဂုတ်လကတည်းက ထိုးစစ်ဆင်ခဲ့ပြီး ၂၀၂၅ ဧပြီ ၇ ရက်တွင် PDF ၊ABSDF ၊KIA ၊KPDF နှင့် ပကဖ တို့ကထိုးစစ်ဆင်သိမ်းပိုက်ခဲ့သည်။ မြို့သိမ်းတိုက်ပွဲအတွင်း တပ်မ(၇၇)တပ်မမှူး ဗိုလ်မှူးချုပ်အောင်သက်ဦးကို ဖမ်းမိခဲ့ပြီး လက်နက်ကြီးအများအပြားလည်း သိမ်းနိုင်ခဲ့သည်။ စစ်ကောင်စီကအင်းတော်မြို့ကို လေကြောင်းမှမကြာခဏလာရောက်တိုက်ခိုက်နေသည်။

ပြီးခဲ့သည့် ဧပြီလက အင်းတော်မြို့နယ်အတွင်းရှိ ဆေးခန်းတစ်ခုအပေါ် စစ်တပ်ကလေကြောင်းဗုံးကြဲရာအသက် (၆၁)အရွယ် သူနာပြု ဦးအေးမောင်ဒဏ်ရာရပီုးဆေးကုသမှုခံယူစဥ်ကွယ်လွန်ခဲ့သည်။

စစ်ကောင်စီသည် ယခုရက်ပိုင်းအတွင်း၌ အင်းတော်မြို့နှင့်ဆက်စ်သောပင်လည်ဘူးမြို့၊ ကန့်ဘလူမြို့၊ ကောလင်းမြို့တို့ကိုလည်း လေကြောင်းမှ ဆက်တိုက်ဗုံးကြဲနေသည်။ဇွန်လ ၂၀ ရက်နေ့ ညနေ ၄ နာရီခန့်က ပင်လည်ဘူးမြို့၊ အင်္ဂါးရွာစာသင်ကျောင်းဝင်းအတွင်းကို စစ်ကောင်စီတပ်ကဗုံးကြဲရာဆရာမတစ်ဦး‌ဆုံးပြီးကလေးငယ် ၃ ဦးအပါအဝင်၈ဦးဒဏ်ရာရရှိခဲ့သည်။CDMဆရာမ(မူပြ)အသက်၃၀အရွယ်ဒေါ်ဌေးဌေးမြင့် ​သေဆုံးခဲ့ပြီး အသက်၄နှစ်အရွယ်ကလေးငယ်၂ဦး၊ ၇နှစ်အရွယ်ကလေးတဦး နှင့် စာသင်ကျောင်းယာယီဆောင်ဆောက်လုပ်ရန်ထရံယက်​​နေ​သူ၅ဦး ဒဏ်ရာရခဲ့သည်။

“ဒဏ်ရာရတဲ့အထဲကကလေးတဦးကတော့ဒဏ်ရာပြင်းတယ်လို့သိရတယ်။မနေ့ညနေ(ဇွန် ၂၀ ရက်ည​နေ)ကလည်း ကျွန် တော်တို့ခေါင်း ပေါ်တောက် လျှောက် လေယာဉ် တွေဝဲ နေတယ်”လို့ ကောလင်းမြို့နယ်က ဒေသခံတဦး ကပြောပါတယ်။

ထို့အပြင် ဇွန်လ ၂၀ ရက်ည၉နာရီခန့်တွင်လည်း ကောလင်းမြို့အရှေ့ပိုင်းကို ဗုံးနှစ်လုံးကြဲသွားခဲ့သည်။ဇွန်လ ဒုတိယလပတ်အတွင်းက ကန့်ဘလူမြို့ကိုလည်း လေကြောင်းမှနှစ်ကြိမ်တိုက်ခိုက်ခဲ့သည်ဟု သတင်းရရှိသည်။

စစ်​တပ်က ကောလင်း၊ပင်လည်ဘူး၊အင်း​တော် စသည့်​ဒေသများတွင်မည်သည့်တိုက်ပွဲမှ မရှိဘဲ ဗုံးကြဲ​နေခြင်းဖြစ်သည်။ပင်လည်ဘူးမြို့နယ်ကိုလည်း​PDF နှင့် ​တော်လှန်​ရေတပ်များကထိန်းချုပ်ထားပြီး ၊​ကောလင်းမြို့နယ်တွင်လည်းမြို့​ပေါ်မှအကကျန်​နေရာအများစုကို​တော်လှန်​ရေးတပ်များကထိန်းချုပ်ထားခြင်းဖြစ်သည်။