ဒေသအသီးသီး၌ အာဏာသိမ်းစစ်ကောင်စီက အရပ်သားများအပေါ် အကြမ်းဖက်မှုများ နေ့စဉ်ပြုလုပ်နေခြင်းနှင့်ပတ်သက်ပြီး တစ်လအတွင်းမှတ်တမ်းများကို အမျိုးသားညီညွတ်ရေးအစိုးရ(NUG)၏ ကာကွယ်ရေးဝန်ကြီးဌာနက ယနေ့ ထုတ်ပြန်သည်။
အောက်တိုဘာ ၇ရက်မှ နိုဝင်ဘာ ၆ရက်အတွင်း အာဏာသိမ်းအကြမ်းဖက် စစ်ကောင်စီက အရပ်သားများအပေါ် အကြမ်းဖက်မှု ကျူးလွန်သည့် အခြေအနေများကို ထုတ်ပြန်ခဲ့ရာ စစ်ကောင်စီက ပြည်သူများကို ဖမ်းဆီးခြင်း၊ သတ်ဖြတ်ခြင်း အပါအဝင် ပုံစံအမျိုးမျိုးဖြင့် အကြမ်းဖက်လုပ်ရပ်များ လုပ်ဆောင်ခဲ့ကြောင်း တွေ့ရသည်။
စစ်ကောင်စီက အကြမ်းဖက်မှုကျူးလွန်ရာဒေသများကိုလည်း ဖော်ပြခဲ့ရာ တိုင်းနှင့် ပြည်နယ် ၁၄ခုမှ မြို့နယ်အများအပြားရှိ ပြည်သူများစွာ အသက်အိုးအိမ်စည်းစိမ်များ ပျက်စီးဆုံးရှုံးခဲ့ရသည်။
အကြောင်းမဲ့ ပစ်ခတ်သတ်ဖြတ်ခြင်း၊ မတရားစွပ်စွဲ ဖမ်းဆီးခြင်း၊ လက်နက်ကြီးဖြင့် ရမ်းသမ်းပစ်ခတ်ခြင်း၊ နေအိမ်အဆောက် အဦးများကို မီးရှို့ခြင်း၊ ကျေးရွာများသို့ ဝင်ရောက်စီးနင်းခြင်းဖြင့် ပြည်သူလူထုများကို ထွက်ပြေးတိမ်းရှောင်စေရခြင်း၊ အမျိုးသားဒီမိုကရေစီအဖွဲ့ချုပ်(NLD)ပါတီရုံးများကို ဗုံးဖောက်ခွဲခြင်း၊ ပြည်သူလူထုနေအိမ်များကို ဖောက်ထွင်းပြီး ပစ္စည်းများ ခိုးယူခြင်း၊ အိမ်မွေးတိရိစ္ဆာန်များကို သတ်ဖြတ်စားသောက်ခြင်း စသည့် ရာဇဝတ်မှုများကို စစ်ကောင်စီတပ်များက ကျူးလွန်ခဲ့ကြသည်ဟု ဆိုသည်။
Public Service Announcement
အဆိုပါ စစ်ကောင်စီတပ်၏ အကြမ်းဖက်မှု ဖြစ်စဉ်များကို မြေပြင်သတင်းတာဝန်ခံများနှင့် သတင်းဌာနများ၌ ဖော်ပြထားသည့် အချက်အလက်များကို အခြေခံ၍ ကာကွယ်ရေးဝန်ကြီးဌာနက ပြုစုထုတ်ပြန်ခဲ့ခြင်းဖြစ်သည်။
