ဇူလိုင်-၁၃၊၂၀၂၅။ဇော်ရမ်း/People’s Spring
ရှမ်းပြည်နယ် မြောက်ပိုင်း၊ ကျောက်မဲမြို့ပေါ်ရှိ စာသင်ကျောင်းအပါအဝင်နေရာအချို့ကို စစ်ကောင်စီက ယနေ့ နံနက်အစောပိုင်း၌ လေကြောင်းမှ ဗုံး ၄လုံးထပ်မံကြဲသည်။
ဇူလိုင် ၁၃ရက်နံနက် ၆နာရီ ၈မိနစ်၊ ၆နာရီ၁၄မိနစ်နှင့် ၆နာရီ ၁၉မိနစ်၌ အမက (၁၃) ကျောင်းနှင့်ဝါဆိုကျောင်းလမ်းကို ဂျက်ဖိုက်တာဖြင့် ဗုံးကြဲခြင်းဖြစ်သည်။
“ဆက်တိုက်ကြဲသွားတာပါ။လူနာတင်ယာဉ်တွေ အသံကြားတယ်။ အရပ်သားတွေထိခိုက်မှုရှိမယ်ထင်တယ်။ စောစောစီးစီကွယ်” ဟု ဒေသခံအမျိုးသမီးတစ်ဦးကပြောသည်။
Public Service Announcement
အမက(၁၃)ကျောင်းသည် ပိတ်ထားပြီးယနေ့နံနက်ဗုံးကြဲမှုကြောင့်ထိခိုက်မှုအခြေအနေအသေးစိတ်ကို မသိရသေးပေ။
လွန်ခဲ့သည့်တစ်ရက်ကျော် ဇူလိုင် ၁၁ရက်ကလည်း ကျောက်မဲမြို့ပေါ်ရှိ ကောလီဟိုတယ်နှင့် ခရိုင်ရဲတပ်ဖွဲ့မှူးရုံးကို စစ်ကောင်စီက ဂျက်ဖိုက်တာဖြင့်ဗုံးသုံးလုံးကြဲခဲ့ရာ လူ ၁ဦးသေဆုံးပြီး ၅ဦး ဒဏ်ရာရခဲ့သည်။
စစ်ကောင်စီသည် တအောင်းအမျိုးသားလွတ်မြောက်ရေးတပ်မတော်(TNLA)ထိန်းချုပ်ထားသော ကျောက်မဲ၊သီပေါနှင့် မိုးကုတ်မြို့နယ်တို့ကို လေကြောင်းမှ မကြာခဏ ဗုံးကြဲနေသည်။
ကျောက်မဲမြို့ကို ဇွန်လ ၂၄ရက်၊ ဇွန်၂၇ရက်၊ဇွန် ၂၉ရက်၊ ဇူလိုင်လ ၆ရက်၊ ဇူလိုင်လ ၈ရက်ကလည်း ဗုံးကြဲတိုက်ခိုက်ရာ အရပ်သား ၆ဦးသေဆုံးခဲ့သည်။
စစ်ကောင်စီနှင့် TNLAသည် နောင်ချိုမြို့တွင်တိုက်ပွဲပြင်းထန်နေပြီးစစ်တပ်မှာ မြို့အဝင်ဝအနီးထိရောက်လာသည်။ ကျောက်မဲ-နောင်ချို ပြည် ထောင်စုလမ်းပိုင်းကိုTNLAက ဖြတ်သန်းခွင့်ပိတ်ထားသည်။
