အစ္စရေး ဝန်ကြီးချုပ် ဘင်ဂျမင် နေတန်ညာဟုဟာ အစာအဆိပ်သင့် ဝေဒနာ ခံစားရလို့ ရက်ပိုင်းလောက် အနားယူရမယ်လို့ ဝန်ကြီးချုပ်ရုံးက ကြေညာခဲ့ပါတယ်။
နေတန်ညာဟုဟာ နေအိမ်မှာပဲ ၃ ရက်ကြာ အနားယူနေမှာ ဖြစ်ကြောင်း၊ ဒါပေမဲ့ အစိုးရရဲ့ အရေးကြီးတဲ့ တာဝန်တွေကိုတော့ နေအိမ်ကနေ ဆက်လက်ပြီး စီမံ ခန့်ခွဲနေဖို့ရှိကြောင်း ဇူလိုင် ၂၀ ရက်နေ့ ကြေညာချက်ထဲမှာ ဖော်ပြထားခဲ့ပါတယ်။
အသက် ၇၅ နှစ်အရွယ် နေတန်ညာဟုဟာ အဲဒီ တစ်ညလုံး ဖျားခဲ့တာကြောင့် လိုအပ်တဲ့ စစ်ဆေးမှုတွေ လုပ်ခဲ့ရာမှာ အူရောင်ပြီး ရေဓာတ် ခန်းခြောက်တဲ့ လက္ခဏာတွေကို စစ်ဆေး တွေ့ရှိခဲ့ပါတယ်။ ဒါကြောင့်လည်း သူဟာ ဆေးသွင်း ကုသမှုတွေပါ ခံယူခဲ့ရကြောင်း သိရှိရပါတယ်။
ဆရာဝန်တွေရဲ့ လမ်းညွှန်ချက်နဲ့အညီ ဝန်ကြီးချုပ်ဟာ နောက်ထပ် ၃ ရက်ကိုတော့ နေအိမ်မှာပဲ အနားယူနေမှာ ဖြစ်ကြောင်း၊ ဒီအတောအတွင်း နိုင်ငံရဲ့ အရေးကိစ္စတွေကိုလည်း အိမ်ကနေပဲ စီမံကိုင်တွယ်နေမှာဖြစ်ကြောင်း ကြေညာချက်ထဲမှာ ဖော်ပြထားပါတယ်။
Public Service Announcement
နေတန်ညာဟုဟာ ဇူလိုင် ၂၀ ရက် မနက်ပိုင်းတုန်းက အစိုးရအဖွဲ့ရဲ့ ပုံမှန် အစည်းအဝေးကို မတက်ရောက်နိုင်ခဲ့တဲ့နောက် ဝန်ကြီးချုပ် ရုံးဆီက အခုလို ကြေညာချက် ထွက်ပေါ်လာတာပါ။
ဂျေရုဆလင်မှာရှိတဲ့ ဟာဒက်ဆာ တက္ကသိုလ် ဆေးရုံရဲ့ ဌာနမှူး တစ်ဦးဖြစ်သူ ဒေါက်တာ အေလွန် ဟက်ရှ်ကိုက ဝန်ကြီးချုပ်ဟာ မသန့်တာ တစ်ခုခု စားမိရာက အစာအဆိပ်သင့်ပြီး အူရောင်ခဲ့ကြောင်း ပြောပါတယ်။ နောက်ဆက်တွဲ စစ်ဆေးမှု ရလဒ်တွေ အားလုံး ကောင်းမွန်တယ်လို့လည်း သူက ဆိုပါတယ်။
နေတန်ညာဟုဟာ ၂၀၂၃ ခုနှစ်တုန်းက နှလုံးမှာ စက်တပ်ထားရသလို ဆီးလမ်းကြောင်း ပိုးဝင်မှု ပြဿနာ တစ်ခုကြောင့် ဆီးကြိတ်ဖယ်ရှား ဖြတ်တောက်တဲ့ ခွဲစိတ်မှုကိုလည်း ခံယူထားရပါတယ်။
ကိုးကား: Reuters
