စစ်သင်္ဘောအုပ်စု ထီးချိုင့်မြို့၌ ညအိပ်ရပ်နား၊ သင်္ဘောအချို့မှ လက်နက်ခဲယမ်း၊ ရိက္ခာများချ

ဇူလိုင်-၂၄၊ ၂၀၂၅။ ထားမြတ်/People’s Spring

အာဏာသိမ်းစစ်ကောင်စီ၏ စစ်သင်္ဘောအုပ်စုသည် ယနေ့ (ဇူလိုင် ၂၄ရက်)ညပိုင်းတွင် ထီးချိုင့်မြို့၌ ကျောက်ချရပ်နားထားပြီး လက်နက်ခဲယမ်း၊ ရိက္ခာများ ချပေးနေသည်ဟု ဒေသသတင်းရင်းမြစ်က အသိပေးသည်။

မန္တလေးမြို့မှ ဧရာ၀တီမြစ်ကြောင်းအတိုင်း ဆန်တက်လာသည့် စစ်ကောင်စီ၏ စစ်သင်္ဘော ၁၇စီးသည် ယနေ့တွင် ထီးချိုင့်မြို့ရောက်ရှိရာ အချို့သည် ရေလယ်၌ ကျောက်ချပြီး အချို့သင်္ဘောကုန်တွဲများမှာ အမှတ်(၃) သရက်မှော်ရပ်ကွက် မြသိန်းတန်ဘုရားလေးဆူရေဆိပ်တွင် ခဲယမ်း၊ရိက္ခာများ ချနေသည်ဟု Tigyaing Revolution က ယနေ့ညပိုင်း၌ အသိပေးသည်။

“ထီးချိုင့်မြို့ထဲရပ်ကွက်တွေပါ”ဟု ထီးချိုင့်ဒေသ သတင်းရင်းမြစ်က စစ်သင်္ဘောများ ကျောက်ချရပ်နားရာ နေရာကို ပြောသည်။ အဆိုပါ စစ်သင်္ဘောများသည် ထီးချိုင်မြို့နယ်သို့ ဝင်လာစဉ် လမ်းတလျှောက် အနီးဝန်းကျင်သို့ ပစ်ခတ်တိုက်ခိုက်မှုများ လုပ်ဆောင်ခဲ့ဟုလည်း ၎င်းက ပြောသည်။

Public Service Announcement

“အခုအထိတော့ အထိအခိုက် မကြားရသေးပါဘူးဗျ”ဟုလည်း ထီးချိုင့်ဒေသ သတင်းရင်းမြစ်က ပြောသည်။

ထီးချိုင့်တော်လှန်ရေးတပ်ဖွဲ့ သတင်းရင်းမြစ်တစ်ဦးကလည်း “ပစ်တာကတော့ အလွန်အကျွံပဲ။ အထိအခိုက် မကြားရသေးဘူး။ ထီးချိုင့်မြို့နဲ့ အထက်နားမှာ ကပ်ထားတယ်တဲ့။ မောင်းကုန်းကို ဒရုန်းနဲ့ချလို့ ဆီဆိုင်မီးလောင်တယ်လို့ကြားတယ်”ဟု ပြောသည်။

မန္တလေးမှ ဗန်းမော်မြို့သို့ ဦးတည်ဆန်တက်လာသည့် စစ်သင်္ဘောအုပ်စုကို PDF ပူးပေါင်းတပ်များက သပိတ်ကျင်းမြို့နယ်အတွင်း တိုက်ခိုက်ခဲ့ရာ စစ်သင်္ဘောအချို့ နစ်မြုပ်၊ ပျက်စီးမှုများရှိခဲ့သည်။