သြဂုတ်-၇၊၂၀၂၅။လူအေး/People’s Spring
နေပြည်တော်အနီးကိုဗဟိုပြု၍ ရစ်ခ်ျတာစကေး ၄.၇ အဆင့်ရှိသောငလျင်တစ်ခုယနေ့ညတွင် လှုပ်ရှားသွားပြီး မန္တလေးတိုင်းနှင့် ရှမ်းပြည်နယ်မှမြို့နယ်များပါ မြေလွှာလှုပ်ရှားသွားသည်။
သြဂုတ်လ ၇ ရက် ၉နာရီ၁ မိနစ်အချိန်ခန့်တွင်နေပြည်တော်မြောက်ဘက် ၅၄ ကီလိုမီတာ(၃၃ မိုင်ကျော်) အကွာ၊ မြေအောက်အနက် ၁၀ ကီလိုမီတာ(၆ မိုင်ကျော်)ကိုဗဟိုပြု၍ လှုပ်ရှားသွားခြင်းဖြစ်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ကထုတ်ပြန်သည်။မြေငလျင်ပြင်းအားမှာတိုင်းတာသောစက်တည်နေရာပေါ်မူတည်တစ်ခုနှင့်တစ်ခုအနည်းငယ် ခြားနားတက်ကြောင်းလည်းအသိပေးထားသည်။
ကမ္ဘာတစ်ဝန်းမြေငလျင်လှုပ်ရှားမှုများကိုတိုင်းတာဖော်ပြပေးနေသော အမေရီကန် မြေငလျင်တိုင်းတာရေးဌာန (USGS )က အဆိုပါငလျင်သည် ရမည်းသင်း မြို့ အရှေ့တောင်ဘက်၂၅ကီလိုမီတာ( ၁၅ မိုင်ကျော်)အကွာ ၊မြေအနက် ၁၄ ကီလိုမီတာကျော်ကို ဗဟိုပြု၍ ပြင်းအား ၄ ဒသမ ၄ ဖြင့်လှုပ်ခတ်ခဲ့ခြင်းဖြစ်ကြောင်းထုတ်ပြန်ထားသည်။ မြေငလျင် ဗဟိုချက်သည် ရမည်းသင်းမြို့နှင့် တပ်ကုန်းမြို့ကြားတွင်ရှိပြီး ၊ နေပြည်တော်၏ မြောက်ဘက်တွင်ဖြစ်သည်။
Public Service Announcement
ငလျင်လှုပ်ရှားသည်ကို နေပြည်တော်တွင်သိသိသာသာခံစားခဲ့ရပြီး ရှမ်းပြည်နယ်တောင်ပိုင်း ပင်းတယမြို့နယ်၊ ရွာငံမြို့နယ်၊ မန္တလေးတိုင်း ရမည်းသင်းမြို့နယ်တို့တွင်လည်း သိရှိခံစားခဲ့ကြရကြောင်း ဒေသခံအချို့ကပြောသည်။
“အသံအကျယ်ကြီးကြားပြီးမှလှုပ်တာ။ကားမောင်းသွားတဲ့အသံကြီးလို့ကြားရတာ”ဟုနေပြည်တော်တွင် နေထိုင်သူတစ်ဦးကပြောသည်။
မတ်လ ၂၈ရက်ကလှုပ်ခတ်ခဲ့သောစစ်ကိုင်း ငလျင်ကြီးကြောင့်နေပြည်တော်လည်း သေဆုံးပျက်စီးမှုများပြားခဲ့သည်။ အင်အားပြင်းထန်သော စစ်ကိုင်းငလျင်ကြီးလှုပ်ပြီးနောက်ရစ်ချ်တာစကေး၃ မှ ၅ဝန်းကျင် နောက်ဆက်တွဲငလျင်များသည် ၂နှစ်ခန့်ကြာသည့်အထိ လှုပ်ရှားနေမည်ဖြစ်ကြောင်း ငလျင်ပညာရှင်များကပြောသည်။
ငလျင်ပညာရှင်ဒေါက်တာမျိုးသန့်က မတ်လ ၂၈ရက်ကအင်အားပြင်းငလျင်၏နောက်ဆက်တွဲများ ဆက်လက်လှုပ်ခတ်နေမည်ကို သိရှိနားလည်ထားရန်လိုအပ်ကြောင်း နှင့် သတိပြုရန်လိုအပ်သော်လည်းစိုးရိမ်မှုမလွန်ကဲကြရန်အကြံပြုထားသည်။
