ဩဂုတ်-၁၁၊ ၂၀၂၅။ ထားမြတ်/People’s Spring
ကချင်ပြည်နယ်၊ဗန်းမော်မြို့တိုက်ပွဲတွင်စစ်တပ်ဘက်ကလေကြောင်း၊ ဒရုန်းဖြင့် အပြင်းအထန်တိုက်ခိုက်၍ အမြောက်တပ်ရင်း (၃၆၆)နှင့် လေယာဉ်ကွင်းစသည့်နေရာအချို့ကိုကချင်လွတ်လပ်ရေးတပ်မတော် (KIA)ပူးပေါင်းတပ်ကပြန်လည်လက်လွှတ်လိုက်ရကြောင်း စစ်ရေးသတင်းရင်းမြစ်အချို့က ပြောသည်။
“လေယာဉ်ဗုံး၊ဒရုန်းဗုံး မိုးရွာသလို အဆက်မပြတ် ပစ်နေကြလို့ လေယာဉ် ကွင်းနဲ့ အမတ(၃၆၆) နည်းနည်းဆုတ်ပေးထားတယ်ပြောတယ်။ အဲဒီလောက်ပဲ သိသေးတယ်”ဟု ကချင်စစ်ရေးသတင်းရင်းမြစ်က ပြောသည်။
ကချင်စစ်ရေး၊ နိုင်ငံရေးလေ့လာသူ တဦးကလည်း “မနေ့ညနေပိုင်းကစ တချို့နေရာကနေ ဆုတ်ပေးထားတယ်ကြားတယ်။ အဓိကတော့ နည်းပညာ စစ်ပွဲပဲ။ တရုတ်နဲ့ ရုရှားဘက်က စကစကို နည်းပညာသာမကဘဲ ဒရုန်းနဲ့ ခေတ်မှီဗုံးတွေပါ ထောက်ပံ့ ပေးနေပြီလို့ သုံးသပ်ရတယ်” ဟု ပြောသည်။
Public Service Announcement
ဩဂုတ် ၁ရက်တွင် ဗန်းမော်မြို့သို့ ဆိုက်ကပ်လာနိုင်သည့် စစ်သင်္ဘောအုပ်စုနှင့်အတူ အဆိုပါ လက်နက်ခဲယမ်းများ သယ်လာခြင်းဖြစ်ကြောင်း ၎င်းက ပြောသည်။
ဗန်းမော်မြို့နေရာအချို့ကို KIAက လက်လွှတ်လိုက်ရသည့် သတင်းမှန်ပါက စိုးရိမ်ရန်လိုအပ်ကြောင်း၊ သီပေါ၊ ကျောက်မဲ၊မိုးကုတ်၊ ဗန်းမော် စသည့်မြို့နယ်များသည် KIAနှင့် တအာင်းတပ် TNLAနှစ်ဖွဲ့နှင့်သာ သက် ဆိုင်သည်ဟု မြင်၍ မရကြောင်း အဆိုပါ လေ့လာသူက ပြောသည်။
” နွေဦးတော်လှန်ရေးတပ်ဖွဲ့တွေအားလုံးနဲ့ ဆိုင်တာမို့ ကိုယ့်တပ်ဖွဲ့နဲ့ အနီးဆုံး စကစ ကို တက်ညီလက်ညီ ထိုးစစ်ဆင်သင့်ပြီ”ဟုလည်းကချင်စစ်ရေးနိုင်ငံရေးလေ့လာသူက ပြောသည်။
စစ်ကောင်စီဝါဒဖြန့်သူအချို့ကလည်း KIA ပူးပေါင်းတပ် သိမ်းထားသည့် အမြောက်တပ် (၃၆၆) ၊ ဗန်းမော်လေဆိပ်နေရာများကို ပြန်လည်ရရှိကြောင်းစစ်ကောင်စီတပ်ဖွဲ့ဝင်များနေရယူထားနိုင်သည့် ဓာတ်ပုံမှတ်တမ်းများ ဖော်ပြ ဝါဖြန့်လာသည်ကိုလည်းတွေ့ရသည်။
ဗန်းမော်တိုက်ပွဲ အခြေအနေနှင့်ပတ်သက်၍ KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်သည်။
