မကွေးတိုင်း ဂန့်ဂေါနှင့် ထီးလင်း လမ်းပိုင်းတွင် စစ်ကောင်စီတပ်ယာဉ်တန်းကို မိုင်း၊ လက်ပစ်ဗစ်များဖြင့် ပစ်ခတ်တိုက်ခိုက်ရာ စစ်ကောင်စီတပ်သား ၂၅ဦးသေဆုံးပြီး ၂၀ကျော် ဒဏ်ရာရရှိခဲ့ကြောင်း ယောဒေသ ကာကွယ်ရေးတပ်ဖွဲ့(YDF)က ထုတ်ပြန်သည်။
ယနေ့( နိုဝင်ဘာ ၁၉ရက်) မနက်ပိုင်းက ဂန့်ဂေါ-ထီးလင်း လမ်း မောလယ်ကွေ့တွင် အင်အား ၂၀၀ ခန့်ပါသည့် စစ်ကား ၅စီးကို တိုက်ခိုက်ခဲ့ခြင်းဖြစ်ကြောင်း၊ ယင်းဖြစ်စဉ်တွင် YDF ဘက်မှ ထိခိုက်မှုတစ်စုံတစ်ရာမရှိကြောင်း ဖော်ပြသည်။
ယခုတိုက်ခိုက်မှုသည် နိုဝင်ဘာ ၁၆ရက်နှင့် ၁၇ရက် တိုက်ပွဲများ၌ တော်လှန်ရေးရဲဘော်များ ကျဆုံးခဲ့မှုနှင့် ပြည်သူ ၅ဦး အသတ်ခံရမှုအပေါ် လက်တုံ့ပြန် တိုက်ခိုက်ခြင်းဖြစ်သည်ဟုလည်း ထုတ်ပြန်သည်။
ပြီးခဲ့သည့်ရက်ပိုင်းက ထီးလင်းမြို့နယ် ထန်းပင်ကုန်းရွာအနီး တိုက်ပွဲတွင် YDF ထီးလင်းမှ ရဲဘော် ၁၃ဦး နှင့် ချင်းကာကွယ်ရေးတပ်ဖွဲ့(CDF) မင်းတပ်မှ ရဲဘော် ၁ဦး စုစုပေါင်း ၁၄ဦး ကျဆုံးကာ ၃ဦးဒဏ်ရာရရှိခဲ့ကြောင်း၊ စစ်ကောင်စီတပ်မှလည်း ၁၀ဦးခန့် ကျဆုံးခဲ့ကြောင်း YDFက ထုတ်ပြန်ထားသည်။
Public Service Announcement
